Keşe Astana qalasy Turizm, dene tärbiesı jäne sport basqarmasy 26 säuır künı ötetın QR Prezidenttık sailauyn nasihattau maqsatynda sport ardagerlerı men QR Prezidenttıgıne kandidat Nūrsūltan Nazarbaevtyŋ senımdı ökılderınıŋ kezdesuın ūiymdastyrdy.
– Elordadaǧy sportşylar qauymy sailaudy nasihattau jäne ūiymdastyru jūmystaryn qyzu qolǧa aldy. Bızdıŋ basqarmaǧa 7 sailau uchaskesı bekıtılgen. Sol uchaskeler ornalasqan ǧimarattardy jöndeu men olarǧa keletın joldardy tazalaudy mındetımızge aldyq. Būdan basqa arnaiy tehnika men jihazdy äkele bastadyq. Dauys beruge arnalǧan jäşıkterdı daiyndap, sailauǧa qatysty basqa da jūmystardy atqarudamyz. Maqsatymyz – sailau künın halyq ūmytpastai merekege ainaldyru. Būl künı sailauşylar şattanyp, mereilense, elımızdegı bırlık pen tatulyq atmosferasyn sezınse eken» deidı basqarma basşysy Berık Marjyqpaev.
Onyŋ aituynşa, basqarma dauysqa bırınşı bolyp keletın adamdarǧa syilyqtar daiyndap otyr. Olardyŋ qatarynda sporttyq kiımmen bırge sporttyq nysandardy tegın paidalanuǧa mümkındık beretın ailyq abonementter bar. Atap aitsaq, abonementke ie bolǧandar «Qazaqstan» sport saraiynyŋ basseinı men «Alau» mūz saraiyna kıre alady. Sailauşylardy quantatyn basqa da syilyqtar jetıp artylatyn körınedı.
Sonymen qatar sailaudy nasihattau maqsatynda basqarma 12 säuır künı qala äkımdıgınıŋ aldyndaǧy alaŋda jügıruden jarys ūiymdastyryp, sonyŋ barysynda aspanǧa äue şarlaryn ūşyrǧaly otyr. Şarlar bolaşaqqa degen senımnıŋ simvoly bolmaq. Jügıruge Serık Säpiev, Dinara Säduaqasova, Marina Volnova, Iliias Süleimenov syndy belgılı sportşylar qatyspaq. Sondai-aq, qoǧam qairatkerlerı men Parlament Mäjılısınıŋ deputattary söz söilemek.
Halyq belgılı sportşylarmen sailau ötetın künı de jüzdese alady. Kez kelgen adam olarmen suretke tüsıp, qoltaŋba alu mümkındıgıne ie bolady.
Amanǧali ŞMİTŪLY
