Demalys künderı qar jauyp, Astana aq ūlpaǧa qaita orandy. Alaida qalanyŋ kommunaldyq qyzmetterı merekelık demalys künderınde de damyl tappai, elorda aumaǧyn qardan tazalady. «Astana tazalyq» JŞS mamandary taratqan mälımet boiynşa, qys ailarynda qala syrtyna şyǧarylǧan qardyŋ mölşerı şamamen 3 mln tekşe metrdı qūraǧan.
Al 25 nauryz künı bır täulıktıŋ ışınde «Astana tazalyq» JŞS elorda aumaǧynan 30 myŋǧa tarta tekşe metr qardy syrtqa şyǧarypty.
«Qalany qardan tazartu jūmystaryna 312 jūmysşy men 589 tehnika bırlıgı jūmyldyryldy. Bır täulık ışınde Astana aumaǧynan şyǧarylǧan qardyŋ mölşerı 29 862 tekşe metrdı qūrady. Qys basynan elordadan poligonǧa qardyŋ 2 996 170 tekşe metrı şyǧaryldy» delıngen käsıporynnyŋ habarlamasynda.
Sondai-aq atalmyş kompaniianyŋ mälımetıne süiensek, 25 nauryzda bır täulıktıŋ ışınde joldarǧa tūz aralastyrylǧan qūm qospasynyŋ 193 tonnasy, köktaiǧaqqa qarsy reagenttıŋ 21,6 tonnasy sebılgen eken.
Astana äkımdıgı tūrǧyn üi kommunaldyq şaruaşylyǧyna qatysty barlyq mäseleler boiynşa täulık boiy 109 nömırı nemese «Smart Astana» mobildı qosymşasy men Facebook äleumettık jelısındegı chat-bottar arqyly elorda äkımdıgınıŋ Bıryŋǧai bailanys ortalyǧyna (iKomek) habarlasuǧa bolatynyn, sonymen qatar üi aldyndaǧy qardan uaqytynda tazalamau mäselesıne qatysty PİK-ter men basqaru kompaniialaryna habarlasu kerektıgın eskertedı.
Qazırgı uaqytta aua raiynyŋ qolaisyzdyǧyna bailanysty qalanyŋ kommunaldyq qyzmetterınıŋ barlyǧy jūmystyŋ küşeitılgen rejimıne köştı. Astana qalasynyŋ är audanynda qūm şaşyratqyştar, avtogreiderler, jük tiegışter syndy arnaiy tehnikalar jūmys ıstep jatyr.
Elorda bilıgı qala tūrǧyndary men qonaqtaryn qauıpsızdık erejelerın barynşa saqtauǧa şaqyrady. Kölıktı basqaru kezınde jyldamdyq rejimı men tiıstı ara qaşyqtyqty saqtai otyryp, jyldam qozǧalys, oqys äreket jasamauǧa tyrysyŋyz. Jaiau jürgınşıler de barynşa abai bolǧany jön. Olar joldyŋ ekınşı jaǧyna tek jaiau jürgınşıler ötpesı arqyly ǧana ötuı kerek. Qala joldarynda arnaiy tehnika jūmys ıstep jatqandyqtan, kölıkterdı ötkızu deŋgeiı bırşama tömendeuı mümkın. Osyǧan orai, öz kölıgıŋızdıŋ qozǧalys baǧytyn aldyn ala josparlap alǧanyŋyz abzal.
