TERI TAZALYQTY TALAP ETEDI

Janar KSANOVA, Astana qalasy dermatologiia jäne jynys qatynasy aurularyn aldyn ala emdeu ortalyǧy direktorynyŋ orynbasary

Saltanat:

– Joldasym denesın qasi beredı. Äsırese, keşke qarai qyşuy küşeiıp ketedı. Kımge qaralu qajet jäne būl neden boluy mümkın?
– Eger terıde börtpeler bolsa qyşuynyŋ sebepterı: allergiia, zeŋnıŋ qabynuy jäne t.b. boluy mümkın. Būl naqty ne ekenın anyqtau üşın sızge dermatolog därıgerge qaralu qajet. Därıgerge kelgende özıŋızben bırge jeke kuälıgıŋız mındettı türde boluy kerek. Al terıde özgerıster bolmasa terı bauyr büirek jäne öt şyǧaru joldarynyŋ syrqaty, endokrindı özgerıster, psihikalyq būzylystar jäne jüike jüiesı aurulary saldarynan qyşuy mümkın. Qyşymany emdeu onyŋ sebepterıne bailanysty bolatynyn esten şyǧarmaŋyz. Joldasyŋyz bızdıŋ ortalyqqa kelıp, därıgerlermen keŋesıp, tekseruden ötsın.

Oral:

– Ekzemany halyq emımen emdeu mümkın be?
– Ösımdıktermen köptegen aurulardy emdeuge bolady. Eŋ bastysy, allergiia bolmauy kerek. Basqa zattardy är adamǧa jeke taŋdau qajet.

Ǧalym QOSYMJANŪLY:

– Keiıngı kezde aiaǧymnyŋ tyrnaqtarynda özgerıster baiqadym. Mūndai jaǧdai menıŋ äkemde de boldy. Tyrnaqtarym sarǧaiyp, ügılgış, synǧyş bolyp kettı. Ne ısteimın, qalai emdeuge bolady?
– Sızdıŋ sipattamaŋyz boiynşa , barlyq klinikalyq belgılerı taban onihomikozyna ūqsaidy. Bıraq tyrnaqtyŋ basqa da dermatozdar arqyly zaqymdanatynyn eskeru kerek, onyŋ klinikasyn mikroskopiia arqyly zertteuler jürgızıp, qajet bolǧan jaǧdaida bakteriologiialyq sebudı ötkızu üşın sızge dermatolog därıgerge qaralyŋyz dep keŋes beremın. Eger sızde onihomikoz naqtylansa, bız mındettı türde ūsynys jasap, aiaq kiımıŋız ben şūlyǧyŋyzdy qalai öndeu kerektıgın tüsındıremız. Jalpy, tazǧa qarsy terapiiany jäne jergılıktı syrtqy terapiiany jazyp beremız. Aiaq jäne tyrnaqtaǧy mikozdy mındettı türde emdeu kerek. Sebebı, ol üi ışındegılerge jūǧuy mümkın. Jalpy, terı aurulary tazalyqty talap etedı.

Darhan:

– Jasym 29-da. Türkiiaǧa baryp, demalyp qaitqym keledı. Tūzdy su terını qūrǧatpau üşın jäne ärtürlı terılık aurularǧa ūşyramau üşın künge qalai küigen dūrys?
– Künnıŋ ötkır säulelerıne küimeu üşın taŋerteŋ saǧat 10-11 jäne keşkı saǧat 16:00-den keiın qyzdyrynǧan abzal. Künnıŋ astynda ekı saǧattan artyq jatuǧa bolmaitynyn eskergen jön. Mındettı türde künnıŋ ultrakülgın säulesınen qorǧaityn krem qoldanu qajet. Terı aurularynyŋ aldyn alu üşın erekşe män beretın jait – bet kütımı, terını taza ūstau, jeke bas gigienasyn saqtau. Sonymen qatar, mümkındıgıŋız boiynşa terı jaraqattanuynyŋ aldyn alu, jarany jäne terı sydyrylǧan jerdı antiseptiktermen dūrys öŋdeu qajet.

