Elorda künı qarsaŋynda älemdık deŋgeidegı tort pısırudıŋ şeberı mäskeulık Renat Aǧzamov qala tūrǧyndary men qonaqtaryna «tättı tartu» jasady. Täuelsızdık saraiynda künı boiy tort pısırudıŋ qūpiia tehnologiiasymen bölısıp, barşanyŋ konditerlık salaǧa degen qyzyǧuşylyǧyn arttyrdy.
Renat Aǧzamov. Köpşılık jūrt ony tort pısırudıŋ elitalyq şeberı dep tanidy.
Jetı jasynda alǧaş ret pirog pısırgen sary bala, keiınnen Sochi qalasyndaǧy kulinarlyq uchilişenı bıtırgen. Bügınde konditerlık önerden älem chempiony atandy. Tort pısırudıŋ kürdelı tehnologiiasyn meŋgergen aspaz tättı pısırudıŋ keremet tehnologiiasyn, mektebın qalyptastyrdy. Kulinarlyq öner tuyndysyn jasaityn şeber älem boiynşa tapsyrys qabyldaidy. Älemnıŋ tükpır-tükpırındegı bai-baǧlandar men ataqty şou-biznes ökılderı – Aǧzamovtyŋ tūtynuşylary. Öitkenı, ol är adamǧa arnap jaŋa tuyndy jasap şyǧarady. Osy uaqytqa deiın tapsyryspen üilenu toiyna arnap pısırgen 2700-den astam torty bırın-bırı qaitalamaǧan. Şyǧarmaşylyq oidyŋ naǧyz jetıstıgı deuge bolady.
«İntellektualdy konditer»
Bar bolǧany 34 jastaǧy jıgıt – ırı konditerlık kompaniianyŋ iesı. Mamandyǧyn janyndai süiedı. Kezdesude ol astanalyqtarǧa tättı älemnıŋ qūpiiasyn jaiyp saldy. Ömırlık jolyndaǧy tynymsyz eŋbegın, jetıstıkke jetudıŋ joldaryn, aspazdyq önerdıŋ qyr-syryn bar yntasymen bölıstı.
– Aldymen, Astananyŋ sūlulyǧyn aitqym keledı. Jyl saiyn qūlpyryp kele jatqan qala säulettı ǧimarattarymen, tazalyǧymen, tynyştyǧymen erekşelenedı. Osy äsem qalanyŋ tuǧan künı qarsaŋynda şeberlık därıs ötkızıp otyrǧanymdy märtebe sanaimyn, – deidı ol.
Seminardyŋ taqyryby – «intellektualdy konditer». Atauyn özı ūsynǧan. Tort pısırudıŋ özı intellektualdy bılımdı qajet etedı deidı şeber.
Jiynǧa qatysuşylardyŋ qatarynda elordalyq kafe, meiramhana ielerı, konditerlık salanyŋ mamandary jäne Renat Aǧzamovtyŋ äleumettık jelıdegı tūraqty oqyrmandary boldy.
Şeberlık synypta tanymal aspaz konditerlık salanyŋ eŋ basty önımderı sanalatyn – jūmyrtqa, qant jäne ūnnyŋ bız bılmeitın qyzyqtarymen bölıstı. Mäselen, bır jūmyrtqanyŋ özın paidalanarda onyŋ qūramyndaǧy aquyz ben saryuyzdyŋ mölşerıne nazar audaru kerek eken. Keibır torttarǧa belgılı mölşerde saryuyz qoldanylsa, ony esepteudıŋ özındık joldary da bar. Qarapaiym jūmyrtqany qandai temperaturada saqtau kerek, qandai türın, qalai paidalanu kerektıgıne deiın qyzyqty mälımetter ūsyndy. Tort pısırudıŋ tehnologiiasy tūnyp tūrǧan qyzyqty matematika dersız! Al, oǧan dekorasiia jasau üşın tereŋ bılım kerektıgı öz aldyna.
Därısterı trendke ainalǧan…
Aǧzamov özınıŋ kündelıktı jūmys josparymen de tanystyrdy. Taŋǧy saǧat altydan bastap keşke deiın jūmysta bolsa, tünımen noutbuk qarap, jaŋa dünieler oilap tabuǧa tyrysady. Jaŋalyqqa jany qūmar ol tättı pısırudıŋ tehnologiiasyna üŋılıp, tyŋ dünieler oilap tapqandy ūnatady.
Bügınde onyŋ «premium-klastaǧy» därısterı trendke ainalǧan. Konditerlık salanyŋ mamandary Aǧzamovtyŋ jolyn quǧysy keledı, taǧylymdamasyn alyp, şäkırt boludy armandaityny jasyryn emes. Al onyŋ «Fili Beiker» kompaniiasynda daiyndalǧan torttary – naǧyz öner tuyndysy. Mūnda tättı torttyŋ qarapaiym türınen bastap, kürdelısıne deiın öndıredı. Aǧzamovtyŋ aituynşa, tättı pısıruge 100-den astam adam jūmyldyrylady.
– Türlı tapsyrystar kelıp tüsedı. Arasynda jasaluy qarapaiym bolyp keletını, kürdelı tehnologiiany qajet etetını de bar. Bız ärbır bölşegıne deiın tūnyp tūrǧan kreativ bolǧanyn qalaimyz. Bız eşqaşan tūtynşuylarǧa jalǧan söilemeimız. Iаǧni, salmaǧy auyr, biıktıgı bırneşe metr bolatyn torttyŋ qūramynda mındettı türde qant, jūmyrtqa, ūn önımderınıŋ kölemı köbırek qoldanylady. Kaloriiasy az tättı bolmaidy. Sondyqtan, özgeler sekıldı keibır önımderımızdı dietalyq dep aita almaimyz. Bıraq eşqandai himiia qoldanylmaidy, – deidı Aǧzamov.
Aituynşa, onyŋ kompaniiasynda daiyndalatyn ǧajaiyp torttar şokoladpen bezendırıledı. Jūqa jäne qalyŋ türlı-tüstı qabattar torttyŋ barynşa ajaryn aşady. Keiıpkerlerdı jasauda köp ızdenu qajet. Tūlǧasyn ainytpai tanytu üşın aldymen pışınder jasalynady. Onyŋ özı bırneşe kün uaqytty alady. Mäselen, Aǧzamov atqylap jatqan naǧyz fontan daiyndau üşın 1,5 jyl ızdengen.
Sonymen, 300-den astam adam qatysqan Aǧzamovtyŋ seminary joǧary deŋgeide öttı. Onyŋ aitqan aspazdyq qūpiialaryn astanalyqtar ūiyp tyŋdady. Qyzyqty baǧdarlama ūsyna bılgen oǧan köptegen saualdar da qoiyldy. Şara soŋynda tättıden auyz tigen jūrt, tanymal şebermen estelıkke fotoǧa tüsudı ūmytpady.
Gülmira AIMAǦANBET
