Jaŋalyqtar

JASTARDY JŪMYSPEN QAMTU – BASTY NAZARDA

ZAH_7084

Jastar saiasaty mäselelerı jönındegı basqarmanyŋ basşysy Talǧat RAHMANBERDIMEN tıldesu barysynda jastardy köbınese jūmyspen qamtylu jönındegı sūraqtar erekşe qyzyqtyrdy.

Arman:

– Astanada jūmys taba almai jürmın. Tüiındeme talap etken soŋ, «telefonmen habaryn beremız» deidı de qoiady. Kömek körsete alasyz ba?

– Keşe ǧana Jūmyspen qamtu jäne äleumettık baǧdarlamalar basqarmasy men Ūlttyq käsıpkerler palatasymen  bırlese otyryp, osy mäselege qatysty äleumettık jobany ıske qostyq. Iаǧni, kez kelgen adam  «Ortalyq bazar», «Artem», «Şapaǧat» jäne «Äsem» sauda oryndarynda aşylǧan jastardy jedel jūmysqa ornalastyru punktıne jaqyndap, būiymtaiyn aityp, saualnamaǧa jauap bere alady. Sol künnen qaldyrmai, jūmys ızdeuşınıŋ tüiındemesın jūmys beruşılerge jıberemız. Ary qarai olar äŋgımelesuge şaqyrylady.

–Bıraq menıŋ arnauly joǧary bılımım joq…

– Serıktesterımız arasynda joǧary bılımdı talap etpeitın 500 bos jūmys orny bar. Mäselen, qūrylysşy kömekşısı, tehnikalyq mamandarǧa, daiaşy, barmen, şaştaraz sekıldı qyzmet körsetu salasynyŋ qyzmetkerlerıne sūranys bar.

Aiman:

Ötken jyly «EHRO-2017» halyqaralyq körmesıne volonterler daiyndalypty. Sol kurstarǧa jazylar edım. Biyl da bola ma?

– «Astana jastary» KMM resurstyq ortalyǧy byltyr 200 volonter daiyndady. Osy jyly taǧy 300-ın oqytu josparda bar. Ony «Astana EKSPO-2017» Ūlttyq kompaniiasymen bırıgıp ıske asyrsaq dep otyrmyz. Bügınde körmenı sättı ötkızgen basqa elderdıŋ täjıribesı zerttelıp,    volonterlık ortalyq qyzmetınıŋ tūjyrymdamasy äzırlenude. Būl joba şıldege qarai bastalmaq. Volonterler körme aiasynda ǧana emes, qalada ötetın barlyq auqymdy şaralardy ūiymdastyruǧa atsalysatyn bolady.

– Volonterler qataryna qosylu üşın qandai talap qoiylady? Onda ne üiretıledı?

– Turisterge elımız ben elorda tarihyn aǧylşyn tılınde baiandai alatyn deŋgeide boluy tiıs.   Al, bızdıŋ tarapymyzdan olarǧa özın-özı ūstau ädebın, qarym-qatynas jasaudyŋ qyr-syry üiretıletın psihologiialyq treningter ūiymdastyrylady.

«EHRO-2017» üş kün emes, üş aiǧa sozylatyndyqtan, esepteuımızge säikes 10 myŋdai volonter daiyndauymyz kerek. Negızgı basymdyq joǧary jäne arnaiy orta oqu oryndarynyŋ bırınşı, ekınşı kurs studentterıne berıledı.

Larisa İvanova:

– Balalarymyzdyŋ bos uaqytynyŋ tiımdı jūmsaluyn qalaimyz. Jeleznodorojnyi kentındegı Qyrqynşy stansiiada aula kluby qaşan aşylady?

– Qazırgı künı bas-aiaǧy 15 aula klubynyŋ tärbielenuşılerı üş myŋnan asady. Al jazda olardyŋ sany jetı myŋǧa deiın jetedı. «Jeleznodorojnyi» tūrǧyn alabyndaǧy aula kluby osy jyldyŋ ışınde aşylady. Būdan bölek, Almaty audanynda taǧy bıreuın aşudy közdep otyrmyz.

Maqsat:

–  «Jasyl el» jastar eŋbek jasaqtarynyŋ qataryna qabyldanǧym keledı. Jalaqysy da jaman emes dep estıdım…

– Būl talpynysyŋyz qūptarlyq eken. «Jasyl el» qozǧalysyna byltyr on jyl toldy. Onyŋ jas­tar arasynda tanymaldylyǧynyŋ artqany quantady. Student kezımde men de osy jasaqtyŋ erıktısı boldym. Sonyŋ arqasynda jaqsy jandarmen jolyqtym, joldastarym köbeidı.

