Qarjy men jyljymaityn mülıktı zaŋdastyru aksiiasy bastalǧan alǧaşqy üş künnıŋ ışınde jergılıktı äkımdıkterde qūrylǧan komissiiaǧa 200-den asa adam habarlasypty. «Būl – nauqanǧa degen jūrtşylyqtyŋ qyzyǧuşylyǧy joǧary ekenın körsetedı» deidı QR Prezidentı janyndaǧy Ortalyq kommunikasiialar ortalyǧynda ötken brifingte qarjy vise-ministrı Ardaq Teŋgebaev.
Osynau nauqan kezınde aqşa men baǧaly qaǧazdardy, zaŋdy tūlǧanyŋ jarǧylyq kapitalyndaǧy qatysu ülesın, basqa adamǧa räsımdelgen jäne Qazaqstan aumaǧynan tys jerdegı jyljymaityn mülıkterdı zaŋdastyruǧa bolatynyn aitqan vise-ministr alymdy jariia etu üşın alym somasyn audaruǧa biudjettık synyptauyştyŋ arnauly kody aşylǧanyn habarlady. Kod nömırı – 206110.
Mülıktı zaŋdastyru üşın qajet bolatyn qūjattardyŋ tızımıne toqtalǧan ol mülkın zaŋdastyrǧysy kelgender jergılıktı äkımdıkterde qūrylǧan arnauly komissiiaǧa ötınış beru qajettıgın eske saldy. Oǧan qosa, jeke kuälıktıŋ köşırmesın ūsynuy tiıs.
Jyljymaityn mülıktı jariia etken jaǧdaida, nysannyŋ qūrylys normalary men qaǧidattaryna säikestıgı turaly sarapşynyŋ attestattalǧan qorytyndysy boluy qajet.
Qazaqstan aumaǧynan tys jerde ornalasqan mülıktı jariia etu üşın azamattar Qarjy ministrlıgıne qarasty Memlekettık kırıster komitetınıŋ (būrynǧy Salyq komitetı) aumaqtyq bölımşelerıne barǧandary jön.
Al, jarǧylyq kapitalda qatysu ülesı üşın – qūqyq belgıleuşı qūjattyŋ notarius kuälandyrǧan köşırmesı, baǧaly qaǧazdardy jariia etu üşın – menşık qūqyn rastaityn qūjaty, mülıktıŋ satyp alynǧanyn nemese baǧalau qūnyn rastaityn qūjaty, mülıktı jariia etkenı üşın alynatyn alymnyŋ tölengenın rastaityn qūjaty boluy kerek. Aqşany zaŋdastyrǧysy kelgender ekınşı deŋgeilı bankter men «Qazpoştaǧa» baruy qajet.
Brifingte söz söilegen ädılet ministrınıŋ orynbasary Baqytjan Äbdıraiym aksiia aiasynda elımızdıŋ ädılet organdary jürgızıp jatqan jūmystarmen tanystyra kele, zaŋǧa qatysty eŋ jiı qoiylatyn sūraqtarǧa jauaptar daiyndap, «Elektrondyq ükımet» portalyna joldaǧandaryn jetkızdı.
Eske sala keteiık, mülıktı jariia etuge ötınıştı qabyldau – 2015 jyldyŋ 15 qaraşasyna deiın, al kapitaldy jariia etu 2015 jyldyŋ 31 jeltoqsanyna deiın jalǧasatyn bolady.
Qymbat NŪRǦALİ