Bolatbek:

– Sozylmaly ekzemamen auruhanaǧa jatu üşın ne ısteuım kerek?
– Stasionarǧa jatqyzu üşın auru körsetkışterıne qaraimyz. Iаǧni, jedel nemese jedeldeu, sozylmaly dermatozdardyŋ asqynuyna, merezben auyratyn jüktı äielderge, balalardaǧy jūqpaly terı dermatozyna jäne t.b. bailanysty. Ol üşın sız därıger joldamasymen bızdıŋ ortalyqqa kelseŋız, diagnoz qoiylǧan soŋ gospitalizasiiaǧa joldama berıledı.

Altynai:

– On alty jyldan berı psoriazben auyramyn. Jaqynda bosanǧannan keiın ol, tıptı, asqynyp kettı, säbiımdı keude sütımen emızemın. «Enbrel» preparaty turaly estıgenmın, sol turaly tolyǧyraq bılgım keledı. Ol rasymen psoriazǧa kömektesedı me? Qazaqstanda bar ma?
– «Enbrel» – biologiialyq preparat. Ol aurudyŋ asqynǧan jäne keŋ taralǧan formalarynda därıgermen taǧaiyndalady. Būl preparat Qazaqstanda tırkelmegen. Degenmen, bızde osy toptaǧy biologiialyq preparattar – «ustekinumab» jäne «infliksimab» tırkelgen. Sondyqtan, taǧy da qaitalap aitamyn: būl preparat jalpy medisinalyq terapiia äserı bolmaǧan jaǧdaida, tek psoriazdyŋ auyr kezınde ǧana qoldanylady.

Bibıjan MŪHAMEDİIаRQYZY:

– Bır jarym jyl būryn menıŋ ekı qolymda, iyq jaǧymda aq daqtar paida boldy. Anyq bılınbeidı jäne bırkelkı emes. Qyşynu, giperemiia jäne diskomfort joq, tek kosmetikalyq kemşındık baiqalady. Keiıngı kezde daqtar ūlǧaiyp kettı. Äsırese, arqa jaǧymda moiynnan säl tömen jäne şyntaq bölıgınde köp. Auyrsynu sezımderı sezılmeidı. Sonda būl ne boluy mümkın jäne qandai därıgerge qaraluym kerek?
– Bibıjan, dermatologtyŋ keŋesıne jügıngenıŋız jön. Därıger teksergennen keiın mümkın onyŋ sebepterın aita jatar. Sızdıŋ sipattauyŋyz boiynşa būl kebek tärızdı temıretkı boluy da mümkın. Naqty anyqtau üşın bızdıŋ ortalyqqa kelıp, tekserılıŋız.

Läzzat QANATQYZY:

– Ernıme gerpes jiı şyǧady, keide betımde paida bolady. Aityŋyzşy, osy ūşyq degen ne jäne ony qalai emdeu kerek?
– Ūşyq – terı jäne şyryşty qabyqtyŋ zaqymdaluynan paida bolatyn virus­ty auru. Sızge dermatolog därıgerge qaralu kerek. Em virusqa qarsy preparattardy syrttai jäne ışke qoldanu arqyly jüredı. Residivtı ūşyq, iaǧni, jiı qaitalanu kezınde virusqa qarsy em kursy qabyldanady. Jäne infeksiianyŋ jūqpalylyǧyna bailanysty sızdıŋ jynystyq serıktesıŋız de bırge emdeluı qajet. Preparatty taŋdau üşın dermatolog därıgerge qaralyŋyz.

