Juyrda Prezident Nūrsūltan Nazarbaevtyŋ Qazaqstan halqyna Joldauy jariialandy. Bas qūjatta bılım salasyna qatysty maŋyzdy mäseleler qozǧaldy. Al, Memleket basşysynyŋ tapsyrmasyn jedeldetu maqsatyndaǧy şaralar bastalyp kettı. Aitalyq, «Atameken» Qazaqstan kartasy» etnomemorialdyq keşenı ūiymdastyrǧan «Üzdık sabaq» baiqauy märesıne jettı.
«Täuelsızdık – tıregıŋ, egemendık – eldıgıŋ» atty şaranyŋ jeŋımpazdaryn marapattau räsımı keşe Beibıtşılık jäne kelısım saraiynda öttı.
Baiqauǧa 107 ūstaz qatysyp, 89 sabaq ötkızgen. Onyŋ 74-ı – qazaq tılınde, 10 sabaq – orys tılınde, 5 sabaq aǧylşyn, orys, qazaq tılderınde öttı. Osy sabaqtarǧa barlyǧy 2225 oquşy atsalysqan.
«Atameken» Qazaqstan kartasy» etnomemorialdyq keşenı būl bılım dodasyn üşınşı jyl ūiymdastyryp otyr. Mūrajai men mektepterdıŋ özara qarym-qatynasynda jaŋa ürdıs qalyptastyrudy maqsat etken şaraǧa mektep basşylary men ūstazdar belsendı qatysty. Erekşe qyzyǧuşylyq tanytty» deidı etnomemorialdyq keşennıŋ direktory Ümıthan Mūŋalbaeva.
Baiqau qorytyndysy boiynşa jiyrma tört nominasiianyŋ jeŋımpazdary diplomdarmen marapattaldy. Sonymen qatar, ūstazdarǧa demeuşıler baǧaly syilyqtar tabys ettı. Al «Üzdık sabaq» baiqauynyŋ bas jüldesıne ie bolǧan №54 mekteptıŋ ūstazy Gülbarşa Bürkıtbaiqyzy men №68 mekteptıŋ mūǧalımı Naǧaşybergen Karbozǧa jüz myŋ teŋge berıldı. Sondai-aq, «Atameken» Qazaqstan kartasy» etnomemorialdyq keşenımen tyǧyz qarym-qatynas ornatqan ekı ūstazǧa Türkiia men Bırıkken Arab ämırlıkterıne joldama tabys etıldı. Osyǧan qosa 72 ūstaz sertifikatpen, 35 mūǧalım erekşe diplommen marapattaldy. Al, baiqaudy ötkızuge belsene qatysyp, joǧary ūiymdastyruşylyq tanytqan alty mekteptıŋ basşysy men orynbasarlary alǧys hattarǧa ie boldy.
Gülmira AIMAǦANBET
