Aldaǧy küzde körermen qauymmen jüz on ekınşı ret jüzdesetın M. Gorkii atyndaǧy akademiialyq orys drama teatry osy künı qazaqy qoiylymdarmen baiyp, ırılenıp häm türlenıp keledı.
Qūlandy qypşaq dalasynan qūba qypşaqtyŋ qalasyna barǧan «Beibarys sūltan»
Elordalyq osy teatr öz elımızde ǧana emes, şet elderde de keŋ tanymal. Peterbordaǧy teatr baiqauynda bırneşe ret jülde alyp qaitty. Qytai, Ūlybritaniia, İtaliia, Oŋtüstık Koreia, Polşa men Reseidegı baiqaularǧa Qazaqstan atynan qatysty. Ötken jyly küzde Daǧystan astanasy Maqaşqalada Qara teŋız ben Kaspii aimaǧy jäne Soltüstık Kavkaz elderı drama teatrlarynyŋ festivalı öttı. Oǧan bızden basqa Reseidıŋ on ekı teatry häm İzrail men Germaniia keldı. Sol jolǧy Halyqaralyq III festivalde özımızdıŋ orys teatrymyz M.Bulgakovtyŋ «Master i Margaritasyna» qol soqtyryp, «Astana – kosmos!» degen qoşemet arqalap qaitqan. Būǧan deiın Bertold Brehtyŋ «Krah tretego reiha» spektaklı «Älemdık klassikalyq tuyndylardy meŋgergenı üşın» atalymy boiynşa jülde aldy.
Tarazdaǧy teatr dodasynda «Ūlttyq dramaturgiiany igergenı üşın» Älımbek Orazbekovtıŋ «Odinokaia iablonia» jäne Rahymjan Otarbaevtyŋ «Sultan Beibars» pesasynyŋ 
qoiylymy joǧary baǧalandy.
Anau jyldary mädeniet janaşyrlary «orys teatrlary qazaq taqyrypty dünielerdı nege qolǧa almaidy?» degen mäsele kötergen. Būlar äuelde jüre tyŋdady ma, älde jüreksındı me, ä degende ılıp äkete qoimaǧan. Degenmen, köp küttırgen joq, Almaty men Astana köş bastady. Elordalyq eŋ köne teatr 2009 jyly nau ryz aiynda qalamger Rahymjan Otarbaevtyŋ «Beibarys sūltan» pesasyn sahnalady. Ötken küzde, 111-mausymnyŋ şymyldyǧyn osy qoiylymmen aşty. Būl spektakl Astana mädenietınıŋ qazynasyn eselep, orystıldı körermennıŋ bır tynysyn keŋeittı. Al, özderıne Europaǧa jaŋa, jarqyn jol saldy. Qazaqstan täuelsızdıgınıŋ 20 jyldyǧy qarsaŋynda Vengriiaǧa öner saparymen bardy. Qūlandy qypşaqtyŋ dalasynan qūba qypşaqtyŋ qalasynda türkı tektı deştı qypşaq qandasy, Jaiyqta tuǧan Jamaq balasy, qūldan sūltan şyǧyp, alystaǧy arab elınde taq iesı därejesıne jetken äl-Mälık az-Zäkır Ruh-ad-din Beibarys äl- Bundukdari äl-Salihli turaly aŋyz jelıstı aqiqatty aityp qaitty. Spektakl qaraşanyŋ 15-ı künı Solnok qalasyndaǧy Aba Novak mädeni ortalyǧynyŋ sahnasynda qoiyldy. «Qanyna tartpaǧannyŋ qary synsyn», spektakldı eldıŋ tükpır-tükpırınen jetken qūba qypşaqtar, Memlekettık hatşy Mihai Varga men Mädeniet ministrı Geza Soch bastaǧan resmi ökılder de kelıp, tamaşalady. Vengriiada oqityn qazaq jastarymen iyqtasyp, ırgedegı elderge köşıp ketken qazaqstandyqtar da otyrdy.
Teatrdyŋ būl sapary «qanǧa sıŋgen» qaşanǧy gastrol emes-tı! Deştı qypşaqtyŋ bırı Ūrymda, bırı Qyrymda ǧūmyr keşken ūldarynyŋ bır tūiaǧy Arabtyŋ elın basqarǧany haqynda Vengriiadaǧy qandastarǧa sahna tılımen tanytudy maqsat ettı. Onyŋ tarihi mänıne den qoiǧan Astana qalasy äkımdıgınıŋ yqpaly erekşe. Sondai-aq, Qazaqstan Respublikasynyŋ Vengriiadaǧy Elşısı Raşit İbraev pen Qazaqstandaǧy Vengriia Elşısı İmre Lasloski zor qoldau jasady.
