Töreǧali TÖREÄLI, estrada änşısı: AITYS MENI, MEN AITYSTY TASTAǦANYM JOQ
Tanymal änşı Töreǧali Töreälınıŋ Astana künıne orai ötkızetın şyǧarmaşylyq keşın köpşılık asyǧa kütıp jür. «Qazaq qyzǧa üilenem» dep atalatyn konsert 8 şıldede Kongress-holda ūiymdastyrylady. Osynau ıs-şara aldynda estrada jūldyzymen kezdesıp, oqyrmandarymyz joldaǧan on saualdy nazaryna ūsynǧan edık.
– Bırneşe künnen keiın bas qalada konsert bermekşısız. Onda körermenderdı nendei närselermen quantpaqsyz?
Rauan QALİMOLDA, mūǧalım
– Alla qalasa, äsem Astanamyzdyŋ tuǧan künı qarsaŋynda jeke än keşımdı berudıŋ sätı tüskelı otyr. Ondaǧy maqsatym – maǧynasyz konsert qoiyp, qarajat tabu emes. Jinalǧan jūrtşylyq qūlaq qūryşyn qandyrar ädemı ännen läzzat alyp, bır demalyp qaitsa eken deimın. Qandai jaŋaşyldyq bolaryn sonda barǧanda bıle jatarsyzdar. «Aryq aityp, semız şyq» demei me qazaq?!
– Sızdıŋ qai änıŋızdı alsaq ta bilei ketuge yŋǧaily, äuenı oinaqy. Soŋǧy uaqyttaǧy toilardyŋ bırde-bırı olarsyz ötpeitın boldy. Alaida qazırgı estradada onsyz da jeŋıl än köp. Bırneşe jyl hit bolyp, soŋynan ūmytylyp ketetın änderdıŋ oryndauşysy bolyp qalamyn dep qoryqpaisyz ba?
Künaiym BEGEN, student
– Öner adamyn ösıretın de, öşıretın de – halyq. Sondyqtan būqaranyŋ menı baǧalap, qolpaştaǧanyna rizamyn. Jeŋıl-jelpı änder dep «süiıp qaldym, küiıp qaldym, sensız ömır joq» syqyldy sözderı bar änderdı ǧana aituǧa bolatyn şyǧar. Menıŋ repertuarymda ondai dünieler joqtyŋ qasy. Qoldan kelıp jatsa, köŋıl köterıp, boi serpıltetın änder oryndaǧan dūrys qoi.
– Sız oryndaityn änderdıŋ sözı jaqsy. Oryndauyŋyzdaǧy änderdıŋ mätının kım jazady?
Aqtolqyn DÜISENOVA, bala kütuşısı
– Keşe ǧana aitystyŋ esıgın jauyp şyǧyp, arzan ūiqasty än aitsam jaraspaityn siiaqty. Eŋ alǧaşqy änımdı jazdyrǧan kezden bastap-aq tyŋdarmannyŋ qūlaǧyn «aiym-künım, küiem-süiem» deitın mänsız tırkestermen auyrtpaimyn degenmın. Menıŋ repertuarymdaǧy änderdıŋ basym bölıgınıŋ sözın özımnıŋ ömırdegı ärı önerdegı bauyrym, dosym, aitysker aqyn Qainar Alaközov jazady. «Bol janymda», «Izdeme», «Qazaq qyzǧa üilenem», «Allo» änderı mätınınıŋ avtory – sol jıgıt. Sonymen qatar, Aian Seiıtov, Erşat Qaiboldin, Qanat Myrzahan syndy aqyndardyŋ sözderıne jazylǧan änderım de bar.
– Otbasyŋyz, jeke ömırıŋız turaly aitsaŋyz…
Baljan SÜIINDIK, esepşı
– Fariza, Dina esımdı ekı qaryndasym bar. Anam – orys tılı pänınıŋ mūǧalımı. Qazır üi şaruasynda. Qarapaiym qazaqy otbasynda tärbielendım.
– Aitysta jürgenıŋızde bır top aqynmen qajylyqqa barǧanyŋyzdy bılemız. Mekkege qajylyqtyŋ män-maǧynasyn tüsınıp bardyŋyz ba? Mūsylmandyqtyŋ şarttaryn qazır qanşalyqty oryndap jürsız?
