Astana qalasynda tehnikalyq mamandyqtarǧa degen sūranys 75%-dy qūraǧanmen, jastardyŋ nebary 21%-y osy salada bılım aluda. Al, gumanitarlyq mamandyqqa degen qajettılık 25% bolsa da, 79%-y bolaşaǧyn osy saladan köredı. Mūndai körsetkışter eŋbek naryǧyndaǧy tepe-teŋdıktı saqtai almaidy. Demek, qalalyq eŋbek naryǧynda jūmysşy mamandyqtar tapşylyǧy anyq baiqalady. Jūmyssyzdyqtyŋ sebebı de – sol. Osy mäselerdı şeşu maqsatynda Astana qalasy Jastar saiasaty mäselelerı basqarmasy mektep oquşylaryna käsıbi baǧyt-baǧdar berudı közdeitın «Mamandyq taŋdau – maŋyzdy qadam» atty kezdesuler ötkızude.
Atalmyş kezdesuge Astana qalasy Bılım basqarmasy, Jūmyspen qamtu ortalyǧy, «Jas Otan» Jastar qanatynyŋ, sondai-aq, önerkäsıp jäne jūmysşy mamandyqtar ökılderı şaqyryldy. 9-11 synyp oquşylary qatysqan kezdesude mamandyq taŋdaudaǧy basty qadamdar aitylyp, käsıp ielerı baiandama oqydy.
Oquşy öz qalauyn tüsınbei, ne närsege ikemı baryn bılmegendıkten, köpşılıkke ılesıp, özıne deiıngı dostarynyŋ täjıribesıne ǧana süienıp, solar barǧan joǧary oqu ornyna tüsıp jatady. Būl jiı kezdesetın qatelıkterdıŋ bırı eken. Kezdesuge kelgen mamandardyŋ aituynşa, mamandyq taŋdaudyŋ «qalaimyn, qolymnan keledı jäne qajet» degen jeŋıl ǧana formulasy bar. Iаǧni, eŋ äuelı köŋıldıŋ nenı qalaitynyn sezınıp, ol ıstıŋ talaptarymen aldyn ala tanysu kerek bolsa, eŋ bastysy, aldyŋǧy ekı faktordy eskere otyryp, sol mamandyqtyŋ eŋbek naryǧyndaǧy sūranysyn anyqtau kerek.
«Qazaqstandyq äleumettanuşylardyŋ zertteuı boiynşa, bolaşaqta injenerler jäne ekonomika men tehnika salasyn üilestıre bılgen mamandar erekşe baǧalanatyn bolady. Sondai-aq, qazırgı zamanda jūmys önımdı bolu üşın firma men kompaniialardyŋ imidjıne äjeptäuır köŋıl bölınedı. Al, sait – ūiymnyŋ senımdı kelbetın qalyptastyratyn negızgı körsetkışterdıŋ bırı. Soǧan säikes, kompiuterlık baǧdarlamalardy äzırleuşıler men veb-dizainerlerdıŋ qyzmetı de joǧary tölemaqyǧa ie mamandyqtardyŋ tızımıne enedı. Qazırdıŋ özınde nanotehnologiia – tamaq öndırısı, medisina, kölık qūrastyru, ǧaryş tehnologiiasyn igerude qoldanyluda. Al, uaqyt ötken saiyn qajettılık öse beredı. Zertteuşılerdıŋ aituynşa, nanotehnologiia salasy boiynşa jetıstıkke jetken el älemdık köşbasşyǧa ainalady. Özderıŋızge belgılı, bügınde mikrobiologiia men gendık injeneriianyŋ kömegımen gendık modifikasiialanǧan önımder alynady. Sondyqtan biotehnologiia da qalys qalmai, qoldanylu aiasy keŋeie beredı dep boljanuda. Sonymen bırge, medisina, qyzmet körsetu, marketing, ekologiia qorǧau salasynyŋ da qajettılıgı aiqyndala tüsedı» dedı Jūmyspen qamtu ortalyǧy direktorynyŋ orynbasary Nūrgül Ahmetova.
Baiandamalardan bölek, zaman talabyna sai käsıp ielerı jaily beinerolikter körsetılıp, keluşılerge «Mamandyq taŋdauǧa jedel kömek» atty ädıstemelık nūsqaulyq kıtapşasy taratyldy. Kezdesu barysynda auditoriiamen qyzu bailanys ta ornatyldy. Mäselen, ortaǧa şyǧyp söz alǧan «Darmen Konsalting» JŞS direktory Äsel Mūratova «Joǧary jalaqynyŋ somasy qanşa bolu kerek?» degende, zaldaǧy oquşylar türlı nūsqalaryn aityp, aqyry bırauyzdan «aiyna 300 myŋ teŋgeden kem bolmauy tiıs» dep şeştı. Oqylǧan baiandamalardan soŋ, «Qazmūnaigaz» ben «Qazatomprom» jūmysşysy bolu öte abyroily qyzmet dep tüsıngen oquşylar fizika, himiia pänderıne basymdyq beretındıkterın de aityp jatty.
Endı bügın saǧat ekıde №71 mektep-liseide ötetın kezdesuge aspaz, şaştaraz, elektrik, mehanik, tıgınşı, qūrylysşy siiaqty jūmysşy mamandyq ielerı kelıp, öz täjıribelerımen bölısedı.
Mädina JAQYP