Spektakldıŋ mätının vengr tılıne Elşınıŋ jūbaiy Valentina Lasloskaia audaryp, qypşaq balalaryn baurap, bauyrlastyrdy. Oiyn, ärine, orysşa öttı. Al, eger qazaqşa qoiylsa, tılmäşsyz-aq tüsıngendei edı. Öitkenı, köneden könermei kele jatqan bes jüz sözdıŋ qazaq pen vengr tılındegı aityluy da, maǧynasy da joiylmaǧan.
Ekı jūrtta da ejelgı qypşaq dästürınıŋ nyşany älı bar. Iаs-Nadkun-Solnok oblystyq Assambleiasynyŋ töraǧasy Şandor Kovachtyŋ qazaqşasy mültıksız.
Vengrlerdıŋ qazaqşa söileuı osy künde taŋ emes. Būdan qyryq alty jyl būryn, 1965 jyly Torǧaiǧa qazaq pen vengrdıŋ tür-sipatyn zerdeleuge kelgen antropolog Tibor Tot tuystan keiın at şaldyrǧandardyŋ qarasy az emes. Araǧa bır müşel salyp, 1977 jyly elımızge qazaq, qyrǧyz jäne tatar tılderın taza meŋgergen İştvan Qoŋyr Mandoki keldı. Ol özı būrynǧy qūman (qypşaq) tılın tırıltuge köp eŋbektendı. Aitpaqşy, tarihşylar Beibarys babamyzdyŋ susyndy qazaqy tostaǧanmen ışıp, ömır boiy tek qypşaq tılınde söilep ötkenın aitady. Al, 1970 jyldardyŋ soŋynda Başqūrt Memlekettık universitetınıŋ aspiranturasyn tauysqan türkıtanuşy Iojef Torma qazaq tılın öte jetık igergen. Qazaqstanǧa alǧaşqy Elşı bolyp kelgen ol «Ana tılı» gazetıne Jüsıp Torma dep qol qoiyp, qazaqşa ǧylymi maqala jazyp tūrdy. Künı keşe, 2003 jyldyŋ küzınde qūba qypşaqtyŋ jäne bır balasy Benko Mihai folklorlyq jäne lingvistikalyq derekterdı saraptai kele, öz memleketınıŋ Hungariia dep ataluy «Ǧūn» degen sözden şyqqan degen tūjyrymǧa kelgen. Däuıt Qara, tıptı, kömeimen jyr tögedı. Mıne, qypşaq tektılerdıŋ bır tūiaǧy osyndai. Arǧy-bergı zamanǧy qypşaqtyŋ ruhyn, qypşaqtyŋ daŋqyn moiyndaǧan akterlar spektakldıŋ soŋynda Kök Tudy jelbıretıp «Menıŋ Qazaqstanymdy» şyrqady. Änūrandy tık tūryp bır kısıdei qol soǧyp tyŋdaǧan körermennıŋ şarasyna şyq tūndy. Qarsaq qalasyna barǧanda mūrajaiǧa şaŋyraq pen ūlttyq kiımderdı tartu ettı. Budapeştı aralap, özı Almatyda, «Keŋsaida» jatqan Qoŋyr Mandokidıŋ eskertkışıne gül qoidy. Qarsaqtyŋ merı Şandor Fazekaş akterlarǧa Qazaqstannyŋ täuelsızdıgın 1991 jylǧy jeltoqsannyŋ 21-ınde tanyǧan Vengriiaǧa qypşaq ruhyn qondyryp ketkenı üşın alǧys aityp, özınıŋ de bır babasy Beibarystyŋ daŋqyna bas idı.
«Kökelegen» dausy kökke jettı, özı tabandylyǧymen taqqa jettı
Beibarys sūltan jaiynda täuelsızdıkten keiın ǧana şym-şymdap tani bastadyq. Qarapaiym qalyŋ eldı qoiǧanda, qaǧaz-qalam, jazu-syzu tanymynyŋ töŋıregınde jürgenderdıŋ denı dendep bılgen joq. Gerold Belger ötken ǧasyrdyŋ 70-jyldaryna deiın Beibarys turasynan beihabar bolǧanyn aitady. «Moris Simaşkonyŋ «Emşan» povesın oqyp, qatty taŋǧaldym. Jusan isı aŋqyǧan osy şyǧarmadan keiın «Sūltan Beibarys» filmı şyqty. Keiınırek, 2003 jyly Beket Qaraşinnıŋ «Beibarys: däuır jäne tūlǧa» dep atalatyn zertteuı qolyma tüstı. Sonsoŋ «Kazahstanskaia pravda» gazetınde Mūhtar Qūl-Mūhammedtıŋ «Sūltan Beibarys» degen, etektei, tanymdyq maqalasy jaryq kördı» dep eske alady.
