Rejisser Aqan Sataevtyŋ şytyrman oqiǧaly «Jaujürek myŋ bala» filmı bügınnen bastap qazaqstandyq körermenderge jol tartty.
Jaŋa kinonyŋ jelısı joŋǧarǧa qarsy küreste saqa sarbazdarmen bırge elın-jerın qorǧauǧa bel buǧan myŋ örennıŋ öjettıgı jönınde örbidı. Sonyŋ ışınde jaujürek Sartai batyr örımdei jastardan qūralǧan jasaǧyn bastap, tu köterıp, joryqqa şyǧady. Olar özderınen qarasy äldeqaida köp jauǧa qarsy şauyp, qazaqtyŋ keŋ baitaq dalasyn qorǧaidy.
Kartinada XVIII ǧasyrdyŋ basyndaǧy «Aqtaban şūbyryndy, Alqa köl sūlama» oqiǧasy, qazaq-joŋǧar arasyndaǧy qandy qaqtyǧys körınıs tabady. Qazaqtyŋ batyr ūl-qyzdarynyŋ bolmysy beinelenedı. Film soŋynda jüzjyldyq soǧysqa nükte qoiylyp, qazaq halqynyŋ joŋǧar ezgısınen mäŋgılıkke azat etken Aŋyraqai şaiqasy körsetıledı.
Qiyn-qystau kezderde öz ruhy men bolmysyn joǧaltpai, el amandyǧy men jer tynyştyǧy üşın ömırlerın pida etken ūly tūlǧalar men jastardyŋ erlıgın möldır mahabbatpen ūştastyrǧan tarihi filmge otandyq kino jäne teatr akterlerı tüsken. Olarmen qosa, filmdegı epizodtyq rölderge monǧol ärtısterı de qatysqan.
«Jaujürek myŋ bala» filmınıŋ basty rölderın de – Asylhan Tölepov, Aian Ötepbergenov jäne körermenderge «Aǧaiyndy» filmınen tanys Äliia Änuarbek (Telebarisova) oinaidy.
«Film kürdelı klimattyq jaǧdailarda tüsırıldı. Oǧan tüsıruge atsalysqan top 90 kün ışınde tört lokasiia men 11 dekorasiia auystyrdy. Tüsırılım 2011 jyly aqpanda Qapşaǧai aimaǧynda bastaldy. Köktemde tüsıru toby Şaryn şatqaly aumaǧyna, sosyn Qapal-Arasanǧa ornalasty. Jalpy respublikalyq ırıkteuge basty jäne qosalqy rölderge tüsu üşın 22 myŋnan astam ümıtker qatysty. Tüsırılım alaŋyna 500-ge juyq būqaralyq aqparat qūraldarynyŋ ökılderı men şeteldık BBC World News, Reuters, Time, Screen International, The Los Angeles Times, The Independent, Sight&Sound, London Evening Standard, Hollywood Reporter, Variety siiaqty älemge äigılı telearnalar men radio tılşılerı keldı. Qazaq tarihyn beineleitın film 90 künde tüsırıldı» deidı rejisser Aqan Sataev.
«Aǧaiyndy», «Likvidator», «Adasqan», «Reketir» filmderın jaryqqa şyǧarǧan tanymal rejisserdıŋ būl jobasy qazaq kinosynyŋ damuyna sübelı üles qosatyny sözsız. Būl tuyndy būryn-soŋdy tarihi jobalardy tüsırıp körmegen kinogerdıŋ atalmyş taqyryptaǧy alǧaşqy qadamy. Äskeri-patriottyq tolyqmetrajdy ekşn janrynyŋ elementterı bar körkem film biudjetı 12 mln AQŞ dollaryn qūraǧan.
Basty jäne janama keiıpkerlerdıŋ kostiumderı arnaiy tapsyryspen köne baǧyttaǧy ülgımen tıgılgen. Joŋǧar men qazaq sarbazdary üşın oqa-äşekeiler, qaru-jaraqtar, sauyt-saimandar men at-äbzelderın otandyq şeberlermen qatar, Britaniia, Qytai, Ündıstan, Belarus kompaniialary arnaiy jasaǧan. Tarihi kartina şynaiy şyǧu üşın barlyq rekvizitter sol däuırdıŋ sipatynda ıstelındı. Film tüsıru jūmystary bastalmai jatyp, barlyq akterler atqa jaidaq mınu, qaru- jaraqtardy ūstau, sadaq atu t.s.s ädıs-täsılderden därıs alǧan.
Būl film mamyrdyŋ 17-sı künı älemge äigılı Kann festivalınıŋ aiasynda ötkızıletın Kann kino naryǧy şeŋberınde körsetıledı. Äzırge synşylar būl film qazaq kinosynyŋ mereiın asqaqtatady dep boljap otyr. Jaujürek myŋ sarbazdyŋ batyrlyǧy qazaq bolmysyn älemge paş etetın qūndy qazynaǧa ainaluyna bız de tılektespız.
Erkejan KÖPTILEUQYZY
