Qyzdar bäsekesı qyzdy
Astana törınde ötıp jatqan äielder arasyndaǧy älem chempionatynda qazaqstandyq boksşylar äzırge janküierler ümıtın aqtap keledı.
«Barys Arena» sport saraiynda kerılgen qos ringte kün saiyn būrymdy boksşylardyŋ aiqastary ötıp jatyr. Aldaǧy jūma künı Astana şarşy alaŋy on salmaq boiynşa älem chempiondaryn anyqtaityn bolady. Älemnıŋ 64 elınen jinalǧan bylǧary qolǧap şeberlerınıŋ jekpe-jekterıne qarap, äielder boksynyŋ da barlyq qūrlyqta qarqyn ala bastaǧanyn aŋǧaruǧa bolady. Onyŋ üstıne būl bırınşılıkte üş salmaq boiynşa aldaǧy tamyz aiynda Rio-de-Janeiro qalasynda ötetın jazǧy Olimpiada oiyndaryna lisenziialar berıletın bolǧandyqtan är aiqas maŋyzdy bolmaq. Osy oraida, ökınışke qarai, Qazaqstan qūramasynyŋ ükılep qosqan boksşysy Rimma Volosenko (60 kelı) alǧaşqy jekpe-jegınde-aq jarys jolynan şyǧyp qaldy. Astanalyq arudyŋ Daniia boksşysy İvonn Rasmussenge şamasy jetpei qaldy. Osylaişa, Olimpiada oiyndaryna berıletın bır lisenziia qoldan susyp şyǧyp kettı.
Endıgı ümıt – 51 kelıde synǧa tüsıp jatqan Jaina Şekerbekova. Olimpiadaǧa joldama aludy maqsat etıp otyrǧan Jaina bırınşı jekpe-jegınde ädemı boks körsettı. Ol argentinalyq Klara Laskuratty tıze büktırdı.
Qazaqstannan älem chempiony atanǧan tūŋǧyş aruymyz Nazym Qyzaibai da alǧaşqy aiqasynda poliak boksşysy Anjelika Gronskany, keşe ekınşı qarsylasyn da ūtty.
Qazaqstan qūramasyndaǧy eŋ jas boksşynyŋ bırı Aijan Qojabekova (57 kelı) da bapkerler ümıtın aqtap şyqty. 69 kelıde el namysyn qorǧaityn Valentina Halzova osy bırınşılıktegı alǧaşqy aiqasynda qarsylasyn nokautpen ūtqan bolatyn. Ekınşı kezdesuınde älemdık reitingte üşınşı bolyp tūrǧan özbekstandyq Şahnoz Nizamovamen qolǧap tüiıstırıp, jeŋıske jettı.
Bapkerler senım jüktegen boksşynyŋ bırı Dina Jolaman da alǧaşqy ainalymnan qinalmai öttı.
Bızdıŋ qūramanyŋ sapyndaǧy Violetta Kniazeva (75 kelı) bırınşı jekpe-jegınde öte tegeurındı boksşy ekenın baiqatty. Bırınşı qarsylasyn būryştan būryşqa quyp, ūrdy. Alaida, Violettanyŋ endıgı qarsylasy qauıptı bolaiyn dep tūr. Ol – amerikalyq Klaress Şilds. Bıle bılsek, osydan tört jyl būryn London oiyndarynda top jarǧan, sonymen qatar älem chempiony degen ataǧy bar boksşy.
Bairaqty jarystyŋ üşınşı künı, ökınışke qarai, Qazaqstan qūramasynan taǧy bır boksşy jarys jolynan şyǧyp qaldy. Resei boksşysy Liubov Paşinaǧa qarsy şyqqan qazaqstandyq Iýlduz Mamatkulova (81 kelı) jeŋılıstıŋ aşy dämın tatuǧa mäjbür boldy.
Sonymen, Astana törınde ötıp jatqan älem chempionaty qyza tüstı. Bügın şirek finaldyq jekpe-jekter bastalady.
Ǧalym QOJABEKOV