Al, būl kezde Beibarys sūltan turaly arab älemınıŋ tört qūbylasy tügel habardar-dy. Siriiada Sūltan Beibarys turaly tarihi telehikaia tüsırılgen. Ol bırneşe tılderge audarylyp, taraldy. Äl-Mälık az-Zäkır Ruh- ad-din Beibarys äl-Bundukdari äl-Salihli Sūltan Siriia men Mysyr elderınıŋ tarihi tūlǧasy retınde qarastyrylǧan kıtaptar älı de jazylyp, jaryqqa şyǧyp jatyr. Arabtar men halifattar tarihynyŋ bılgırı İ. M. Filştinskii Beibarystyŋ äuelı Siriiadaǧy äskeri mektepte oqyǧannan keiın, mämlük jasaqtaryna jazylǧanyn, äl-Mansur degen jerde bolǧan alǧaşqy şaiqasta-aq ol erlıgımen közge tüskenın hatqa jazyp ketken.
…Arab elınde sonau 1271 jyldan bastap islamnyŋ sopylyq baǧytqa köşuıne bailanysty, äskerge türıktıŋ ūldary ırıktelınıp alyna bastady. Solardyŋ bıregeiı Beibarys 1250 jyly qaŋtar aiynda Äl-Mansur qalasy tübınde fransuz korolı-krestşı IX Liudovikke qarsy şaiqasta mämlük äskerın basqardy. Aiubi äuletınen şyqqan sūltandardyŋ ülken-ülken üş qalasyn tartyp alyp, olardy Siriia jerıne qiia bastyrtpaǧan, osy küngı güldengen arab düniesınıŋ bır bastauynda Beibarys tūrǧan. Sol uaqytta krestşıler men moŋǧoldardy jeŋgenı üşın aitylǧan «Beibarys sūltan» äŋgımesı arab auyz ädebietınıŋ jauharyna ainalǧan. Egipet tarihynda islam zaŋyna säikes tört satydan tūratyn qazylar soty tūŋǧyş ret bekıdı.
Mysyrda tarihi ädebiet damyp, Altyn Ordamen bailanys jolǧa qoiyldy. Türkı halyqtarynyŋ tarihi-geografiialyq mälımetterın tolyq tüzgen ensiklopediialar paida boldy. Beibarystyŋ ömır- deregıne arnap jazǧan hatşysy Abd-az-Zahirdıŋ tarihi eŋbegı düniege keldı. Beibarys sūltan Arab älemın bilegen tūsta arabtardyŋ saiasi-mädeni jüiesı, äskeri strategiialyq soǧys qimyly, önerı erekşe damydy. Mysyrdyŋ türkı tektı qypşaq sūltany el yrysy üşın egın şaruaşylyǧyn örkendetıp, sulandyru jüielerıne deiın qalpyna keltırttı. Qypşaq tektı köptegen äskerbasylarǧa Siriia men Egipetten jer bölıp berılgen. Äl-İskandariia iaǧni Aleksandriia, Damietta, Äl-Qahira sekıldı qalalary ırı-ırı sauda ortalyǧyna ainalyp, Venesiia Sisiliia, Genuia, İndiia, Orta Aziianyŋ sauda keruenderı men kemelerı kelıp tūrdy.
Beibarystyŋ esımı 786—809 jyldary ömır sürgen halifa harun ar-Raşid sekıldı aŋyzǧa ainaldy. Beibarys jaily riuaiattarda onyŋ būqara üşın jasaǧan qaiyrymdylyǧy men qarapaiymdylyǧy jyr etılgen.
