ÜŞ JYLDYQ BIýDJET JOBASY TALQYLANDY

Qalalyq mäslihattyŋ äle­u­mettık-mädeni damu mäselelerı jönındegı tūraqty komissiiasynyŋ otyrysynda elordadaǧy bırqatar basqarmalardyŋ aldaǧy 2015-2017 jyldarǧa arnalǧan biudjet jobas­y talqylandy.

Negızgı bölım boiynşa söz alǧan Astana qalasynyŋ Ekonomika jäne biudjettık josparlau basqarmasy basşysynyŋ orynbasary Gülnär Jüsıpova deputattardyŋ qarauyna 2015-2017 jyldarǧa arnalǧan biudjettıŋ jobasyn ūsyndy. Osyǧan orai, bas qaladaǧy Bılım, Işkı saiasat, Jastar mäselelerı jönındegı basqarmalar men Turizm, dene tärbiesı jäne sport basqarmalarynyŋ basşylary baiandama jasady.

Qai salaǧa bolsyn qosymşa qarajat qajet. Mäselen, Bılım basqarmasy basşysynyŋ mındetın atqaruşy Baǧlan Smataevanyŋ aituynşa, būl salada 1-4 synyp oquşylaryn t­amaqtandyru, keibır mektepterdegı eskırgen kompiuterlerdıŋ ornyna jaŋasyn satyp alu jäne bır­neşe bılım beru mekemesıne kürdelı jöndeu jūmysyn jürgızu üşın qosymşa qarjy kerek eken.

Aldaǧy üş jylǧa josparlanǧan şaralardy jüzege asyru üşın Jas­tar saiasaty mäselelerı jönındegı basqarmaǧa 1 819,5 mln teŋge, sonyŋ ışınde 2015 jylǧa 707,2 mln teŋge qajet. Osy jönınde mälımdegen atalmyş basqarmanyŋ basşysy Talǧat Rahmanberdı kelesı jyly Qazaq handyǧynyŋ 550 jyldyǧyna, so­nymen qatar, Ūly Jeŋıstıŋ  70 jyl­dyǧy men 2015 jyldyŋ Qazaqstan halqy assambleiasynyŋ jyly dep jariialanuyna bailanysty jäne Astana qalasynyŋ beibıtşılık pen kelısım qalasy bolyp ataluyna orai jastardyŋ arasynda keŋ auqymdy ideologiialyq ıs-şaralar ötkızıletının aitty.

Işkı saiasat basqarmasyna qosymşa 40 mln teŋge qajet bolsa, qalalyq Turizm, dene tärbiesı jäne sport basqarmasynyŋ al­daǧy üş jyldyq şyǧyndaryna 18 513,7 mln teŋge, sonyŋ ışınde 2015 jylǧa – 5 879,8 mln teŋge kerek körınedı. Basqarma bas­şy­synyŋ mındetın atqaruşy Samat Qabdulin būl rette qalanyŋ qūrama komandalary müşelerın respubli­kalyq, halyqaralyq jarystarǧa
daiyndap qatystyruǧa, respubli­kalyq maŋyzdaǧy sporttyq ıs-şaralardy ötkızuge, sondai-aq, balalar men jasöspırımderge sporttyq bılım beruge qosymşa qarajat qa­jettıgın alǧa tartty.

Halyq qalaulylary da ünsız qal­mady. Deputat A.Kürışbaev keibır studentter üşın qoǧamdyq kölıkterdegı jol jüru aqysyn töleudıŋ edäuır qiyndyq tuǧyzyp otyrǧanyna alaŋ­dauşylyq bıldırdı. Onyŋ aituyn­şa, ai saiyn studentter universitetke kelıp-ketuge ǧana şamamen 9-10 myŋ teŋge jūm­saidy eken. Al, Almatyda köp balaly, az qamtylǧan otbasylardan şyqqan studentter üşın jolaqy biletterınıŋ qūny arzan.

– Astanada nebary 5 joǧary oqu orny bar. Özderıŋız bılesızder, bızdıŋ Agrotehnikalyq universitette oqi­tyndardyŋ köbı – auyl­dan kelgen ba­lalar. Olardyŋ jaǧdaiy keremet dep aita almaimyz. Öit­k­enı, auylda jūmys joq. Soǧan bailanysty äleu­mettık jaǧynan qorǧalmaǧan otbasylardan şyqqan osyndai studentter üşın ailyq jolaqy biletıne 50 paiyz jeŋıldık qarastyryluyn sūraimyn. Būl mäsele Astanada da oŋ şeşımın tabuy kerek, – dedı A.Kürışbaev.

Odan ärı deputat qala mektep­terındegı üş auysymdyq oqytudyŋ jaiyn sūrady. Osyǧan orai, G.Jüsıpova jaŋadan aşylyp jatqan mektepter sanynyŋ jyl ötken sa­iyn arta tüsuıne bailanysty bügıngı taŋda bızdıŋ qalada būl mäsele asa özektı emes ekenın eskerttı. Deputat B.Solsanov qaladaǧy №20 mektep oquşylarynyŋ üş auysymda oqitynyn, atalmyş bılım beru mekemesınıŋ ǧimaraty qūlaudyŋ az-aq aldynda tūrǧanyn jetkızdı.

Kün tärtıbındegı ekınşı mäselege orai baiandama jasaǧan qalalyq Turizm, dene tärbiesı jäne sport basqarmasy basşysynyŋ mındetın atqaruşy Samat Qabdulin bas qalada Turizm bas­qarmasyn qūru kerek degen pıkır bıldırdı. Mäslihattyŋ tūraqty komissiiasynyŋ müşelerı būl ūsynysty bırauyzdan maqūldady.

Gülbarşyn ÖKEŞQYZY