Elordalyq Q.Quanyşbaev atyndaǧy memlekettık akademiialyq Qazaq muzykalyq-drama teatry körermenımen jiyrma törtınşı ret qauyşty. Mausymaşar aldyndaǧy basqosuda teatr ūjymy jaǧymdy jaŋalyqtarymen bölısıp, aldaǧy josparlarymen tanystyrdy. Qatysuşylar teatrdyŋ jetıstıkterın aita kelıp, jaŋa mausymda körermenge ūsynylar tuyndylarǧa toqtaldy. Osyǧan deiın teatrda bır mausymda bes qoiylymnyŋ premerasy ötken bolsa, endı segız jaŋa spektakl sahnalanady. Qazan aiynyŋ 14-ı künı Qanat Jünısovtıŋ «Säken sūŋqar» tarihi tragediialyq dramasynyŋ, al 16-synda Şyŋǧys Aitmatovtyŋ «Ana – Jer Ana» tragediiasynyŋ premerasy ötedı.
Qalleki teatrynyŋ ärtısterı qyrküiek aiynda Qyzylorda qalasynda ötken KSRO jäne Qazaqstan Halyq ärtısı Säbira Maiqanovanyŋ 100 jyldyq mereitoiyna arnalǧan Qazaqstan teatrlarynyŋ XXII festivalıne Ş.Aitmatovtyŋ «Ana-Jer Ana» spektaklımen qatysyp, Halyq ärtısı Güljan Äspetova «Säbira Maiqanova» atyndaǧy arnaiy jüldenı ielense, Qazaqstannyŋ eŋbek sıŋırgen qairatkerı T.Atymtaeva «Eŋ üzdık äiel beinesı» nominasiiasyn jeŋıp aldy. Qalyptasqan dästürge sai, jaŋa mausym qarsaŋynda teatr akterlerı men aktrisalary JOO, kolledjder men mektepterdegı körermenderımen «Teatr jäne körermen» taqyrybynda kezdesuler ötkızdı.
Jaŋa mausym, sahna şymyldyǧy, ädettegıdei, zaŋǧar jazuşy Mūhtar Äuezovtıŋ «Abai» tragediiasymen aşyldy. Tuyndynyŋ qoiuşy rejisserı – Qazaqstannyŋ eŋbek sıŋırgen qairatkerı Älımbek Orazbekov. Qalibek Quanyşbaev atyndaǧy teatr ūjymy körermenın danyşpan aqyn Abai ömır sürgen zamanǧa saiahat jasatyp, tūŋǧiyq oidyŋ iırımıne batyryp, adam aityp jetkızgısız äserge böledı. Qalibek Quanyşbaev şyǧarmaşylyǧyndaǧy şoqtyǧy biık röl däl osy Abai rölı ekenı dausyz. Sondyqtan bolar, qoiylymdy sahnalau atalǧan öner ūjymyna ülken jauapkerşılık jüktedı. Kielı sahnanyŋ düldülderı Qallekiden asyp tüspese de, körermendı önerlerımen täntı ettı.
«Eger bız jaŋa mausymdy Abaidan bastamasaq, Äuezovten bastamasaq, onda baǧamyz da, qūnymyz da bolmas edı. Öitkenı, tarih sonysymen qūndy, sonysymen mändı. Onyŋ üstıne, Abai – mäŋgılık. Qoiylymda feodaldyq däuırdegı äleumettık qaişylyqtar jan-jaqty körsetıledı. Qazaq halqynyŋ sol zamandaǧy tūrmys-tırşılıgı «soqtyqpaly soqpaqsyz jolmen jürıp, myŋmen jalǧyz alysqan» oişyl aqyn beinesımen qatar örılıp otyrady» dedı teatrdyŋ körkemdık jetekşısı Talǧat Temenov.
«Teatrǧa kelgen körermen qoiylym arqyly Abaidai kemeŋger, oişyl aqynymyzben qaita qauyşqandai boldyq» dep sahnaǧa şyqqan akterler men aktrisalarǧa öz rizaşylyqtaryn bıldırdı. Būl öner ordasynda qazaq ädebietı klassikterınıŋ jäne qazırgı zaman dramaturgtarynyŋ şyǧarmalarymen qatar älem ädebietı ökılderınıŋ klassikalyq tuyndylary da sahnalanyp keledı.
Taǧy bır aita ketetın jaŋalyq, biyldan bastap Qalleki teatrynyŋ akterı, Qazaqstannyŋ eŋbek sıŋırgen qairatkerı Keŋes Nūrlanov atyndaǧy jülde taǧaiyndalyp, jas akterlerge jyl saiyn ūsynylyp otyrady. Būl jülde Jezqazǧan qalalyq mäslihatynyŋ deputaty, bılım mesenaty, QR bılım beru ısınıŋ qūrmettı azamaty Bekzat Altynbekovtıŋ qoldauymen jüzege aspaq. Al alǧaşqy jüldenı teatr ärtısı Saia Toqmanǧalieva ielendı.
Ashat RAIQŪL