Arab halqy şyǧarǧan Beibarys jaily aŋyzdar, qissa, äŋgımeler öte köp. Beibaryspen tūstas qypşaq batyrynyŋ hatşysy ärı onyŋ ǧūmyrnamasyn jazǧan Muhii ad-Din ibn Äbd az-Zahir, keiın 1362—1442 jyldary ǧūmyr keşken tarihşy-şejıreşıler äl-Maqrizi men odan köş keiın, 1409—1470 jyldary jasaǧan İbn Tagriberdiler mol maǧlūmat qaldyrǧan. Köp jyl Egipette ömır sürgen aǧylşyn şyǧystanuşysy E.U. Lein «Kair kalasynda otyzǧa juyq qissaşylar bar desedı. Olardyŋ bärı de tek «az-Zahirdıŋ» («Sirat az-Zahir» nemese «as-Sira az-Zahiriia») ǧūmyrnamasy atty şyǧarmany jatqa aitady» dep ketken. Egipettıŋ osy zamanǧy, 1889 jyly tuyp, 1975 jylǧa deiın kelgen tamaşa ǧalymy, klassik jazuşysy Taha Hussein «Aiiam» («Künder») dep atalatyn ömırbaiandyq jazbalarynda bala kezınde özınıŋ eŋ köp estıgenı Bei- barys batyr jaily riuaiattar edı dep eske alady.
Beibarys zamanynda ömır sürgen tarihşy Vilgelm Taipolskii de oǧan: «Beibarys— jauyngerlıgı jaǧynan Gai Iýlii Sezarmen terezesı teŋ tūratyn qaharman» dep baǧalaǧan. Osylardyŋ bır nūsqasyn şyǧystanuşy V. N. Kirpichenko arab tılınen orysşaǧa tärjımalap, 1975 jyly Mäskeude basyp şyǧarǧan.
Solaişa, alasapyran HII ǧasyrda esın bıler-bılmes, eleŋ-alaŋ şaǧynda Jaiyq jaǧasynan moŋǧol şapqynşylary «kökelegen» da- usyn kökke jetkıze şyrqyratyp alyp ketken bala öse kele, Egi- pet pen Siriia sūltandarynyŋ ışınde eŋ ataqtysy, eŋ syilysy boldy. İä, «jaqsy – ai men kündei, älemge bırdei» ekenı ras. Degenmen, Egipettı 1260 pen 1277 jyldar aralyǧynda 17 jyl bilep, Mämlük memleketınıŋ törtınşı sūltany bolǧan bahadür baba turaly aityp, nasihattaudyŋ şegıne jetken joqpyz. Maqala, monografiia sipatty zertteuler ǧylym älemı üşın asa qūndy. Degenmen, būqaranyŋ baǧytūstary retınde tanyp, arqatūtar tūlǧa turaly būqaralyq nasihat şaralary kemdeu. «Beibarys sūltan» filmınıŋ qataryna sahnadaǧy «syŋary» tudy. Jazuşy Rahymjan Otarbaevtyŋ orys teatry qoiyp jatqan pesasy – «arab aspan bolǧanda, qypşaq – jūldyz» ǧana syndy spektakl…
Altyn taqqa, ataq-daŋqqa aiyrbastamas bır tüp jusan…
Mysyrda mädeniet pen säulet önerın damytuǧa erekşe män bergen Beibarys meşıt-medreselerdı saldyrǧanda qazaqy oiu-örnekterdı aralastyryp, arab mädeni älemınde tosyn da, airyqşa säulet önerınıŋ negızın qalaǧan. Onyŋ aldyndaǧy Salahaddin tūsyndaǧy, odan keiıngı Aiaidter tūsynda säulet önerınde mūndai sipat mülde basqa bolǧan. Sonyŋ bırı – Mysyrdyŋ astanasy Kairdaǧy 700 jyldan berı kele jatqan Sūltan Äz-Zahir Beibarys meşıtı. 2005 jyly elımız osy meşıttı jaŋǧyrtudy qolǧa alǧany – qiyrdaǧy Kairdaǧy baba mūrasyn saqtauǧa niet qoiǧany. Meşıttıŋ märmärdan jasalǧan 180 baǧanasy, imam-şeihtardyŋ jeke-jeke oty- ratyn bölmesı men türlı mınäjat bölmelerı bar.
Al, Siriia astanasy Damask qalasynda saldyrǧan ülken medresesı de qazır halyqqa jaqsy tanys. Tarihi keşende därıshana, kıtaphana, mūraǧat pen Beibarys sūltan jäne onyŋ ūlynyŋ qabırhanasy ornalasqan. Tarihşy ǧalymdar keşennıŋ ışınde ornalasqan kıtaphanada kezınde 205 myŋǧa deiın kıtap qory bolǧanyn alǧa tartuda. Onda Platon men Aristoteldıŋ kıtaptarynan bastap, arab ǧalymdarynyŋ kıtaptary bolǧan. Mūndai kıtaphana sol kezde örkeniettıŋ şyŋyna şyqqan memleketterde bolmaǧany anyq. Beibarys sūltan bilık qūrǧan tūsta naqyştardy saqtauǧa basa män berıldı. Säulet önerınde kün jäne tün degen maǧynany bıldıretın aq jäne qara jolaq Beibarys sūltan bilık qūrǧanda arab elderıne keŋınen tarady. Sondai-aq, tarihi- mädeni keşennıŋ esıkterı altynmen aptalyp, syrtyna qazaqtyŋ qymyz ışetın tostaǧany men barys bei- nelengen.
