Astanada köpbalaly otbasynan şyqqan jäne erekşe balalarǧa arnalǧan jeŋıldıkpen qosymşa bılım beretın «Jaqsylyq arifmetikasy» oqu ortalyǧy aşyldy.
Ortalyqtyŋ aşylu räsımıne Astana qalasy äkımınıŋ orynbasary Eset Baiken, qalalyq ışkı saiasat basqarmasynyŋ bastyǧy Däuren Babamūratov qatysty. Jaŋa ortalyq direktory Ūljan Myrzageldieva mekemenı aşuda jäne jūmysyn jandandyruda ülken qoldau körsetken Astana qalasy äkımdıgıne rizaşylyǧyn bıldırdı.
– Būl ortalyqtyŋ maqsaty – köpbalaly jäne az qamtylǧan otbasylardyŋ balalaryn tegın jäne 50 paiyz jeŋıldıkpen oqytu. Alǧaşqy oqu ortalyǧyn elordada 187 köşe, 20/4 üiden aşqanbyz, onda 102 köpbalaly otbasynan şyqqan 197 bala mektepke daiarlau toby, ūzartylǧan kün toby, aǧylşyn tılı, şeşendık öner, qyzyqty matematika, dombyra, gitara, şahmat, körkemöner boiynşa tegın bılım aluda. Olarǧa 18 mūǧalım bılım beredı. Al myna E.Serkebaev köşesınen aşylyp jatqan ekınşı oqu ortalyǧynda 250-300 balaǧa deiın oqytuǧa mümkındık bar. 10 türlı pän boiynşa sabaq beremız. Mūǧalımder jetkılıktı. Qala äkımdıgınıŋ qoldauymen Jūmyspen qamtu ortalyǧy arqyly Eŋbek baǧdarlamasymen 10 qyzmetkerdı jūmysqa qabyldadyq. «Jastar praktikasy» jobasymen 4 jas mamannyŋ täjıribe jinauyna kömek berıp otyrmyz. Oǧan qosa jaŋa ortalyqtyŋ 156/7 şarşy metrlık ǧimaratyn qala äkımdıgınıŋ qoldauymen öte tömen baǧaǧa 5 jylǧa jalǧa aldyq. Būl da – ülken kömek. Onyŋ ışın jöndeuge de äkımdık tarapynan kömek körsetıldı, – deidı Ū.Myrzageldieva.
Ortalyq qoǧamdyq qor negızınde jūmys ısteitındıkten tek bılım berumen şektelmei, qaiyrymdylyq ıs-şaralar ötkızumen de ainalysady. Ötken jyly osy ortalyqtyŋ 20 balasy, byltyr 70 şäkırtı respublikalyq «Baldäuren» lagerınde demaldy. Aşylu saltanatynda söz alǧan qala äkımınıŋ orynbasary Eset Baiken el erteŋı – jas ūrpaqty myqty etıp tärbieleude osyndai qosymşa bılım beru ūiymdarynyŋ köptep aşyluy qajet ekenın jetkızdı.
– Qalamyzda 150-den astam qosymşa bılım beru ortalyqtary bar, sonda 98 myŋ bala bılım alady. Degenmen astananyŋ keibır audandarynda olar älı de jetıspeidı. Äsırese, osy ortalyq aşylyp jatqan Saryarqa audanynyŋ tūrǧyndary tarapynan qosymşa bılım beru ūiymdaryn aşu turaly ötınışter köp tüstı. Balalardy jan-jaqty öner men bılımge baulityn ortalyqtardy aşu bar da, onyŋ jūmysyn ärı qarai ülken jauapkerşılıkpen döŋgeletıp alyp ketu – bölek äŋgıme. Ol qajyrly eŋbektı, şydamdylyqty talap etedı, mūny bastaǧan käsıpkerdıŋ bırden kümp etıp köp aqşaǧa kenele qoiuy da neǧaibyl, sondyqtan būl ıstı öz käsıbın jaqsy köretın, jankeştı adamdar ǧana qolǧa alady. Osy tūrǧyda Ūljan hanymnyŋ jūmysy joǧary deŋgeide ekenıne köz jetıp keledı, – dedı E.Baiken.
Ortalyqtyŋ şäkırtterı men ūstazdary kelgen qonaqtarǧa konserttık baǧdarlamasyn ūsyndy. Ū.Myrzageldievanyŋ aituynşa, būl – äleumettık käsıpkerlık negızınde «Jaqsylyq arifmetikasy NS» qoǧamdyq qory aşyp jatqan ekınşı oqu ortalyǧy. Köp ūzatpai osyndai üşınşı ortalyqty Almaty audany, Abylaihan köşesı, 56 üi mekenjaiynan aşu közdelıp otyr.
