«Qisyq» jarnamalarǧa tosqauyl kerek
Bügin «Isker» biznes ortalyǧynda «Körneki aqparat, jarnama tili» atty seminar ötedi. Astana qalasy Tilderdi damytu basqarmasy men «Zerde» tilderdi damytu jönindegi innovasiialyq ortalyǧy ūiymdastyratyn şarada köşe boilaryndaǧy körneki qūraldarda, jarnamalarda örip jürgen qateler (qazaq tilindegi jarnamalarda) synǧa alynbaq. Osy baǧyttaǧy problemalar ortaǧa salynbaq. Seminar aldynda basqarma bastyǧy Erbol Tileşovti äŋgimege tartqanbyz.
– Erbol Erdembekūly, aldymen bügin qolǧa alǧan şaralaryŋyzdyŋ maqsatyna toqtalsaŋyz…
– Büginde köşe boilaryndaǧy türli jarnamalardy, körneki qūraldardy merzimdi basylymdar jii synǧa alyp jür. Jauapkerşiligi bizden sūralady. Alaida, ol «qisyq» jarnama ielerin jauapqa tartu bizdiŋ qūzyrymyzdaǧy şarua emes. Basqarmanyŋ qolynan keleri – tüsindiru, nasihat jūmystary ǧana. Bügingi seminardyŋ da maqsaty – sol.
– Naqty qandai mäseleler qauzalady?
– Elordada 65-ke juyq jarnama agenttigi bar eken. Solardyŋ barlyǧynyŋ jetekşilerin jiynǧa şaqyrtyp otyrmyz. Sondai-aq, til salasynyŋ mamandary, belgili ǧalymdar da basqosuǧa at basyn būratyn bolady. Şara eki bölimnen tūrmaq. Alǧaşqysynda, özimizdiŋ qyzmetkerler agenttik ökilderine jarnamalardy, körneki qūraldardy jasauda, jazuda qatelikterge boi aldyrmaudy aitady. Äsirese, qazaq tilindegi söilemderge saq bolu qajettigin jetkizedi. Öitkeni, ol memlekettik til, ana tilimiz ekenin esterine salady. Olardyŋ da ūsynystary, pikirleri tyŋdalady. Al, kelesi bölimde arnaiy kelgen mamandar, ǧalymdar därister oqylmaq. Onda naqty qazaq tiliniŋ jazylu stilderi, erejeleri üiretiledi.
– Basqarma tarapynan jarnama agenttikterimen bailanys joq pa?
– Bailanysqymyz-aq keledi. Arnaiy qyzmetkerlerimiz de bar. Alaida, olar bizben sanasqysy kelmeidi. Jiynda osy jaǧyn da äŋgime etetin bolamyz. Agenttik ökilderine jii-jii bailanysqa şyǧyp, körneki qūraldary men jarnamalaryn jariialamas būryn, arnaiy mamandarǧa qaratyp alularyn ūsynamyz.
Aitqandai, seminarda arnaiy daiyndalǧan ädistemelik qūral da taratylady. Onda Qazaqstan Respublikasynyŋ «Til turaly» zaŋdary, jarnamalardyŋ, körneki qūraldardyŋ ülgisi qamtylǧan.