Jaqynda feisbuk jelısınde Jasūlan Serık esımdı azamat «Men qalai oquşyǧa kıtap oqyttym?» degen taqyrypta jazba jariialady. 2014 jyldan bastap mektepke mūǧalım bolyp ornalasqan ol, balalardy ädebietke qyzyqtyru üşın öz qaltasynan aqşa şyǧaryp, bäige jariialaǧanyn aitqan.
«Eŋ bırınşı jūmysym synyptyŋ deŋgeiıne kelerlık ädebi şyǧarmalar taŋdau boldy. Alǧaşqy üş aiǧa şyǧarmalardy taŋdap, habarlandyru jasadym. Tıptı taŋdalǧan şyǧarmany qai jerden, qai saittan aluǧa bolatynyna deiın jazyp qoidym. Bırınşı aiǧa qoiylǧan şyǧarma Mūhtar Äuezovtıŋ «Qaraş-qaraş oqiǧasy» boldy. Kıtap oqu saiysyna öz qaltamnan qarjy tıktım. 1-orynǧa – 3000 teŋge, 2-orynǧa – 2000 teŋge, 3-orynǧa – 1000 teŋge jäne 500 teŋgeden 3 yntalandyru syilyǧy boldy» deidı ol.
Osylai belgılengen uaqyttan keiın saiysty bastap, şyǧarma ışınen keiıpker mınezı, oqiǧalar nemese şyǧarmadan ekı-üş söilem ǧana aityp ärı qarai ılıp äketu degen sekıldı tapsyrmalar bergen Jasūlan alǧaşqyda şaraǧa 10-nan asa oquşy qatysqanyn jazypty. Ekı saǧatqa sozylǧan syn saǧat öte qyzyqty ötken. Al kelesı aida qaita bastalǧan saiysqa basqa synyptyŋ oquşylary da ötınış bıldırıp, qatysady. «Abai jolynan» bastap şetel ädebietıne deiın qamtyǧan osy şaranyŋ yqpalymen mektep, audan kıtaphanasyna balalar köptep bara bastapty.
Öz basym qazırgı künı «kıtap oqymaityndar zamanynyŋ» köşıne mektep mūǧalımderı de ılesıp ketkenın joqqa şyǧara almas edım. Ony mūǧalımderdıŋ jai ǧana söz qoldanysynan aŋǧaruǧa bolady. Ädebiet oqymaityn ūstazdardyŋ ışkı mädenietı körkemdık deŋgeige jete almaidy. Olardyŋ sözdık qory da jūtaŋ keledı. Sol sebeptı, sabaq üstınde auzynan balaǧa ūrysqanda «quasyŋ ba?», «basyŋ ıstei me?» degen sekıldı dörekı sözder şyǧyp jatuy da mümkın.
Al özı kıtap oqymaityn mūǧalım balalarǧa kıtap oqy dep aita ala ma?
Şirek ǧasyr būryn mektep oquşylary öz erkımen kıtaphanaǧa baratyn. Är üide mındettı türde ertegı kıtaptar, odan soŋ balalarǧa arnalǧan äŋgıme, povester jinaǧy tabyluşy edı. Al «Ūlan» gazetı, «Baldyrǧan» jurnaly balalardyŋ süiıktı basylymdary bolatyn.
Jazda üş ai demalystan keiın qyrküiekte mektepke barysymen mūǧalımder «Qane, jazda kım qandai kıtap oqydy?» dep sūrauşy edı… Balalar özderı oqyǧan kıtaptar jaily jarysa äŋgımelep, bır-bırınen estıgen kıtapty qyzyǧa oquǧa qūmartatyn. Al bügın şe? Jasūlan Serık sekıldı öz qaltasynan aqşa tıgıp, saiys jasamasa da, tym bolmasa «jazda ne oqydyŋdar?» dep sūrauǧa jaraityn mūǧalımder bar ma?
Sız balalardy kıtap oquǧa qyzyqtyra bılgen qandai mūǧalımdı bılesız?
