Sahnanyŋ qūdıretıne, qasietıne bas iiu kerek
Nūrǧali NÜSIPJANOV, QR Halyq ärtısı:
– Önerdegı köp ınılerıŋız sızdı aǧa tūtady. Özıŋız öner jolyna den qoiǧan jyldary kımder qol ūşyn berıp edı?
Säbira, mūǧalım
– Ol basqa zaman. Soǧystan keiıngı jyldar. Üşbu hattar köp kelıp jatatyn. Ülken kısıler köp boldy. Bız adamdardyŋ yqylasy, parasaty – eŋ baǧaly qasietı ekenın sezınıp östık. Allaǧa şükır, jolym boldy. Talai önegelı jandardyŋ qolyna su qūiyp, qyzmet ettık. Qanabek Baiseiıtov, Qūrmanbek Jandarbekov, Kenen Äzırbaev aǧalarymyzdyŋ aqylyn tyŋdap östım. Ol kısılerdı pır tūttym. Auyldyŋ qarataban balalary joǧary oqu ornyn bıtırıp şyqqannan keiın sol kısılerdıŋ aqyl-keŋesımen jetıldık. Asqar Toqpanovpen sız-bız desıp öttık. Ahmet Jūbanovtyŋ aqyl-parasatyn tyŋdadyq. Ol kısıden därıs aldyq. Qala boiynşa türlı ülken ıs-şaralarda därıs oquǧa şaqyratyn. Mūqan Tölebaev aǧamyzdyŋ da közın kördım.
– Sahnada boiyŋyzdy tık ūstaisyz. 70-tıŋ jotasyna şyqqan aqsaqal deu qiyn. Özıŋızdı qalai kütesız, aǧa?
Körkem, buhgalter
– Sonşa qatty kütınbeimın. Jaratqannyŋ bergenı osy. Qūrdastarym, qūda-jegjatymnyŋ arasynda da osyndai äŋgıme bolady. Sol kezde qaljyŋdap, «Üidegı kempırım tamaqqa toiǧyzady, sosyn toŋazytqyşqa salyp qoiady. Menı solai saqtaidy. Taŋerteŋ toŋazytqyştan alyp, şai beredı» deimın. Ärine, mūnyŋ bärı qaljyŋ ǧoi. Eŋ bastysy, sahnanyŋ qūdıretıne, qasietıne bas iiu kerek. Eŋ asyl dünienıŋ bärı sahnaǧa şyǧady. Tıptı, el prezidentterı, patşalary sahnaǧa şyǧyp sälem beredı.
– Keibır änşıler özderınıŋ öner joly jaiynda syr şertetın kıtap şyǧaryp jatyr. Būǧan qalai qaraisyz?
Aijan, medbike
– Öte dūrys. Menıŋ de «Öz elım» degen estelık kıtabym jaryq körgen. Qazır de oida jürgen bıraz närseler bar. Ol bır kıtapqa tati ma, tatymai ma, oqyrman baǧalai jatar. Bügın-erteŋ kırısıp jatqanym joq. Oǧan qosa, jastarǧa oqulyq bolatyndai qyp änderdı toptastyryp, retke keltırsem be deimın. Bos uaqytymda osymen ainalysamyn.
– Aǧa, sızdı tuǧan jerıŋızge baq ösıru ısın qolǧa alypty dep estıdık…
Arman, käsıpker
– Älı bıtpedım. Būl jaǧynan ūiattymyn. Bıraz şarua toqtap tūr. 2000 jyly Elbasy Astananyŋ maŋaiyna aǧaş otyrǧyza bastaǧanda, men de tuǧan auylym aŋǧal-saŋǧaldau bolmasyn dep osy igı ıstı qolǧa aldym. Öitkenı, baq – bolaşaqqa qalatyn mūra. Jūmys su tapşylyǧynan toqtap tūr. Bır jaǧynan, oblys, audan basşylaryna ökpem qara qazandai. Özderıne jüktelgen şarualaryn keşıktırıp jatyr. Şaǧyn auylda auyz su mäselesı şeşımın tappai tūr. Tau suy kün ysyǧanda jerge sıŋıp ketedı. Auylǧa kelgen sudy būryp alsam, maǧan eşkım qoi demeidı, tek sol jerde tūratyn halqymnyŋ tamşy suyna ortaq boluǧa namysym jıbermeidı. Talai basşylarǧa hat jazyp, auyz su mäselesın şeşudı ötındım. Köp te qarajat ketpeidı. Tört-bes şaqyrym jerge jetetın qūbyr ornatsa, bolǧany. Jalqaulyq, nemqūraidylyq, marǧaulyq basym. Elge, jerge degen qūrmet joq. Adamnyŋ adamdyq qasietın baǧalamau – bombadan da qauıptı. Būl menıŋ jeke basym emes, el üşın ısteletın şarua ǧoi.
