Oqyrmannan on sūraq

Sūluşaş NŪRMAǦAMBETOVA: ASTANALYQTARǦA ARNAP KONSERT BEREMIN

DSC_2223

– Repertuaryŋyzda qazaqpen qatar, qyrǧyz, qaraqalpaq, orys, tür­kımen halyqtarynyŋ än­derı bar. Basqa ūlttyŋ änın oryndauǧa nege qūmar boldyŋyz?

Dinara

– Kışkentai kezımde öte pysyq boldym. Taşkentten poşta arqyly Batyr, Luiza Zakirovtardyŋ äntabaqtaryn aldyrtyp, solardyŋ äuenderın üirenetınmın. Bolgariianyŋ Lili İvanova degen estrada jūldyzy bolǧan. Sonyŋ änderın oryndaǧandy jaqsy köretınmın. Olardy qan­şa­lyqty, dūrys aityp jat­qa­nymdy, ärine, bıl­mei­tınmın. Äiteuır, älgı ärtıske özımşe elıktep yŋyldap jüretınmın. Söitıp, sahnaǧa alyp şyqtym.

 

– Bügıngı tırşılıgıŋız jaiynda aityp berseŋız… Şäkırtterıŋız bar ma?

Maqsat

– Bügıngı ömırıme köŋılım tolady. Özımnıŋ süiıktı ısımmen ainalysyp jürgenım üşın taǧdyryma jäne otbasyma rizamyn.

Aituly ıs-şaralarǧa şaqyrylyp tūramyn. Arnaiy oqu ornynda sabaq bermesem de, şäkırtterım bar. Kömek sūrap kelgen talantty jastardyŋ betın qaitarǧan emespın, ünemı aqyl-keŋesımdı aityp otyramyn.

 

Qoǧamda oryn alyp jatqan qan­dai mäselege alaŋ­daulysyz?

Miras

– Adam eseigen soŋ, köŋılşek bop ketedı eken. Tuǧan jerım Narynqolǧa barǧan saiyn ol öŋır­dıŋ jadap-jüdep ket­kenın körıp köŋılım qūlazidy. Osy jerdıŋ jaǧdaiy jaq­sarsa eken deimın.

 

– Keiıngı tolqynnan qai änşını süiıp tyŋdaisyz?

Laura

– Qazırgı änşılerdıŋ köbısı ūnaidy. Bügınde sahnada ızdenımpaz, eŋbekqor änşıler köp. Oǧan qosa, olardyŋ özderın tanytuyna mümkındıgı zor. Bır qyzyǧy, bızdıŋ kezımızde halyqqa tanylu öte qiyn bolatyn. Ol uaqytta televidenie mümkındıgı şekteulı edı. Qazırgı jas änşıler qoryqpai-aq saltanatty sarailarda konsertterın berıp jatady. Soǧan taŋǧalamyn.

 

– Kezınde sız şyrqaǧan «Bala ǧaşyq» änın Mei­rambek Bespaev oryn­dap jür. Qazırgı nūsqa­syna köŋılıŋız tola ma?

Jazira

– Meirambek qai ändı oryn­dasa da, körermenderıne jetkıze bıledı. Üzdıkken ünı janyŋ­dy bauraidy. Halyq ärtısı Nüke­tai Myşbaeva apamyz: «Bızdıŋ Sūluşaş sahnada şoşaŋ­­da­maidy» deuşı edı. Sol siiaqty Meirambek te özın bırqa­lypty ūstaidy. Kışken­taiynan sahnany körıp ösken bala ǧoi.

 

Qazır änşılerdıŋ kompiuterlengen dauys­taryn bır-bırınen ajyrata almaimyz. Sızdıŋ dauysyŋyz nesımen erekşe?

Jamal, qala tūrǧyny

– Maqtanǧanym emes, dauysymnyŋ özgeşelıgı bar. Sol siiaqty Nūrǧali Nüsıpjanov, Maqpal Jünısova, Bibıgül Tölegenova, Roza Rymbaeva syndy sahna saŋlaqtarynyŋ dauystary sazdy, köŋılge qonymdy. Änderın tyŋdasaŋ, kädımgıdei demalyp qalasyŋ.

 

– Kögıldır ekrandaǧy türlı baǧdarlamalarǧa kıleŋ jas änşıler şaqy­rylady. Sonda aǧa buyn ökılderıne ūsynys aitylmai ma?

Oralbek, qala tūrǧyny

– Būl sūraqty bızge emes, televidenie salasyndaǧylarǧa qoiu kerek.  Mäselen, Keŋes Odaǧynan kele jatqan ü­l­kenderdı, myna bızdı qosyp baǧdarlama daiyndasa, keiıngı ūrpaqqa maǧynaly änmen ülken tärbie körsetuge bolady. Äitpese, kompiutermen jazylǧan «süidım, küidım» dep sybyrlap-kübırlep toi deŋgeiınde konsert be­redı. Sahna degen – kielı dünie. Halyqty önerımen taŋ­ǧal­dyratyn talǧamdy, käsıbi deŋgeidı qajet etedı.

 

– Toiǧa şaqyrylyp tūrasyz ba?

Aqan

– İä, toiǧa baryp tūramyn. Halyq ärqaşan ystyq yqy­las­pen qarsy alady.

 

– Astanalyqtarǧa arnap konsert beresız be?

Tamara

– Elordalyqtarǧa arnap, jaŋa jyl qarsaŋynda konsert bermekşımın. Qazır soǧan myqtap daiyndalyp jatyrmyn.

– Astana tūrǧyndaryna tılegıŋız…

– Körermenderımız bai, baquatty tırlık keşse, beibıt­şılık baiandy bolsa deimın!

 

Erkejan SÄTIMBEK

 

Taǧyda

admin

«Astana aqşamy» gazetı

Ūqsas jaŋalyqtar

Pıkır üsteu

Back to top button