Būl ömırde taǧdyrdyŋ jazǧanyna taŋdanuǧa bolmaidy, äste. Taiauda jetpıstıŋ jelkenıne şyqqaly otyrǧan Oryntai Jaqaiūly osydan alpys bes jyl būryn jazataiym jaraqattanyp, bırınşı toptaǧy mügedek bolyp, arbaǧa taŋylyp qalǧan edı. Al bügınde elu jasqa taianǧan Äliia Jienǧaliqyzy bolsa därıgerdıŋ qatelıgınen mügedek bolyp qalǧan-dy.
Endı osy jaǧdaidy şiratatyn bolsaq Oryntai bes jasynda attan qūlap, bel omyrtqasyna zaqym keledı. Sony emdetemın dep Qaraǧandynyŋ beldı auruhanasyna täjıribelı, ataqty hirurg därıgerıne ota jasatqyzady. Sodan därıgerdıŋ qatelıgınen ekı aiaǧy da jansyzdanyp qalady. Osyndai jaǧdai Äliianyŋ da basynan ötedı. Därıgerdıŋ dūrys diagnoz qoimai, qate emdeuınıŋ saldarynan bala jastaiynan mügedek bolyp, arbaǧa otyryp qalady. Kınälı därıger jazalanyp, ūzaq jylǧa bas bostandyǧynan aiyrylady. Endı ol därıger jazasyn ötep oralǧan şyǧar, al Äliia bolsa mäŋgılıkke mügedek bolyp qaldy. Ärine, mūnymen barlyq därıgerler qauymyna topyraq şaşudan aulaqpyn. Bızde bılımdı, täjıribelı därıgerler öte köp. Äsırese, egemendık alǧannan berı Elbasy N.Ä.Nazarbaev medisina salasyna köp köŋıl bölıp jatyr. Astanada medisinalyq klaster qūryldy. Därıgerlerımız şetelden täjıribe jinaqtap, bügıngı kün talabyna säikes medisinalyq qūraldarmen jabdyqtalǧan emdeu mekemelerınde abyroily qyzmet atqaruda. Sol jetıstıkterımızdıŋ arqasynda qazaqstandyqtardyŋ ömır süru jasy äjeptäuır ūzardy. Degenmen, älı de bolsa bılımı taiaz, tanystyqpen jūmysqa ornalasyp alǧan medisina qyzmetkerlerı kezdesedı. Men özım de kördım. Respublikalyq auruhanada ısteitın keibır medbikeler egu jūmysyn dūrys atqara almaidy. Elbasy aitpaqşy bızdıŋ basty bailyǧymyz – adam. Sol adamdy saqtap, ǧūmyryn ūzartu üşın emdeu salasynda bılımdı, täjıribelı qyzmetkerler bolǧany jön.
Oryntai Jaqaiūly men Äliia Jienǧaliqyzy «bız arbaǧa otyryp qaldyq, endı bızdı tamaqtandyryŋdar, kütıŋder» degen oiǧa kelgen joq. Ekeuı de eŋbek etkılerı kep, ūmtyluda boldy. Oryntai ärtürlı sebeptermen Qaraǧandy, Qyzylorda mügedekter üiınde bolyp, eŋbek etkısı kelıp Aqtöbe mügedekter üiıne auysady. Öitkenı, onda mügedekterge arnalǧan şeberhanalar bar eken. Sonda ärtürlı elektr qūraldaryn jasaumen ainalysady. Onymen qatar saǧat jöndeitın mamandyqty oqyp alady. Belgılı bır sebeptermen Astanadaǧy qarttar men mügedekter üiıne auysady. Äliia da şeşesı qaitys bolǧan soŋ aǧalary men apasy Astanada bolǧandyqtan, osynda qonys audarady. Osylaişa Oryntai men Äliia elordamyzda tanysyp, köŋılderı jarasyp, otbasyn qūrady. 2000 jyly nekelerın qiyp, üilenu toiyn jasady.
Äliia mekemenıŋ qoǧamdyq jūmystaryna belsene aralasady. Äşekeilı zattar jasaidy. Mügedekter arasyndaǧy sporttyq jarystarǧa qatysady. Üş ret qatarynan toǧyzqūmalaqtan respublika chempiony atandy. Osy sport türınen sport şeberı ataǧy bar.
Oryntai Jaqaiūly da şahmat jarystaryna qatysady. Şahmattan sport şeberlıgıne kandidat. Qoǧamdyq negızde bapkerlık etedı. Tūrǧyndardyŋ ötınışımen saǧattaryn jöndep beredı.
Osylaişa ülgılı otbasy bolyp, taǧdyrdyŋ jazuymen ekı mügedek bır tūtas bolyp tatu-tättı ömır sürıp jatyr.
– Osy ömırıme täube deimın. Mıne, jetpıs jasqa kelıp otyrmyn. Bız sekıldı qamköŋıl jandarǧa qamqorlyq jasap otyrǧan Elbasy Nūrsūltan Nazarbaevqa, kündelıktı ömırımızge jaǧdai jasap jürgen mekeme basşysy Q. Bäpışovke jäne barlyq qyzmetkerlerge alǧysymyz şeksız, – deidı Oryntai Jaqaiūly meiırlenıp.
Mereilı jasqa kelıp otyrǧan Oryntai Mūhtarovqa zor densaulyq tılei otyryp, Äliia Jienǧaliqyzy ekeuı baqytty ūzaq ǧūmyr keşe beruıne tılektestıgımdı bıldıremın. Ömırge degen qūştarlyqtaryŋyz eşqaşan suymai, köpşılıkke önege bolyp jüre berıŋızder.
Erkın DÄUEŞŪLY,
Qazaqstan Jurnalister odaǧynyŋ müşesı
