Qazaqstan Respublikasynyŋ Sport jäne dene şynyqtyru ısterı jönındegı agenttıgı 8-9 mamyr künderı «Astana Arena» stadionynda şaǧyn futboldan BAQ arasynda körnektı qalamger ärı qoǧam qairatkerı Seidahmet Berdıqūlovty eske tüsıruge arnalǧan dästürlı respublikalyq turnir ötkızedı. Aituly jarysqa Qazaqstandaǧy barlyq ortalyq jäne aimaqtyq BAQ komandalary şaqyrylyp otyr.
Seidahmet Berdıqūlovtyŋ (1933-1994) şyǧarmaşylyqqa toly ömırı beibıtşılık elşısıne balanǧan ızgılıktı sala – sportqa arbalyp öttı. Qazaqstan sport jurnalistikasynyŋ negızın qalaǧan ūly metrdıŋ şyǧarmalary otandyq publisistikanyŋ üzdık tuyndylaryna ainaldy.
Seidahmet aǧa özınıŋ «sporttyq jazbalaryn» ötken ǧasyrdyŋ 50-60-ynşy jyldary «Leninşıl jas» gazetınde bastady. Qatardaǧy sport şoluşysy bolǧan talantty qalamger keiınnen ūzaq jyldar osy basylymnyŋ bas redaktory bolyp jemıstı eŋbek ettı. Sondai-aq, «Jalyn» baspasy men «Qazaqstan pionerı» gazetınde basşy bolyp, jastar men balalar ädebietınıŋ örkendeuıne özındık ülesın qosty.
Seidahmet Berdıqūlov sport siqyryna erekşe arbalǧan qalamger bolǧany – aqiqat. Äsırese, qazaq sportşylarynyŋ jetıstıkterın erekşe ekpınmen jazatyn edı. Sol arqyly san myŋdaǧan oqyrmannyŋ jüregınde namys otyn mazdatyp, san myŋdaǧan balanyŋ kökeiınde arman alauyn jaqty.
San qyrly sporttyŋ syryn ūqqan saiypqyran qalamger üşın futboldyŋ orny bölek edı. Ol futboldyŋ naǧyz janküierı boldy. Sol sportqa degen adaldyǧy men futbolǧa degen süiıspenşılıgı arqasynda KSRO sport jurnalisterı delegasiiasy sapynda ekı bırdei älem chempionatyna qatysty. 1966 jyly Angliiada jäne 1970 jyly Meksikada ötken älem bırınşılıkterı turaly jazǧan köptegen maqalalary, ocherkterı jäne kıtaptary qalyŋ oqyrmannyŋ oljasyna ainaldy.
1994 jyldan berı elımızde üzdık sport jurnalisterıne Seidahmet Berdıqūl atyndaǧy syilyq berılıp keledı. Körnektı sport qalamgerı atyndaǧy syilyqty är jyldarda bügınde esımı elge tanymal jurnalister – Nesıp Jünısbai, Qydyrbek Rysbekūly, Ǧalym Süleimen, Iýrii Lifinsev, Dias Ahmetşärıp, Rabat Jänıbek, Teljan Küderov, Galina Polevaia, Valerii İlin, Dastan Kenjalin, Pavel Sybulin, Mädi Manatbek, Töleubek Qadyrmolda jäne basqalary ie boldy.
Sonymen 8-9 mamyr künderı elımızdıŋ eŋ basty futbol alaŋy – «Astana Arena» stadionynda jurnalister qauymy saiysqa tüsedı. Oiyndar saǧat 10.00-de bastalady.
Ǧalym QOJABEKOV,
S. Berdıqūlov atyndaǧy syilyqtyŋ laureaty