Meiram SAǦYNDYQ, jurnalist
– Qairat Satybaldy aǧamyz bastap bıraz aqyn qajylyqqa barǧan edık. Qajylyqtyŋ män-maǧynasyn tolyqtai tüsınıp bardym. Menıŋşe, mūsylmandyq paryzyŋdy öteudıŋ erte-keşı joq. Ony ärkım özı üşın jasaidy ǧoi. Sol sebeptı, mūndai jaittardy jariia qylmau kerek sekıldı.
– Aldaǧy uaqytta sızdı aitystan qaita köre alamyz ba?
Marat NŪRLYBAI, injener
– Aitystan körıp qalularyŋyz ǧajap emes. Aitys menı, men aitysty tastaǧanym joq. Turasyna kelgende, menı Töreǧali Töreälı etken de – osy öner. Konsertterıme keletın körermennıŋ jartysy – ülken kısıler. Olar menı osy aitys arqyly tanyǧan şyǧar dep oilaimyn.
– Bolaşaqtaǧy josparlaryŋyzben bölısıŋızşı.
Arujan QAIYRHAN, qarjyger
– Alǧa qoiǧan maqsat-mındetterım jeterlık. Äzırge Ūlttyq arnamen tıze qosyp, «Ūly dala balasy» atty realiti-şou tüsırıp jatyrmyz. Būl şou respublikamyzdaǧy toǧyz oblysty qamtidy. Ony aldaǧy uaqytta «Qazaqstan» ūlttyq arnasynan tamaşalaityn bolasyzdar.
– Änşı retınde endı tanyla bastaǧanyŋyzda bäzbıreuler sızdı Qairat Nūrtastyŋ köşırmesı dep atady. Endı bırı Erkın Nūrjanovqa ūqsatyp jatty. Jalpy, elıkteitın kısılerıŋız bar ma?
Jansaia EŞIMOVA, jeke käsıpker
– Qairat ta, Erkın de elıkteuge tūrarlyq, eŋbekqor änşıler ǧoi. Bıraq özım olarǧa emes, bala künımnen «Nūr-Mūqasan» tobyndaǧy Mūqasan aǧaǧa qatty elıktedım. Ol kısı äkemnıŋ dosy bolatyn. Qyzylordaǧa konsert berıp kelgende, Baiqoŋyrdaǧy bızdıŋ üige soǧyp, posterlerıne maǧan qoltaŋba jazyp berıp ketetın. Al sahnada Mūqasan aǧanyŋ dauysymen än salyp, biın qaitalaǧan emespın. Köşırme önermen körıne almaitynymdy tüsınemın, öitkenı.
– Özıŋız änge söz jazǧyŋyz kelmei me?
Bürkıt BATYRHANOV, asaba
– Özım de bırneşe änge söz jazyp kördım. Önerde jürgen aǧa-äpkeler, bauyrlar ötınış jasaǧan kezde anda-sanda qaǧazǧa türtıp qoiatynym bar. Öleŋ jazu aqyn üşın būiym da emes. Jürek jabyǧyp, köŋıl syzdaǧan kezde bır şumaqtar keledı, äiteuır. Bıraq bır aqyndar siiaqty kompozitor ūsynǧan kez kelgen muzykaǧa süikep öleŋ jaza salmaimyn. Erteŋ titrda «öleŋın jazǧan» degen jerde menıŋ atym tūrady. Öz esımımdı arzan ūiqastardyŋ iesıne ainaldyrmauym kerek. Erkın Nūrjanovpen bırıgıp oryndaityn «Botam-ai» degen ännıŋ sözın özım jazǧanmyn. Halyq jyly qabyldaǧan tärızdı.
– «Ataǧy jer jarǧan änşı atanu üşın qaltaŋda qyruar qarjyŋ boluy kerek» degen qaǧidamen qanşalyqty kelısesız?
Mūhit BABAQŪL, oquşy
– Qarajat kerek, ärine. Qazırgı zamanda aqşamen bärın jasauǧa bolady. Alaida Alladan kelgen darynyŋ men talantyŋ bolmasa, eşkımge de kerek emessıŋ. Öz basym ondai qaǧidany ūstanbaidy ekenmın.
Daiyndaǧan: Botagöz MARATQYZY
