2050 jylǧa qarai eldegı balamaly jäne jaŋartylatyn energiia ülesı 50 paiyzǧa jetedı dep josparlanyp otyr. Būl turaly keşe QR Prezidentı janyndaǧy OKQ ūiymdastyrǧan brifingte QR Qorşaǧan ortany qorǧau ministrı Nūrlan Qapparov mälımdedı.
30 mamyr künı Elbasy N.Nazarbaev «Qazaqstan Respublikasynyŋ «jasyl ekonomikaǧa» köşuı jönındegı tūjyrymdama turaly» Jarlyqqa qol qoiǧan bolatyn. «Jasyl ekonomika» elımızdıŋ ornyqty damuyn qamtamasyz etudıŋ maŋyzdy qūraldarynyŋ bırı bolyp sanalady. Atalǧan tūjyrymdama aiasynda 2050 jylǧa qarai JIÖ 3 paiyzǧa artyp, 500 myŋnan astam jaŋa jūmys orny aşylady dep josparlanyp otyr. Ministrdıŋ aituynşa, «jasyl ekonomikaǧa» köşu üşın qajettı investisiialar kölemı jyl saiyn JIÖ-nıŋ şamamen 1 paiyzyn qūraidy. Būl 3-4 mlrd AQŞ dollaryna teŋ.
– Energetikada bız balamaly jäne jaŋartylatyn energiianyŋ ülesın 2030 jylǧa qarai – 30, al 2050 jylǧa qarai 50 paiyzǧa jetkızu maqsatyn qoiyp otyrmyz. Energiia tiımdılıgın joǧarylatuǧa baǧyttalǧan şaralardy jürgızu nätijesınde elektr quatyn öndıru qajettılıgı 2030 jylǧa qarai – 13, al 2050 jylǧa qarai 10 paiyzǧa azaiatyn bolady, – dedı ministr.
Sondai-aq, sala basşysy tūjyrymdama közdegen bırqatar mındetterdı jıktep berdı. Bırınşıden, «Jasyl ekonomikaǧa» köşu 2050 jylǧa qarai 500 myŋ jūmys ornyn aşuǧa mümkındık beredı. Ekınşıden, atalǧan tūjyrymdama Qazaqstan älemnıŋ damyǧan 30 elınıŋ qataryna kıru jönındegı maqsatyna qol jetkızuın qamtamasyz etedı. Üşınşıden, 2030 jylǧa qarai qazaqstandyqtardyŋ elektr energiiasynyŋ 11 paiyzyn jel men künnen, al 8 paiyzyn atomnan aluǧa mümkındık beredı. Odan bölek, elımızde bırqatar jylu elektr stansalary kömırden gazǧa köşırıletını de belgılı boldy. Bügınde elımızde 3,8 trln tekşe metr gaz qory bar ekendıgı däleldengen. Ony ministrlık «kömır men jaŋaratyn energiia közderı arasyndaǧy köpır syndy» tranzittık qor retınde qarastyrady.
Ainūr SANABEK
