Darhan QYDYRÄLI, Türkı keŋesı Bas hatşysynyŋ orynbasary.
Älıppe, taŋba – tek örkeniet pen mädeniettıŋ rämızı ǧana emes, memlekettıŋ täuelsızdıgın de bıldıretın airyqşa simvol. Ol memlekettıŋ öz joly, öz taŋdauy jüzege asyp otyrǧanyn körsetedı. Sonyŋ ışınde, latyn älıppesı bügınde jahandyq qoldanysqa ie boluda, sondyqtan ol qazaq halqynyŋ älemdık ürdıske aralasuyna da yqpal etedı. Onyŋ üstıne qazırgı qarıppen qoǧam ekıge jarylyp otyr. Mäselen, qazaq tılınde «Mäskeu», «Qaraǧandy» dep, al orys tılınde «Mos-kva», «Karaganda» dep jazyp jürmız. Latyn qarpı arqyly emlenı qazaqşalandyrsaq, būl mäsele bırızge tüser edı. Būl el azamattarynyŋ qazaq tılın tezırek üirenuıne de septıgın tigızedı. Sondyqtan, älıppe auystyru bır jaǧynan sanany sılkındırıp, qoǧamdy bırıktırıp, el täuelsızdıgın nyǧaitsa, ekınşıden, jahan jūrtşylyǧymen de bailanysyn arttyra tüsedı. Özıŋız bılesız, Äzerbaijan, Türkiia, Özbekstan jäne Türkımenstan äldeqaşan latyn qarpıne köşken. Taiauda Türkı keŋesınde osy mäselege qatysty jiyn ötkızıp, Türkı akademiiasy būl mäselege qatysty ǧylymi jūmystaryn bastaǧan edı. Sondyqtan Elbasynyŋ öz Joldauynda 2025 jyldan bastap tūtas latyn älıpbiıne köşemız degen maqsat qoiuy – qūptarlyq jaǧdai.