Järmeŋke jūmys ūsynady
Astana qalasy äkımdıgınıŋ Jūmyspen qamtu ortalyǧy bos jūmys oryndary järmeŋkesın ūiymdastyrdy.
«Saparjai» avtobeketı ǧimaratynda ötken būl şaraǧa «Astana Su arnasy» MQK, «Alma TV» JŞS, «Astana kögaldandyru qūrylysy» AQ, «SMEU Astana» JŞS, Astana qalasynyŋ Işkı ıster departamentı jäne basqa da elordanyŋ jiyrmaǧa tarta käsıporny qatysty.
Järmeŋke kezınde azamattarǧa 200-den astam jūmys orny ūsynyldy. Olardyŋ arasynda satuşy menedjer, jürgızuşı, baǧdarlamaşy jäne IT mamany, tıgınşı-operator, qūrylysşy jäne basqa da mamandyqtar boiynşa ärtürlı deŋgeidegı qyzmetter bar edı.
Ädettegıdei, bos jūmys oryndary järmeŋkesıne qala tūrǧyndary köp jinaldy. Olardyŋ bırazy «Jūmyspen qamtu – 2020» jol kartasyna qatysu mäselelerı jönınde keŋes alsa, 136 adam jūmys beruşımen betpe-bet äŋgımelesu mümkındıgıne qol jetkızdı. Al, taǧy 81 azamat jastar praktikasyna jäne äleumettık jūmys oryndaryna jūmysqa ornalasuǧa qatysty aqparat alyp, jüzdegen adam käsıptık oqytu mäselesı boiynşa özderın qyzyqtyrǧan saualdarǧa jauap tauyp qaitty.
Näzira SAILAUQYZY