Şet aimaqtarda jaŋa mektep salynady

Juyrda Memleket basşysy Qasym-Jomart Toqaev elordanyŋ «Lesozavod» yqşamaudanynda ornalasqan №23 mektepke barǧan kezınde oqu ǧimaratynyŋ ahualymen tanysyp, atalǧan audanda jaŋa mektep salu qajettıgın aitqan edı. Prezident tapsyrmasy boiynşa qazırgı taŋda qandai jūmys atqarylyp jatqany jaily bız tiıstı mekeme ökılınen sūradyq.Qalalyq ortany regenerasiialau basqarmasy Dizain jäne jobalar sapasy bölımınıŋ bas mamany Aiagöz Sapaqbaevanyŋ mälımdeuınşe, jaqynda №23 mektepke arnalǧan 600 oryndyq jaŋa ǧimarattyŋ qūrylysy boi köteredı.
– Onda oqu kabinetterı, sport zaly, ashana, mäjılıs zalymen bırge mentaldyq kemşılıkterı bar balalarǧa arnalǧan inkliuzivtı synyptar da bolady. Öitkenı būl mektepte erekşe qajettılıktı talap etetın 9 bala bılım aluda, – deidı ol.
Bügınde «Astanatehstroiekspert» JŞS-men jobalau jūmystaryna kelısımşart jasalyp, eskizdık jobany daiyndau boiynşa jūmys­tar jürgızılude. Ǧimarat qūrylysynyŋ aiaqtalu merzımı 2020 jylǧy qyrküiekke tūspa-tūs keledı dep josparlanuda, iaǧni şäkırtter kelesı oqu jylyn jaŋa mektepte qarsy alady.
Nūr-Sūltan qalasynyŋ şet aimaqtaryn damytudyŋ 2020-2022 jyldarǧa arnalǧan keşendı jospary aiasynda būdan bölek üş mektep qūrylysy salu közdelgen. Onyŋ bıreuı osy audandaǧy Taiburyl köşesı, 23-üi mekenjaiynda ornalasqan №34 mektepke japsarjai bolsa, qalǧan ekeuı – jaŋa mektepter. Olardyŋ bırı – «Ürker» tūrǧyn alabynda, endı bırı Qarasai batyr men Būlanty köşelerınıŋ qiylysynda boi köteretın bolady.
Būǧan deiın habarlaǧanymyzdai, şahardaǧy 14 mektepte oquşy sany normadan artyq. Onyŋ ışındegı 8-ı, naqtyraq aitsaq, №13, 14, 27, 31, 40, 53, 59, 85 mektepter üş auysymdy rejimde oqytuǧa mäjbür.
Bılım basqarmasynyŋ Strategiia, taldau jäne sifr­lyq tehnologiialar bölımı basşysy Jazira Asanova ūsynǧan mälımetke süiensek, elordany damytudyŋ besjyldyq keşendı josparynda 37 jaŋa mektep pen 10 janama qūrylys salu qarastyrylǧan. Qazırgı taŋda 5 obekt salynyp, paidalanuǧa berıldı.