Altaidan Atyrauǧa deiıngı ūlan-ǧaiyr aumaqty alyp jatqan atyrabymyz jaily kezınde etnograf ǧalym Grigorii Potanin «Maǧan bükıl qazaq dalasy än salyp tūrǧandai bolyp körınedı» dep aitqandai, keŋ ölkemızdıŋ qai qiyrynda da «qūlaqtan kırıp, boidy alatyn» muzykalyq mūralar kezdesedı. Elımızdıŋ şyǧysy men batysy aralyǧynda qalyptasqan ärtürlı än-küi mektepterı soǧan dälel. Keiıngı kezde dästürlı önerdı qoldau jaǧy kemşın soǧyp tūrsa da, änşı, küişılerımızdıŋ keŋınen kösıletın mezgılderı bar. Astana künıne orai jyl saiyn ötkızıletın «Serper» halyq aspaptar orkestrlerınıŋ muzykalyq festivalı, mıne, sondai alaŋdardyŋ bırı.
Astana qalasy äkımdıgınıŋ qoldauymen ūiymdastyrylyp kele jatqan «Serper» festivalı elordada biyl altynşy märte şymyldyǧyn türedı. Üş kün boiy elorda aspanyna äsem än men tättı küidı ūşyratyn dästürlı muzyka merekesınıŋ aşyluy qalalyq alaŋda ötedı. Festivaldı elordadaǧy ırgelı öner ūjymy – Astana qalasy Memlekettık akademiialyq filarmoniiasynyŋ Qazaq orkestrı bastaidy. Orkestrdıŋ bas dirijerı jäne körkemdık jetekşısı, QR eŋbek sıŋırgen qairatkerı, professor Aitqali Jaiymovtyŋ bastauymen ūltymyzdyŋ nebır jauhar tuyndylary oryndalady.
Kelesı künı festival elordadaǧy «Studenttık» jäne «Arai» saiabaqtarynda jalǧasady. Qazaqstandyq öner ūjymdarymen qatar būl şaraǧa Reseiden keletın qonaqtar da qatysatynyn aita ketu kerek. Olardyŋ qataryndaǧy Başqūrtstan Respublikasynyŋ ūlttyq halyq aspaptar orkestrı men Omby qalasynyŋ «Lad» orys kameralyq orkestrı öz önerıne qanyqtyrady.
Jalpy, atalmyş festivalge jetı orkestr qatysady. Sonyŋ ışınde elımızdegı är aluan än-küi mektepterınen habar beretın öner ūjymdary bar. Atap aitsaq, Tūrmaǧambet atyndaǧy halyq aspaptar orkestrı (Qyzylorda qalasy), Kenjebek Kümısbekov atyndaǧy Aqmola oblystyq filarmoniiasynyŋ qazaq halyq aspaptar orkestrı (Kökşetau), Abyl Taraqūly atyndaǧy qazaq halyq aspaptar orkestrı (Aqtau) jäne Baijıgıt atyndaǧy halyq aspaptar orkestrı (Öskemen).
Festivaldıŋ gala-konsertı qalalyq alaŋda ötedı. Onda barlyq qatysuşy ūjymdardan, iaǧni, jetı orkestrden, 300-ge juyq muzykanttan qūralǧan alyp ansambl «Serperden» «Saryarqaǧa» deiıngı halqymyzdyŋ eŋ üzdık küilerın oryndaidy.
Amanǧali QALJANOV