Egipet sūltany bolyp jariialanǧan kezde äl-Mälık äz-Zahir Ruki-äd-Dünie vä-d-Din Beibarys äl-Bundukdari äl-Salihi degen esımmen taqqa otyrady.
Spektaklde Täŋırberdı degen atpen qauyrsyn qalam ūstaǧan şejıre tüzuşı Beibarysqa taqqa otyrǧanyn mälım etıp, esımıne qūrmet belgısı retınde qosymşa jalǧanatyn, arab älemıne sai Äl-Mälık az-Zäkır Ruh-ad-din Bei- barys äl-Bundukdari äl-Salihi qūrmettı esımın estıgende: «Mynau bır būidaǧa tızılgen keruendegı ırkes-tırkes tüielerdei eken. Būdan görı menıŋ anam aitatyn jalǧyz ǧana «Beibarys» degen atyma ne jetedı» degen tolqynysy söz oinatudyŋ şeberı Rahymjannyŋ öz kökeiınen qainap şyqqanyn tanisyŋ. «Beibarystyŋ Beibarys ekenı ras bolsa, şaǧalaly Jaiyqty saǧynǧan Jamaq balasy qanyna tartyp, şamyrqanǧanda däl osylai aitqan-aq şyǧar» degenge süiegen bolar. Osy arada anasynyŋ aruaǧy alystaǧy arab jerıne jetıp elden, jerden şalǧai ketken jetımegımen tıldesedı. Būl – kındıgı tuǧan elınen qyl elı ajyramaǧanyn tanytady.
Şaŋyraq, uyq, keregenıŋ qadırın ūldary Said pen Ahmettıŋ, jary Täj-Baqytqa tanytqany – jazuşynyŋ aŋyzdy aqiqatqa süiep aitqysy kelgen Beibarystyŋ ışkı saǧynyşy.
Osy spektakldıŋ jūmyr tüzılgenın sahnalyq körınısterdıŋ jinaqylyǧynan tanisyŋ. Beibarystyŋ arab älemıne jasaǧan igılıkterınıŋ bärın Täŋırberdınıŋ tızıp, tüzıp otyrǧany jalqy sözden körınedı. Sondai-aq, Beibarystyŋ jolyna köldeneŋ qoiylǧan körealmauşylyqty da jalt etken körınıster jaqsy aiqyndaidy.
…Arab elıne aiqassyz berılu turaly sälemdı alyp kelgen Moŋǧol elşısınıŋ bırınen sonau zamanda özın ūrlap ketken şapqynşyny tanidy. Arab älemı üşın mämlükterden artyp eşkım eŋbek sıŋırmegenın osy spektakldı kökıregı säulelı körermen kökeiıne toqyp ülgerdı.
