Balalardy qorǧau künı aiasynda bügın elordalyq büldırşınderge arnalǧan «Şuaqty Astana» merekelık baǧdarlamasy ötude. QR Qarjy ministrlıgınıŋ aldyndaǧy alaŋǧa keluşıler şyǧarmaşylyq öner ūjymdarynyŋ konsertın tamaşalai alady. Sonymen bırge, balalardyŋ asfalt üstınde suret saludan jarysyp, köŋılaşar oiyndarǧa qatysuǧa mümkındıgı bar.
Ūiymdastyruşylar sondai-aq, fontan ainalasynda sän salonyn qūrǧan. Onda qalalyq kolledjderdıŋ studentterı kışkentai qyzdardyŋ şaşyn tegın sändep, betın bodi-art stilınde ädemılep örnekteidı. Balalarǧa būl mereke aiasynda makiiaj ben manikiur jasatuǧa da bolady. Al, «Danalyq» kolledjınıŋ studentterı bolsa ūl-qyzdardyŋ boiy men salmaǧyn ölşep, alǧaşqy kömek körsetudıŋ täsılderın körsetude. Balalardy būdan basqa da türlı qyzyqtar kütude. Merekelık şara saǧat 14:00-ge deiın jalǧasady.
Mädina JAQYP
