30 qaraşada «Qazaqstan» ortalyq konsert zalynda Tūŋǧyş Prezident künıne orai «Qanatty ömır belesınde» atty merekelık konsert öttı.
Keş baǧdarlamasy arqyly körermender el Prezidentınıŋ resmi qyzmetınen bölek, jan-düniesıne tereŋırek üŋıluge mümkındık aldy. Jürgızuşılık tızgınınde bolǧan Azamat Şarǧynov pen Läilä Sūltanqyzy Elbasy atyna kelıp tüsken tolassyz syrly hattarǧa toqtalyp qana qoimai, olarǧa jauap qatqan prezident qoljazbalaryn da oqydy. Mäselen, osydan 11 jyl būryn Elbasy «Eltūtqa» poemasyn oqyǧan soŋ, öz qolymen aqyn Tūrsynhan Äbdırahmanovqa: «Şynymdy aitsam, madaq pen teŋeulerge qarsymyn. Men – qazaqtyŋ bırımın. Taǧdyr men halqym qiyn–qystau kezeŋde osyndai jauapty ıstı maǧan tapsyrdy. Sol tapsyrmany adal oryndap, halyqtyŋ oiynan şyqsam – armanym sol. Ärine, būl qyzmet oŋai emes. Kündız küldırmeidı, tünde ūiyqtatpaidy. Barlyq şeşım maǧan kelıp tıreledı. Bar auyrlyq ta, jalǧyzdyq ta, mıne, osynda…» dep aǧynan jarylypty. Al, 2003 jyly belgılı maidanger jazuşy Äzılhan Nūrşaiyqov Elbasyna alǧys hat jazyp, özınıŋ qaita jaryq körgen «Mahabbat, qyzyq mol jyldar» romany men «Halima» hikaiatyn qosa salyp jıberedı. Qalamgerge jıbergen jauap hattaǧy myna bır joldar konsertke kelgenderdıŋ kıtapqa degen qyzyǧuşylyǧyn tudyrǧany anyq:
«…Qūrmettı Äzeke!
…Bırınşı bolǧan kezdesude «Mahabbat, qyzyq mol jyldardy», «Halimany» syiǧa tarttyŋyz. Bırınşısın būryn oqyp edım, ekınşısın qolyma alǧan boida bas kötermei oqyp şyqtym. Tälım-taǧylymy mol, keremet şyǧarma eken. Däl qazırgı zamanda jastar köbırek oqityn hikaia».
Kündelıktı qauyrt jūmyspen jürse de, kışıpeiıldıgı men qarapaiymdylyǧynan tanbaǧan Nūrsūltan Nazarbaev hattardyŋ bärın oqyp, nazarynda ūstaityny belgılı boldy.
Sondai-aq, zaldaǧy jūrtşylyq «Magic of nomads» etno-folklorlyq tobynyŋ oryndauyndaǧy «Elbasynyŋ süiıktı änder jinaǧyn» tyŋdady. Prezident süisıne tyŋdaityn halyq änderınıŋ bırı – «Daididaudy» şyrqaǧan Dimaş Qūdaibergenovtıŋ dauysyna täntı boldy. Sonymen bırge, osy keşte Roza Rymbaeva, Ardaq Balajanova, Dosymjan Taŋatarov, Almas Kışkenbaev, Qairat Baekenov jäne «Format» toby syndy bırqatar estrada jūldyzdary öner körsettı.
Mädina JAQYP