Al, Beibarys osynşama ataq-daŋq pen asa zor bilık äleuetıne ie bola otyrsa da, onyŋ jüregın syzdatqan qypşaq dalasy esınen bır sätke şyqqan emes. Ol sūltandyq bilıkke qol jetkızgen kezde qypşaq jerlerı moŋǧol hany Berke Qūlaǧu bilep otyrǧan Altyn Ordanyŋ ielıgınde edı. Beibarys olarǧa äuelı dostyq niettı hat jıberdı. Būl 1262 jyl edı. R. Otarbaevtyŋ psasynda däl osy körınıs airyqşa nazarǧa tar- tylady. Hatşysyna hat jazdyrtqan Beibarystyŋ ışı saǧynyştan ala- ulap jusan, qymyz, qos būrymdy, qaraqat köz qyzdar, qaiyŋnyŋ
bezındei, emendei berık jıgıtter men bolat tūiaqty jylqylardy aŋsaǧany anyq-aq qoi. Hatqa qosyp sardalaǧa sartap saǧynyşyn joldaidy, Saǧynyşy – bır tüp jusan edı… Elşısın attandyrady. Būl kezde özı Mysyrdy «myŋ bır tün ertegısındei» güldendırıp jatqan kezı edı. «Jan tartpasa da, qan tartqanynyŋ» belgısı, Berkeden jauap kelgende airyqşa eleŋdegenı osydan-dür…
Altyn Orda Elşısın özı qabyldap, sūratqanyn sūraidy. On ekı tüiege artqan asyl tastar, at basy altyn men taitūiaq altyn, gauhar, ınju, aqyq, meruerttıŋ bırde-bırı qajet emes. Olardyŋ myŋ pūty bır tüp jusanǧa jetpeidı…
Ekaterinburgtıŋ Memlekettık teatr institutynyŋ tülegı Denis Annikov basty roldıŋ baǧyn da, babyn da tabuǧa tyrysqan. Jat elde jan teŋgermei sūltan bolǧan, taqta otyryp dalasyn aŋsaǧan, at basy altynǧa emes, bır tüp jusanǧa dılgır bolǧan Beibarystyŋ ışı-bauyryn syzdatqan sartap saǧynyşty tolǧap-tolǧap, jusan iıskep, şer tarqatqan sätı oinap jürgen emes, şyndap jürgenın köresıŋ…
Osy tuyndynyŋ avtory qabyrǧaly qalamger Rahymjan Otarbaevtyŋ «Şer», «Jūldyzdar qūlaǧan jer», «Jaiyq jyry», «Qaraşa qazdar qaitqanda», «Dauysyŋdy estıdım», «Otverjennyi mir» atty prozalyq jinaqtary şyqqan. Respublikalyq jäne şetel teatrlarynda sahnalanǧan «Beibarys sūltan», «Bas», «Naşaqor jaily novella», «Nūrjauǧan- ǧūmyr», «Syrym batyr», «Mūstafa Şoqai» syndy pesalary qoiylyp jür.
Sonyŋ ışınde M. Gorkii atyndaǧy orys drama teatry qoiǧan «Sūltan Beibarys» spektaklın Astana qalalyq Mädeniet basqarmasy Ädebiet jäne öner salasyndaǧy Qazaqstan Respublikasynyŋ 2012 jylǧy Memlekettık syilyǧyna Muzyka, teatr jäne kino seksiiasy boiynşa ūsyndy. Şyǧarmany sahnalaǧan avtorlyq ūjym Erkın Qasenov, Qanat Maqsūtov, Denis Annikov, Vladimir İvanenko syndy azamattardyŋ eŋbegı airyqşa. Ärine, talai jylǧy teatrdyŋ orny ärdaiym özgeşe. Degenmen, olardyŋ teatr önerındegı eŋbegın resmi türde tanyp, baǧalau degen söz. Selinograd, Aqmola kezınen berı sahnasy suyp körmegen käsıpqoi teatr akademiialyq deŋgeiıne Astana tūsynda, Qazaqstannyŋ täuelsızdıgınıŋ 20 jyldyǧy tūsynda qol jetkızdı. Oǧan orys teatry repertuarynyŋ tek orys jäne älemdık klassika ǧana emes, soŋǧy kezde ūlttyq taqyryptaǧy tuyndylardy igere bastaǧany aitarlyqtai yqpal ettı. Teatrdyŋ būlaişa türlenuıne teatrdyŋ direktory häm körkemdık jetekşısı Erkın Qasenov dem berdı. Talailaǧan teatr dodasynda jülde alyp kelgen spektaklderdıŋ rejisserı Qanat Maqsūtovtyŋ şeberlıgı osy joly aiqyn tanyldy. Ol spektakldıŋ tarihi sipatyn aşuda köp eŋbektendı.
Aitpaqşy, būl spektakl osy künge deiın qosymşa rolderde oinap kelgen Denis Annikovtyŋ baǧyn aşty. Oǧan Beibarysty senıp tapsyrdy. Keiıpkerdıŋ san qyryn sanauly uaqyt ışıne syiǧyzyp alyp şyqty. Köpşılık riza. Al, alpys jyl boiy «attan tüspei» kele jatqan teatrdyŋ abyzy Vladimir İvanenko Huannyŋ beinesın asqan şeberlıkpen, köp jylǧy täjıribenıŋ qyrymen de, jüzımen de oinap jürıp, körermennıŋ köz aldynda qaldy.
Toqsan auyz sözdı tüiıp aitqanda, sahnanyŋ barysyna ainalyp kele jatqan «Sūltan Beibarystyŋ» baby da, baǧyty da – biıktık!
Rauşan TÖLENQYZY