Qanşaiym MANAPOVA:

– Jaqynda ırıŋdı angina diagnozymen auruhanada jattym. Mikroanalizge qan tapsyrǧan kezde oŋ nätije baiqalyp, kezdeisoq bıldım: merez auruyna şaldyǧyppyn. Sızderde emdelu mümkın be?
– Aldymen bızdıŋ ortalyǧymyzǧa kelıp, tırkeu bölımı arqyly №204 nemese 206-kabinetterge jazyluyŋyzǧa bolady. Därıgerge qaralu üşın özıŋızben bırge jeke kuälıgıŋızdı mındettı türde alyp kelıŋız. Diagnozdy naqtylau üşın tolyq tekserıluden ötesız. Eger diagnoz naqtylansa, bızdıŋ ortalyqta sızge arnaiy tolyqqandy em jürgızıledı.

Sanduǧaş:

– Tyrnaqtarym tez synǧyş, jūmsaq, sondyqtan da qysqa. Qandai jolmen qataituǧa jäne sauyqtyruǧa bolady? Al, olardy ösıru üşın qandai därılık preparattardy qoldanǧanym jön?
– Terıŋızdı qataitu üşın polivitaminder, mikroelementter, mineraldy toptama qajet. Sızdı bızdıŋ ortalyqqa tıkelei konsultasiiaǧa şaqyramyz. Kelıŋız, kömektesemız.

Qanaǧat SERIKQYZY:

– Balamnyŋ terısı allergiiaǧa sezımtal, sitrustık jemıster nemese tättı jese, denesınde börtpeler paida bolady. Allergolog därıgerdıŋ baqylauyndamyz. «Avene Trixera» degen preparatty jazyp berdı. Ol gormonaldy därı me?
– İä, bız de, allergologtar da qazırgı kezde osyndai därılık zattardy jiı qoldanamyz. Olardy emolentter dep te ataidy. Olar – atopiialyq jäne qūrǧaq terını kütu boiynşa emdık kosmetika, därıge jatpaidy, qūramynda gormondar joq. Gigiena zattarynyŋ qataryna jatady jäne terını belsendı türde ylǧaldandyrady. Mūndai därılık zattardyŋ satylymdaǧy türı köp, sız balaŋyzǧa onyŋ emulsiia, krem, loson türın taŋdai alasyz.

Älıbek TŪRSYNBAIŪLY:

– Dermatologiia ortalyǧynda psoriazdan emdelıp jatyrmyn. Sozylmaly nauqasyma säikes, dūrys em qabyldauyma kömektesıp qana qoimai, şyn yqylastarymen qarap jürgen därıgerlerge, medbikelerge, sondai-aq osy ortalyqtyŋ basşysyna aitar alǧysym şeksız. Bılıktı mamandardyŋ bılgırlıgınıŋ arqasynda auruymnan aiyǧyp kelemın.
– Rahmet, Älıbek aǧa! Naqty sūraǧyŋyz bar ma?
– Joq, qalqam, tek alǧystan basqa aitarym joq. Myna ramazan aiynda Alla tılekterıŋdı bersın! Eŋbekterıŋnıŋ jemısın körıp, kömek sūrap kelgen jandardyŋ alǧysyna bölene berıŋder!

Berık:

– Jelkem qatty qişidy jäne qaiyzǧaq tärızdı aq qabyrşaq paida boldy. Jalpy basymda qaiyzǧaq joq. Susabyn türın, şaşqa arnalǧan zattardy auystyryp kördım, nätije joq, kerısınşe älgı qabyrşaqtar ūlǧaiuda. Sızderde emdelu üşın qandai analizder tapsyruym kerek?
– Sızge eŋ aldymen dermatolog därıgerıne qaralu qajet. Ol sızdı körsetkışterıŋızge bailanys­ty zeŋderge qatysty jaǧyndy, bakteriologiialyq zertteu, RW siiaqty tekserılulerge jıberedı. Būl analizder Dermatologiia ortalyǧynda jürgızıledı. Tekseruden ötu üşın jeke kuälıgıŋızben bızdıŋ ortalyqqa kelıp, dermatolog därıgerge qaraluyŋyz kerek.