Prezident Nūrsūltan Nazarbaev Sankt-Peterbordaǧy G20 sammitınıŋ sessiiasyna qatysty. Būl turaly Prezidenttıŋ baspasöz qyzmetı habarlady.
Memleket basşysy maŋyzdy älemdık şeşımderdı qabyldau kezınde köptegen damuşy elderdıŋ ūstanymy ıs jüzınde nazarǧa alynbaitynyn aitty.
– Qazaqstan tärızdı elderdıŋ de pıkırı elenuı üşın būdan ekı jyl būryn menıŋ tarapymnan G-GLOBAL jobasy bastama retınde köterıldı. Ol G8-ge jäne G20-ǧa balama emes, qazırgı kezde aqparattyq-kommunikativtık alaŋ retınde ıske asyrylyp jatqan jahandyq dialogtyŋ qosymşa qūraly ǧana, – dedı Memleket basşysy. G-GLOBAL-dan bölek Qazaqstannyŋ bastamasy boiynşa BŪŪ Bas Assambleiasynyŋ qoldauymen Astanada 104 eldıŋ ekonomikalyq vedomstvolary jetekşılerınıŋ qatysuymen Daǧdarysqa qarsy bükılälemdık konferensiia ötkızıldı. Osy innovasiialyq jahandyq dialog formatyna basa nazar audarǧan Elbasy meilınşe özektı problemalardy şeşuge qatysty öz közqarasyn bıldırdı. Nūrsūltan Nazarbaev aitylǧan ūsynystardyŋ nazarǧa alynyp, atalǧan salalardaǧy qyzmettıŋ jandana tüsetınıne senım bıldırdı.
Gülmira AIMAǦANBET
