Bügınde bas qalamyzda kün tärtıbınen tüspei tūrǧan mäselenıŋ bırı öndırıstık qaldyqtar jaiy bolyp otyr. Ereje boiynşa, qaladan şyǧarylatyn qoqystyŋ bärı Alaş tas jolynda ornalasqan poligonǧa şyǧaryluy kerek. Alaida, keibır tūrǧyndar arnaiy orynǧa barmai-aq, qala maŋyndaǧy oi-şūŋqyrǧa qoqys tögıp kete berudı ädetke ainaldyryp alǧan.
Osy olqylyqtyŋ ornyn toltyru maqsatynda qala äkımdıgınıŋ tapsyrmasymen üş audanda arnaiy jūmys toptary qūrylyp, reidter ötkızu qolǧa alyndy. Osyndai şaralardyŋ arqasynda 18 säuır men 18 mamyr aralyǧynda jürgızılgen ekologiialyq ailyq aiasynda Astanadaǧy rūqsat etılmegen oryndarǧa tögılgen 10 myŋ tonnadan astam qaldyq anyqtalyp, joiylǧany belgılı. Alaida, qanşa jerden aiyppūl salynyp, şara qoldanylǧanymen qūzyrly organdardyŋ közı taia bere, kez kelgen jerge qoqys tastap jüre beretınder älı de azaimai tūr.
Eŋ soraqysy, araǧa ai tolmai jatyp sol oryndar qaitadan qoqysqa tolyp, quys-quys qaltarystar öndırıstık qaldyqtarǧa kömılıp jatyr. Kezektı reid barysynda Astana qalasynyŋ №2 jylu elektr ortalyǧy (JEO) aumaǧyndaǧy osydan şamaly ǧana uaqyt būryn tazartylyp qoiǧan alaŋnyŋ qaitadan qoqys bolǧany anyqtaldy. «Būl älı de bolsa tūrǧyndar arasynda qala mädenietınıŋ qalyptaspaǧandyǧyn, qalaǧa degen qūrmettıŋ, ekologiialyq tüisıktıŋ joqtyǧyn bıldıredı. Baqylaudy küşeitıp, qalalyq şaruaşylyq mekemelerı qoqysty arnaiy poligonǧa jetkızgen-jetkızbegenın anyqtau kerek. Poligonǧa tögılgen qaldyq üşın talon berıledı. Osy talondarǧa baqylaudy küşeitpese bolmaidy» deidı «Astana Eko-Poligon NS» JŞS direktorynyŋ orynbasary Dulat Öskenbaev.
Tekseru barysynda №2 jylu elektr ortalyǧy aumaǧynan myŋdaǧan tonna qoqys jinalyp qalǧan taǧy bır zaŋsyz üiındı oşaǧy tabyldy. Ūzamai būl poligonnyŋ «Konkrit Prodakts Astana» käsıpornyna tiesılı ekendıgı anyqtaldy. Sondai-aq, Astana qalasynyŋ tehnoparkı aumaǧynda ornalasqan «Tamyr» JŞS bazasynda da ekologiialyq talaptardyŋ būzylu oqiǧasy anyqtaldy. Būl nysanda öndırıstık qaldyqtar bırneşe jyldan berı şyǧarylmapty. Nätijesınde zauyt artyndaǧy alaŋqaidaǧy üiındıler kışıgırım tauǧa ainaluǧa şaq qalǧan.
Reid barysynda «Abattandyru, sanitarlyq jabdyqtau, jinau jūmystaryn ūiymdastyru jäne Astana qalasynyŋ aumaǧynda tazalyqty qamtamasyz etu qaǧidalaryna» atüstı qaraǧan būl mekemelerge äkımşılık şara qoldanylyp, kompaniia basşylaryna aiyppūl salyndy. Sonymen qatar, bır aptanyŋ ışınde zauyt maŋaiyn qoqystan tazartu turaly talap berıldı.
Bürkıt NŪRASYL
