Futboldan Qazaqstan ūlttyq qūramasy FİFA reitingınde 18-orynda tūrǧan, kezınde Europa chempiony bolǧan Daniia qūramasyn ūtty. Ūtqanda 0:2 esebımen ūtylyp tūryp, jeŋıstı jūlyp äkettı!
Älemdık aqparat közderı 2024 jyly ötetın Europa chempionatynyŋ ırıkteu kezeŋınıŋ ekınşı turynda Qazaqstan futbolşylary sensasiia jasady dep jarysa jazyp jatyr.
Kelesı üşınşı turdyŋ oiynyn Qazaqstan qūramasy 16 mausymda syrt alaŋda oinaidy. Qarsylasy – San-Marino.
26 nauryzda keşkılık «Astana Arena» stadionyna asyqtyq. Ortanqol komanda emes, FİFA reitingınde 18-orynda tūrǧan Europa komandasy – Daniia qūramasymen Qazaqstan ūlttyq qūramasy 2024 jylǧy Europa chempionatynyŋ ırıkteu satysynda kezektı oiyn ötkızedı. Ädettegıdei ortalyq alaŋǧa baratyn barlyq köşelerde kölık keptelısı jürısımızdı tejedı. Bärı stadionǧa baǧyt alǧany anyq.
1 saǧat 20 minutta stadionǧa jetıp quandyq-au, alaida oǧan kırıp, ornymyzǧa jaiǧasamyz degenşe taǧy jarty saǧat uaqyt öttı. Ne kerek, belgılengen 19:00-de oiyn bastaldy. 30 myŋ adam erkın syiatyn «Astana Arenada» ine şanşar oryn joq. Janküierlerdıŋ jalyndy qoldauynan jıgerlengen Qazaqstan futbolşylary oiyndy bastap ta kettı.
Ä degennen-aq Daniia şabuyldy üdettı. Alaŋdaǧy janküierler demın ışıne tartyp, emosiiasyn sabyrǧa basyp otyr. Endı şe, Ūlttar ligasynda Kilian Mbappe, Antuan Grizmann, Olive Jiru syndy älem futbolynyŋ jūldyzdarynan qūralǧan Fransiia qūrama komandasyn ekı ret ūtqan Daniia osal komanda emes. Älemnıŋ kez kelgen üzdık komandasymen deŋgeiles, oiynşylarynyŋ şeberlıgı şyŋdalǧan. Ärı Europanyŋ üzdık futbol klubtarynda öner körsetedı.
Qysqasy, kezdesude daniialyq futbolşylardyŋ basymdyǧy baiqalyp tūrdy. Nätijesınde Rasmus Heilunn 21-minutta bızdıŋ qaqpaşy David Loriianyŋ üstınen dopty asyryp jıberıp, qaqpadan saŋylau tapsa, 36-minutta eseptegı basymdyqty arttyryp, qos goldyŋ avtory atandy.
Magomed Adiev, Qazaqstan ūlttyq
qūramasynyŋ bas bapkerı:
– Oiynşylarmen äŋgımelesıp, jauapkerşılıktı öz moinyma alatynymdy, jıgıtterge tek oinau keregın tüsındırdım. Daniiamen kezdesude bırınşı kezeŋ bız oilaǧandai bolǧan joq. Ekı goldyŋ soǧyluy qatelık saldarynan boldy. Ekınşı kezeŋde oiynşylardyŋ bır-bırın tüsınuı qalypqa kele bastady. Ony oŋtaily paidalana aldyq.
Ekınşı kezeŋde Qazaqstan futbolşylary belsendılık baiqatyp, şiraq qozǧalyp, ūrymtal sätterdı ūtymdy paidalanuǧa tyrysty. Söitıp qarsylas komandanyŋ qaqpasy maŋynda jiı boi körsettı. Oiynnyŋ 73-minutynda daniialyq futbolşylar özınıŋ aiyp alaŋynda ereje būzdy. On bır metrlık penaltidı Baktier Zainutdinov sauatty oryndap, esep aiyrmasyn qysqartty.
Al 86-minutta Ashat Taǧybergennıŋ alystan şırene tepken doby qaqpa torynan tabylyp, esep teŋestı. Osy sätte jaŋadan berı emosiiasyn ışıne saqtap otyrǧan qazaqstandyq janküierlerdıŋ dauysy alaŋda jaŋǧyryp, qūlaqty jaryp jıbererdei äser ettı. Teŋızdıŋ tolqynyndai tulaǧan janküierler bır otyryp, bır tūryp, stadionda merekelık köŋıl küi ornatty. Qyzyqtyŋ kökesı alda eken. Arada üş minut ötkende, iaǧni 89-minutta äuelep kelgen dopty Abat Aiymbetov baspen qaqpaǧa engızdı. «Astana Arenaǧa» jinalǧan körermenderdıŋ quanyşynda şek joq. Bırı jylap, ekınşısı quanyp jatyr. Būl emosiiany sözben aityp jetkızu qiyn…
Osylaişa, Qazaqstan qarsylasynan 3:2 esebımen basym tüsıp, sensasiia jasady. Ekı komanda būǧan deiın tört märte kezdesken-dı. Onyŋ barlyǧynda daniialyq futbolşylar jeŋıske jettı. Būl joly qazaqstandyq qūrama sol ketken esenı qaitardy.
Endı Qazaqstan aldaǧy oiynyn 16 mausymda syrt alaŋda San-Marinoǧa qarsy ötkızedı.
Aita keteiık, Qazaqstan qūrama komandasy «N» tobynda San-Marino, Soltüstık İrlandiia, Finliandiia, Sloveniia qūramasymen oinaidy.