Osy jyly jasaq jūmysşylaryn EKSPO-qalaşyqtyŋ qūrylysyna tartamyz. Mamyrdyŋ soŋyna qarai 500 jas eŋbekkerdı sol aumaqta jūmyspen qamtu oida bar. Jalaqy mölşerı jasalǧan jūmystyŋ kölemıne bailanysty esepteledı. Negızınen 40 myŋ teŋgeden joǧary. Qūrylys jūmystary kezınde jalaqy aiyna 160 myŋ teŋgege deiın jetedı.

Ötınımdı qalai bereiın?

– Ötınımdı Studenttık qūrylys jäne «Jasyl el» jastar eŋbek jasaqtary ştabyna jıberuıŋızge, ne bolmasa jeke mälımetterıŋızdı bızdıŋ basqarmaǧa äkelseŋız bolady.

Valentina İvanovna:

Ūly Otan soǧysy ardager­lerıne qandai qamqorlyq jasalady?

–Jeŋıstıŋ 70 jyldyǧyna orai «Ardager» jobasyn bastadyq. Belsendı jastar künıne 2-3 ardagerdıŋ üiıne baryp, aulanyŋ tazalyǧyn retke keltıruge kömektesedı. Tamaq pısırıp, kiım ütıkteu sekıldı üi şarualaryn bıtıruge septesedı. Poştaǧa kelgen hattardy äkelıp beredı. Alaiaqtyqqa saqtyq retınde bız sol üige kelıp jürgen studenttıŋ fotosy japsyrylyp, aty-jönı men bailanys telefony jazylǧan taqtany ılıp jürmız.  Qariialar auruhanaǧa tüsıp qalsa, hal-jaǧdaiyn bıluge baramyz. Olar jastardyŋ qamqorlyǧyn, meiırımın sezıp, mäz-meiram bolyp qalady. Būl joba jyl boiy jürgızıletın bolady.

Baqytjan:

– Astanada oqu oryndarynyŋ belsendı jastarynan qūralǧan orta qalyptasqan ba?

– Ärtürlı şara barysynda bız ünemı astanalyq oqu oryndary belsendılerınıŋ basyn qosuǧa tyrysamyz. Mäselen, ötken aptada bızdıŋ bastamamyzben Jastar saia­satyn  qoldau memlekettık qory «Student jastarmen jūmysty ūiymdastyru» taqyrybynda ekı kündık seminar-trening  ötkızdı. Treningtı jürgızuge «Jastar» ǧylymi-zertteu ortalyǧynyŋ redaksiialyq baspa  basqarmasynyŋ bas sarapşysy Liudmila Burlachenko şaqyrylyp,  «Studenttık özın-özı basqaru – jüielık tıl tabu. Jastar ısı jönındegı komitettıŋ negızgı qyzmetterı» taqyrybynda interaktivtı därıs oqyǧan bolatyn. Elordalyq joǧary oqu oryndarynyŋ studentterı är tapsyrmany erekşe qyzyǧuşylyqpen oryndap qana qoimai, öz universitetterındegı studenttık ūiymdardyŋ qyzmetın baiandau arqyly özara täjıribe almasuǧa tyrysty. Sol şarada baiqaǧanymyzdai, är oqu orny jastar saiasatyn ärqalai tüsınedı. Öitkenı, qalyptasqan öz qūrylymy men qaǧidalary bar. Bıreulerı jan-jaqty şyǧarmaşyl önerpazdardy tärbieleudı maqsat etse, ekınşılerı oqyp jürgen salalaryna bailanys­ty studentterdıŋ käsıbilıgı men käsıpkerlık qabıletıne erekşe köŋıl böledı. Kezdesuge jinalǧan jastar jaŋa ideialaryn ortaǧa salyp, ūsynylǧan jobalardy talqylady. Qazırgı zamanǧy studenttıŋ imidjı qandai bolu kerek, oqu orny brendın qalyptastyru joldary sekıldı taqyryptar boiynşa jattyǧular jasady. Seminar soŋynda qatysuşylarǧa arnaiy sertifikattar tabystaldy. Sondai-aq, sol jastar jaŋa tanystyqqa quanǧandaryn aityp, öz erıkterımen bırıgıp joba jasau üşın kelesı kezdesu uaqytyn belgıledı. Būiyrsa, sol jastardan qyzyqty ūsynystaryn asyǧa kütemız.  Olardyŋ qoǧamǧa paidaly kreativtı ideialaryn qoldauǧa ärqaşan daiynbyz.

 

Mädina JAQYP

Taǧyda

Ūqsas jaŋalyqtar

Bır pıkır

Pıkır üsteu

Back to top button