Kez kelgen el ekonomikasynyŋ negızı şaǧyn jäne orta käsıpkerlıkpen tıkelei bailanysty. Qalalyq mäslihattyŋ mäjılıs zalynda ötken «Deputat künı» aiasynda elordalyq halyq qalaulylary däl osy mäsele töŋıregınde pıkır bölısıp, Astanadaǧy şaǧyn jäne orta biznestıŋ ahualymen tanysty.
Damyǧan elderdıŋ täjıribesıne süiensek, şaǧyn jäne orta käsıpkerlıktı qalyptastyru men damytu eldıŋ ekonomikasyn köterude maŋyzdy orynǧa ie. Osy jönınde äŋgımelegen qalalyq Käsıpkerlık jäne önerkäsıp basqarmasynyŋ basşysy Mälika Bektūrova soŋǧy kezde qalada şaǧyn jäne orta biznespen belsendı türde ainalysyp kele jatqan azamattar qatarynyŋ artyp otyrǧanyn alǧa tartty. Sonyŋ nätijesınde qala biudjetıne tüsetın salyq mölşerı de ūlǧaiuda.
Basqarma basşysynyŋ aituynşa, tek 2014 jyly şaǧyn jäne orta käsıpkerlık subektılerınen ǧana qala biudjetıne 212 mlrd teŋge qarjy tüsken. Şaǧyn jäne orta käsıpkerlıkpen ainalysuşylar 22 jobany jüzege asyryp, 3 myŋǧa juyq jaŋa jūmys oryndarynyŋ aşyluyna yqpal ettı. 2015 jyldyŋ soŋyna deiın taǧy alty jobanyŋ jüzege asyrylatynyn, atap aitsaq, säuır aiynda tıgın fabrikasynyŋ aşylatynyn aita kele, basqarma basşysy elordada şaǧyn käsıpkerlıkpen ainalysqysy keletın azamattarǧa barlyq jaǧynan qoldau körsetılıp, būl baǧytta mol mümkındıkter qarastyrylyp otyrǧanyn jetkızdı.
– Qalada şaǧyn jäne orta käsıpkerlıkpen ainalysuşylar belsendılık tanytyp keledı. Olar önım öndıru men qyzmet körsetu kölemın 43,6 paiyzǧa ūlǧaitty, – dedı M.Bektūrova.
Sonymen bırge aldaǧy uaqytta Astana aumaǧynda jaŋa ekı joba jüzege asyrylmaqşy. Olardyŋ alǧaşqysy jas käsıpkerlerdı qoldauǧa baǧyttalǧan. «Astana Jastar» dep atalǧan būl baǧdarlamaǧa 29 jasqa deiıngı jas azamattar qatysa alady. Būl baǧdarlamany jüzege asyru üşın biudjetten 300 million teŋge qarastyrylǧan. Sondai-aq, «Damu» käsıpkerlıktı damytu qory oǧan qosymşa 600 million qarjy bölıp otyr. Atalmyş baǧdarlama boiynşa öz ısın bastaǧysy kelgen jas käsıpkerlerge alǧaşqyda 20 million teŋge nesie berılmekşı.
Qalalyq mäslihattyŋ deputattary būl mäselege orai öz pıkırlerın ortaǧa salyp, jas käsıpkerlerdıŋ elorda biznesıne oŋ yqpal etuın qarastyrudy ūsyndy. Otyrysty qorytyndylai kele, qalalyq mäslihattyŋ hatşysy Sansyzbai Esılov şaǧyn jäne orta biznestı damytu maqsatynda memleket tarapynan qoldau körsetılıp, qolaily jaǧdailar tuǧyzylyp otyrǧanyn, degenmen, osy salada eŋbek etıp jürgen azamattardyŋ sanyn naqtylau qajettıgın atap öttı.
