Nūrsūltan Nazarbaevtyŋ bes institusionaldyq reformany jüzege asyruǧa bailanysty ūsynǧan 100 naqty qadamda sot jüiesınıŋ meilınşe ädıl ärı aşyq bolu qajettıgı naqty aitylǧan. Elbasynyŋ osy tapsyrmasyna säikes, Astana qalalyq soty jurnalisterdıŋ basyn qosyp, döŋgelek üstel jiynyn ötkızdı.
Erkın pıkır almasuǧa qūrylǧan şaraǧa Astana qalalyq sotynyŋ sudiasy Taisiia Mirzoian, Astana qalalyq sotynyŋ Keŋsesı basşysynyŋ orynbasary Aibol İbragimov, Astana qalalyq soty jäne olarǧa teŋestırılgen sottar töraǧalary jäne Bas redaktorlar klubynyŋ müşesı, «Adam jäne zaŋ» respublikalyq gazetınıŋ bas redaktory Marat Başimov qatysty.
Jiynda söz söilegen Astana qalalyq sotynyŋ sudiasy Taisiia Mirzoian qazırgı taŋda sot jüiesınıŋ jūmysyn jetıldıru maqsatynda köptegen zamanaui täsılder engızılıp jatqanyn atap öttı. Būl tehnologiialar sot ısterın qarau merzımın qysqartyp, jūmystaǧy jükteme men syn-eskertpelerdı azaituǧa septıgın tigızgen körınedı. Bügınde barlyq sot mäjılısı ötetın zaldardyŋ barlyǧy beinebaqylau qūrylǧylarymen qamtamasyz etılgen. Qalalyq sottaǧy jiyn-seminarlardy, är toqsandy, jyldyqty qorytyndylauǧa arnalǧan basqosulardyŋ bärın audandyq sottar onlain rejimınde körıp, oi-pıkır almasa alady.
–Sot mäjılısıne jurnalister de qoǧamdyq baqylauşy retınde qatysuǧa bolady. Ärine, keiber sot ısterın qarau jabyq jaǧdaida ötedı. Zaŋ şeŋberındegı būl jaǧdaiǧa baǧynbauǧa bızdıŋ de qūqymyz joq. Bız sot töreldıgın ıske asyru mäselesınde aqparattyq-qūqyqtyq tärtıptı saqtap, halyqtyŋ müddesın qorǧauǧa tiıspız. Al osy mäselede audio, video qūrylǧylardyŋ qoldanyluy halyqtyŋ sot jüiesıne degen senımdılıgın arttyra tüsetını sözsız, – dedı ol.
«Adam jäne zaŋ» gazetınıŋ bas redaktory Marat Başimov jurnalister sottardyŋ qyzmetıne qoǧamdyq baqylau jürgızu arqyly qūqyqtyq demokratiiany damytuǧa yqpal ete alatynyn aitty. «Sot jüiesı barynşa ädıl ärı aşyq boluǧa ūmtylu kerek. Al jurnalister sot talqylauyna qatysyp, olardyŋ jūmystary turaly sauatty materialdar ūdaiy jariialap tūrsa deimız» deidı Marat Başimov.
Jiynnyŋ soŋynda aqparat qūraldarynyŋ ökılderı men sot bilıgı özara yntymaqtasa jūmys ısteu, maqalalar, teleradiohabarlar äzırleu turaly ūsynymdar äzırlep, seminar-treningter ūiymdastyruǧa uaǧdalasty.
Qymbat TOQTAMŪRAT
