Alpys jasty qazaq taltüs dep jatady. Iаǧni, künnıŋ däl töbeden auǧan tūsy, ömırdıŋ de jartysy sarqylyp, qalǧan jartysyna aiaq basqan kez. Otyzyndy orda būzyp, qyrqynda qamal alǧan er alpysynda aqyl aitar aǧaǧa ainalady. Ekınıŋ bırı emes, er! Astanalyq Zeinolla Şibkenov te ata jasqa aiaq basqan alpystyŋ biıgıne şyǧypty. Mereitoi iesın köptıŋ ışınen airyqşalauymyzdyŋ sebebı joq emes, ol elordanyŋ ösıp-örkendeuıne, ekonomikasynyŋ qarqyn aluyna, güldenuıne eŋbek sıŋırıp jürgen azamat. Osy jasqa kelse de atynan tüspei, aqylyn da aitady, tırlıgın de tyndyrady.
Zeinollanyŋ, aldymen jastarǧa ülgı bolarlyq ömır jolyna toqtalsaq. 1953 jyldyŋ 27 tamyzynda Jezqazǧan öŋırındegı Jaŋaarqa audanynda düniege kelıptı. «Otbasynda on balamyz» deidı. Ūldardan ülkenı Zeinolla äpkesımen bırge özınen keiıngılerge qamqor boldy. Şoiyn joldyŋ boiynda qyzmet etken Rahym äke on ūl-qyzyn qanattyǧa qaqtyrmai, tūmsyqtyǧa şoqtyrmai baǧyp-qaqty, ösırdı, jetıldırdı, eŋ aqyry oqytty. «Äke körgen – oq jonar», onnyŋ törteuı eseiıp, er jetkende äke jolyn taŋdapty ǧoi. Solardyŋ bırı – Zeinolla aǧamyz.
…Auyldyŋ qaradomalaq balasy mektep qabyrǧasyn abyroimen tämamdap, Ombyǧa jol saldy. Sondaǧy institutqa qūjattaryn tapsyryp, injener-mehanik mamandyǧyn bıtırdı. Jas mamandy Selinnyi temır joly jūmysqa şaqyryp, eŋbek jolyn 1980 jyly jol monterı qyzmetınen bastady. 1982 jyldan bastap Keŋes audandyq komitetınıŋ önerkäsıptık bölımınıŋ instruktory, önerkäsıptık-kölık bölımınıŋ meŋgeruşısı, Qazaqstan Kompartiiasy Selinograd oblystyq komitetınıŋ ūiymdastyru-partiialyq jūmysy bölımınıŋ instruktory boldy. Sonymen qatar, Zeinolla Rahymūly Halyq deputattary oblystyq keŋesınıŋ tūraqty komissiialary jäne keŋes jūmysy mäselelerı jönındegı bölımnıŋ referentı, Qazaqstan Respublikasy jekeşelendıru memlekettık komitetınıŋ Aqmola oblysy boiynşa töraǧasynyŋ orynbasary, «Prominvest» invest qorynyŋ basqaruşysy, «Prominvest» aksionerlık qoǧamynyŋ prezidentı lauazymdaryn atqardy. Astana elorda bolǧaly, iaǧni 1998 jyldan bastap «Aqmola vagon jöndeu zauyty» AQ qyzmet etedı, bırneşe jyldan berı ırgelı ūjymnyŋ bas direktory.
Ilkımdı jūmysty el de baǧalaidy ǧoi. Zeinolla besınşı şaqyrylymdaǧy Astana qalasy mäslihatynyŋ deputaty mandatyn enşılegen. Būl da halyqtyŋ senımı, jūrttyŋ ūlyna degen ıltipaty. Sondai senım men ıltipattyŋ üdesınen şyǧu el aǧasynyŋ basty mūraty. «Köp ıs tyndyrdym deuden aulaqpyn. Dese de, igı ısterdıŋ basy-qasyndamyz.
Astananyŋ şetkerı auyldarynyŋ problemasy da, mäselesı de az emes. Mäselen, emhana, balabaqşa, mektep, sport klubtary… Osyndai nysandardy tūrǧyzuǧa, aşuǧa bar-küş-jıgerımızdı saludamyz. Bızdıkı halyqtyŋ mūŋyn, mūqtajyn bilıkke jetkızu, tırlıktıŋ bırlıkpen ūiymdastyryluyna ūitqy bolu emes pe. Endeşe, sol jolda aianyp jürgen joqpyn» deidı ol.
Zeinollany kökke kötere maqtarlyq bır ısı bar. Bögenbai batyr daŋǧylynyŋ boiyna batyrdyŋ eskertkışın qoiuǧa onyŋ maŋdai terı köp sıŋdı. Ūrpaqqa ūlaǧatty, sauapty bastamanyŋ basy-qasynda bolyp, üş jylda jūrttyŋ közaiymyna ainaldyrdy. Älbette, būǧan elordalyqtardyŋ aitar alǧysy şeksız, bıraq, mūny da bıreu bılse, bıreu bıle bermeidı.
Qazaqta «tektılık» degen ūǧym. Qany tektı, atasy tektı, babasy tektı, tektı jerden şyqqan ūl nemese qyz deitınımız sol. Mıne, Zeinollany äbden solai atauǧa bolady. Qany tektı. Kädımgı ūlt qairatkerı, jazuşy, aqyn Säken Seifullinmen nemereles. «Seifulla men bızdıŋ atamyz tuǧan aǧaly-ınılı eken, Seifulla, Ospan, Jaqiia degen aǧaiyndylar bolǧan. Bıraq, atamyz būl jönınde köp äŋgımelemeptı. Öitkenı, Säken ömırınıŋ azapty, qasırettı bolǧany bärımızge belgılı. Ziiany tiıp keter dep qoryqsa kerek» deidı Zeinolla.
Äke jolyn quǧan ūl marapattan da kemde emes, «Qūrmet» ordenın ielengen. Köptegen mereitoilyq medaldardy keudesıne jarqyratyp taqqan. El Prezidentınıŋ Alǧys hatyn alǧan. Būl az deseŋız, «Qūrmettı temırjolşy». Bügınde ūl-qyz tärbielep, ırgelı şaŋyraqtyŋ otaǧasy bolyp otyr. Elge septıgı tier ısterdı jalǧastyra beruıne niettespız.
Ashat RAIQŪL
