Qazır elordada qala äkımdıgınıŋ qoldauymen balalar men jasöspırımderdıŋ türlı sport üiırmelerıne tegın qatysuyna köp mümkındıkter jasaluda. Solardyŋ bırı – biyl mamyr aiynda Baiqoŋyr audanyndaǧy «Öndırıs» tūrǧyn alabynda № 7 Balalar men jasöspırımder sport mektebınıŋ filialy retınde aşylǧan Dene şynyqtyru-sauyqtyru keşenı. 350 balany sporttyŋ tür-türıne tegın üiretuge qauqarly keşenge qazırgı taŋda äzırge 100 bala ǧana qatynap jür.
Keşen basşysy Almaz Şaihinnyŋ aituynşa, türlı äleumettık jaǧdaidaǧy tūrǧyndar üşın osyndai tegın sport üiırmelerı balalardyŋ sportqa jaqyn bolyp qana qoimai, qalalyqtan bastap, respublikalyq, tıptı älemdık dodalarda qabıletın tanytuyna zor mümkındık beredı. Alaida keşen ǧimaraty qala şetınde ornalasyp, ärı jaŋadan aşylǧandyqtan ony äzırge köbı bılmei, sodan üiırmelerge qatysatyn balalar sany da kemşındeu bolyp tūr.
– Zamanaui jabdyqtalǧan su jaŋa ǧimaratta sporttyŋ küres, kekuşinkai-karate, boks, kikboksing, grepling, djiu-djitsu, sambo, taekvondo degen jekpe-jek küreske baǧyttalǧan 8 türıne 1-11 synyp aralyǧyndaǧy barlyq mektep oquşylary kelıp, aqysyz türde jattyǧuyna bolady. Bolaşaqta sport üiırmelerınıŋ sanyn älde de köbeitu közdelıp otyr. Jattyqtyruşy ūstazdardyŋ bärınıŋ öz salasy boiynşa belgılı bır deŋgeide jetken därejelerı bar. Balalar taŋdaǧan sport türı boiynşa aptasyna üş ret, 1,5 saǧattan jattyǧa alady. Dene şynyqtyru jäne sauyqtyru keşenınde türlı baǧytta sportpen şūǧyldanatyn balalardyŋ bolaşaqta respublikalyq jäne halyqaralyq jarystarǧa qatysyp, baq synauǧa mümkındıgı zor. Eŋ myqtylary Astana qalasynyŋ qūrama sport komandasyna, tıptı ūlttyq qūramaǧa da öte alady. Mūnda jattyǧular ötkızılıp qoimai, joǧaryda aitylǧan sport türlerınen jarystar men turnirler de jiı ūiymdastyrylady, – deidı keşen basşysy.
Astana qalasy jäne Baiqoŋyr audany äkımdıgınıŋ qoldauymen jäne «Şet aimaqsyz astana» tūjyrymdamasynyŋ negızınde salynǧan keşen ǧimaraty 2664 şarşy metr aumaqty alyp jatyr. Keşende 3 zal bar, bırınşısı – 215 şarşy metrlık küres zaly, ekınşısı aumaǧy – 595 şarşy metr ämbebap zal, üşınşısı – 93,2 şarşy metrdı qūraityn jattyǧu zaly. Sonymen qatar balalardyŋ kiımın auystyratyn, duş qabyldaityn oryndary bar.
– Būl ǧimaratta sondai-aq mamandandyrylǧan Halyqqa qyzmet körsetu ortalyǧy, Baiqoŋyr audanyna qarasty kıtaphana da qatar otyr. Mūnyŋ da bızge tiımdılıgı zor. Sebebı balalaryn üiırmelerge alystan äkep qatystyratyn ata-analar bır jarym saǧatyn bosqa kütıp, tekke ötkızbeu üşın osy HQKO-da şarualaryn tyndyryp nemese kıtaphanaǧa bas sūǧyp, bılımmen susyndai alady. Ata-analar üiırmedegı balasynyŋ jattyǧuy bıtkenge deiın özımen bırge ertıp äkelgen kışılerın ǧimarattyŋ syrtyndaǧy oiyn alaŋy men ışındegı oiyn zalyna jıbere alady.
Sondai-aq mūnda qala tūrǧyndary bos uaqytynda kelıp, şahmat, toǧyzqūmalaq oiyndaryn arnaiy bölmede oinai alady. Egde jastaǧylar üşın arnaiy klub jūmys ısteidı. Odan bölek, uchaskelık polisiia bölımşesınıŋ de osy keşen ǧimaratynda ornalasuy qoǧamdyq tärtıp pen qauıpsızdıktı qamtamasyz etude bızge kömegı tiedı. Al sport jarystary ötetın kezde balalardyŋ qarny aşyp qalmauy üşın ǧimarattaǧy bufet aşylyp, №7 sport ortalyǧynan aspazdar kelıp, jūmys ısteidı. Sporttyq nysan aumaǧynda 86 oryndyq avtotūraq bar. Keşennıŋ osyndai artyqşylyqtary köp, – deidı Almaz Şaihin.
Elordanyŋ şet aimaǧyndaǧy Öndırıs köşesı, 14a mekenjaiynda ornalasqan sport nysanyna qazırgı taŋda №24, 30 avtobustar ǧana qatynaidy. Alaida būl qoǧamdyq kölıkterdıŋ ärqaisysynyŋ jüru jiılıgı 30 minutty qūraidy. Sondyqtan Almaz Şaihin osynda qatynaityn avtobustar sany köbeitılse, bolmasa qoǧamdyq kölıktı ūzaq kütetın balalar toŋyp qalmau üşın keşen maŋaiyna jylytylǧan aialdamalar salynsa dep äkımdıkke ötınış tılegın jetkızdı.
Baiqoŋyr audany äkımdıgı tūrǧyn alaptardaǧy halyqtyŋ jaily ömır süruı üşın jaǧdai jasap, äleumettık-mädeni infraqūrylymdy damytuda qala äkımdıgımen bırge osyndai jūmystardy josparly türde jüzege asyrudy jalǧastyra bermek. Endı atalǧan sport keşenıne qatysty joǧaryda aitylǧan mäselelerdı şeşudı de qolǧa alady degen senımdemız.
