Senbı künı, 2013 jyldyŋ 1 mausymynda ärıptesımız, Arqa öŋırıne tanymal jurnalist Natalia Zelenia 42 jasqa qaraǧan şaǧynda mezgılsız dünieden öttı. Öte sypaiy, sezımtal, adamgerşılıgı mol jannan qapyda köz jazyp qalǧanymyz qabyrǧamyzdy qatty qaiystyrdy.
Nataşa – ainalasynan ūdaiy jaqsylyq, ızgılık ielerın ızdeitın, ärdaiym igı jaqsylarǧa juyq jüretın. Sodan da bolar, keŋdık, adaldyq, bauyrmaldyq deitın tolyp jatqan jaisaŋ mınezdıŋ jaqsy belgılerı Nataşanyŋ bır özınıŋ boiynan tabylatyn. Ūlty orys bolsa da, qazaqy ortada tärbielengendıkten be eken, memlekettık tılde erkın söilegende meiırlenıp qalatynymyzdy qalai jasyraiyq?! Bız oǧan ūzaq jyl «Vecherniaia Astana» gazetınde eŋbek etken jyldarda kuä boldyq. Keiın ol qalalyq, respublikalyq deŋgeidegı türlı basylymdarda tılşı qyzmetın atqara jürıp, oily maqalalarymen oqyrmandarynyŋ jüregınen jol tapty. Özı eŋbek etken ortaǧa ǧana emes, jalpy köpşılıkke qadırlı azamat edı…
Botadai közderınen şuaq, külımdegen jüzınen meiırım tögılıp tūratyn. Öz ısıne jauapty ärı ūqypty ol ainalasyndaǧylarǧa qaşanda qamqorlyq tanytyp, qolynan kelgenınşe kömek qolyn sozyp jüretın. Qamşynyŋ sabyndai qysqa ǧūmyr keşken Nataşa äu bastan özı üşın emes, özgeler üşın ömır sürgendei. Ol jany şuaqty, jüregı şyraqty kısılermen pıkırlesuge, aralasuǧa asa qūştar-tyn. Al, dos-ärıptes degende şyǧarǧa jany bölek edı… Osyndai adamnan airylu – bız üşın öte auyr jaǧdai. Sondyqtan, senıŋ ornyŋ oisyrap tūr.
Bız senı saǧynamyz, qaiǧyramyz, joqtaimyz… Bızdıŋ köŋılımızdegı adal dostyqtyŋ ülgısı – sen ǧana. Az ǧūmyrynda adamdyqtyŋ ülgısın körsetıp, jürek qalauymen taŋdap alǧan qiyn da qyzyqty, auyr da abyroily mamandyqtyŋ märtebesın kötere bılgen onyŋ jarqyn beinesı, janyndaǧylarǧa sıŋırgen önegelı ısterı ärqaşan da bızdıŋ jadymyzda mäŋgı saqtalady. Ortamyzda joq bolsaŋ da, mäŋgılık jüregımızdesıŋ, Nataşa!!!
«Astana aqşamy» gazetındegı
bır top ärıptesterı