– Aǧa, neşe jasyŋyzdan än aityp kelesız?
Şynar, student
– Bala küngı armanym suretşı bolu edı. Mektepke barmai tūryp-aq suret saluǧa äues boldym. Joǧary synypqa köşkende ǧana änge qyzyǧuşylyǧym arta bastady. Äke-şeşem än salmaǧanmen, önerpazdardy qūrmet tūtyp, erekşe yqylaspen tyŋdaityn. Önerdı süiıp ösuge, qūrmetteuge ata-anamnan körgen tärbiem äser ettı dep oilaimyn.
– Izıŋızdı quyp kele jatqan jastarǧa köŋılıŋız tola ma?
İgılık, qala tūrǧyny
– Bızde talantty jastar köp. Olardyŋ mümkınşılıgı mol. Ä degennen barlyǧy babyna kele bermeidı. Öner adamy elmen aralasuy kerek. Eldıŋ syn-pıkırıne qūlaq asuy kerek. Sanasynda saralau kerek. Sonda ǧana talanty ūştala beredı.
– Qarapaiymdylyǧynan ainymaityn qazaqy, qoŋyr bolmysyŋyzdy erekşe qūrmetteimın. Ataq-daŋqyŋyzǧa qaramastan osylai qalyptasuyŋyzǧa ne äser ettı?
Perizat, zeinetker
– Qūlaǧymnan «Ūlyq bolsaŋ, kışık bol», «Halqyŋnan, elıŋnen biık bolma», «Sudy, jerdı bylǧama», «Eşkımge qiianat jasama» degen sözder ketpeidı. Qorazbaevşa aitsaq, būl – «qara şaldardyŋ», auyl aqsaqaldary mektebınıŋ tärbiesı. Sol kısılerdıŋ aitqanyndai, kısınıŋ jönsız aldyn kesıp ötpeu, ülkenge qūrmet, kışıge ızet körsetu, tıptı, söilep otyrǧan adamnyŋ sözın bölmeu sekıldı jai ǧana qaǧidalardyŋ özı bızge ülken ömırlık sabaq boldy. Qart adamdy tamyr-tanystyǧyna, ūltyna qaramai syilau, kemtar jandarǧa qol ūşyn beru sanamyzǧa äbden sıŋıp qaldy. Bızdı solai tärbieledı, solai qalyptastyq.
– «Öner qyrandary» äzıl-syqaq teatrynyŋ sızge parodiia jasaǧanyn körgen edım. Qalai qabyldadyŋyz?
Tolǧanai, mūǧalım
– (Küldı). Parodiia jasamas būryn «Öner qyrandarynyŋ» jıgıtterı rūqsat sūrady. Rūqsatymdy berdım. «Isteitın qyzmetterıŋ, nan tauyp otyrǧan jūmystaryŋ sol ǧoi, jasaŋdar» dedım. Ärı osy parodiia arqyly özımdı syrttan qarauǧa mümkındık aldym. Negızı, adam özıne bır uaq syrt közben qarap qoiǧany dūrys.
– Änşılık önerdegı kemşılıkterdı aityp bere alasyz ba?
Zina, oqyrman
– Kemşılık bolyp jatyr. Bıraq ol tüzelmeidı emes. Bılmestıkten, asyǧystyqtyŋ kesırınen oryn alyp otyrǧan kemşılık. Qazır köptegen öner adamdary qamqorlyqtan tys qalyp jatyr. Üisız-küisız, jūmyssyz jürgen jastar köbeiıp kettı. Osy jaǧy qiyn. Bız solarǧa joldaryn dūrys taŋdauyna qolǧabys jasauymyz kerek. Memleket tarapynan qamqorlyq boluy tiıs. Qamqorlyqty tiıstı deŋgeide jasai alsaq, olarda da jauapkerşılık sezımı paida bolady.
– Astana jūrtşylyǧyna qandai tılek aitasyz?
Samal, student
– Astana – bükıl memleketımızdıŋ ainasy. Astananyŋ üilerı sändı, köşelerı tüzu bolyp qana qoimai, adamdary da äsem, ruhani bai, ışkı mädenietı joǧary, naǧyz patriottar, qairatkerler bolu kerek.
Erkejan SÄTIMBEK