Jastardyŋ közaiymyna ainalǧan italiialyq änşı Son Paskal jaiynda bügıngı buynnyŋ nietı bölek. Äsırese, studentterdıŋ köŋıldı jiyndarynda gitaramen qosyla şyrqaǧan änderın ynta-şyntamen tyŋdaidy. Paskal Astana qalasyndaǧy qaiyrymdylyq şaralaryna da jiı at basyn būryp, önerın ūsynyp jüretının aituymyz kerek. Sondai basqosulardyŋ bırınde änşımen tıldesıp, az-kem syr tartqan edık.
– Qazaqstannyŋ Astanasynan tūraq tapqanyŋyzǧa bırşama uaqyt boldy, qazaq tılın üirendıŋız be?
– Azdap söileimın, bır qazaqpen tıl tabysuǧa qauqarym jetedı. Dese de, köbırek jattyǧu kerek. Osynda tūrǧan ekenmın, osy eldıŋ tılın de bıluım kerek qoi. Bıraq, ainalammen köbıne orysşa qarym-qatynas jasaimyn. Ökınıştı bolsa da, uaqyt öte kele üirenıp ketetınıme sendıremın.
– Sız qazaq halqynyŋ bırtuar ūly Abai Qūnanbaiūlynyŋ «Közımnıŋ qarasy» änın şeber oryndaisyz. Sözın jattau qiynǧa soqpady ma?
– Men – muzykantpyn. Käsıbımdı jaqsy köremın. Maǧan qazaq änderı qatty ūnaidy. Öitkenı, qazaq dybystary jaǧymdy estıledı. Men, köpşılık bıletındei, italiialyqpyn. Ondaǧy dialekt türık, arab tılderıne öte ūqsaidy. Bızde «q», «ǧ», «ŋ» dybystary joq. Sondyqtan, qazaq änderıne tılımdı üiretu qiyndau soǧady.
– Bır qazaq änın qanşa uaqyt jattaisyz sonda?
– Tez arada dep aituǧa auzym barmaidy. Köp daiyndalamyn. Olardy tek jattap qana qoimai, ıştei qabyldauym qajet, ışkı jan-düniem sol äuendı sezınuı kerek. Studiiada bırınşı ret aitqan qazaqşa änım sättı şyqpaidy. Kelesı rette jaqsyraq bolady. Öitkenı, arasynda dem alu kerek. Būl menıŋ tuǧan tılım emes qoi.
– Sızdıŋ «Mahabbat» atty änıŋızdıŋ sözderı öte jeŋıl, jattauǧa da oŋai. Būnyŋ syry nede?
– Men būl ändı dosym Medet Baikenovpen bırlesıp jazdym. Bız öleŋ taŋdar aldynda taqyrybyn bırge oilastyramyz. Keiın men Medetke osy än arqyly ne jetkızgım keletının aitamyn. Sodan keiın äuen men öleŋnıŋ üilesımdılıgın qadaǧalaimyz. Al mūndai kelısımmen şyqqan ännıŋ tyŋdarman jüregınen oryn alary sözsız.
– Qazaq salt-dästürın qalai qabyldadyŋyz? Mysaly, İtaliiada tabaldyryqtan attap, üige engende aiaq kiım şeşpeitın körınedı...
– Sūraǧyŋyz oryndy. Men Qazaqstanda ekı jyldan berı tūryp kelemın. Mūndaǧy jergılıktı halyqtyŋ qonaqjailyǧyna täntı boldym. Tıptı, elıme qydyryp barǧanymda şoşqa etın jemeitın boldym. Senseŋız, ol jaqta da bosaǧadan attaǧanda aiaq kiımımdı şeşetın boldym. Būl jaqsylyqtyŋ nyşany dep bılem. Qazır mülde et jemeimın. Sebebı, ekı jyl boiy besbarmaqqa toidym. Endı üzılıs jasap jürmın (küldı).
– Qazaqstannyŋ qai öŋırınde boldyŋyz? Almaty janyŋyzǧa jaqyn şyǧar.
– Barlyq öŋırlerıne tabanym tidı, araladym. Almaty – öte äsem qala. Bıraq, maǧan Astana köbırek ūnaidy. Mūnda, eŋ bastysy, ekologiia taza.
– Bolaşaqta bızdı qandai änıŋızben quantasyz? Josparlaryŋyzben bölısseŋız?
– Men «Qazaq bolsam» dep atalatyn jaŋa än jazdym. Mahabbat taqyrybynda. Eger men qazaq bolsam, atym Paskalbek nemese Paskalbai bolar edı (küldı).
– Äŋgımeŋızge rahmet!
Dinara JAQSYLYQQYZY
