JER TELIMIN BERUDIŊ TÄRTIBI JAŊARDY
Astanada jer telımın berudıŋ jaŋa täsılderı belgılendı. Ol ekı kezeŋnen tūrady. Eŋ äuelı, jer telımın tekseru, ızdestıru jūmystaryna jäne jobalauǧa rūqsat alu qajet.
Astana qalasy äkımdıgınıŋ «Jer telımderınde jobalauǧa rūqsat etu turaly» qaulysy şyqqannan keiın barlyq sanattaǧy qūrylys saluşylar (jeke jäne zaŋdy tūlǧalar) tekseru, ızdestıru jäne jobalau jūmystaryn jürgızu turaly Säulet jäne qala qūrylysy basqarmasymen kelısımşart jasasady. Būl qūjatta jūmystardy jürgızu uaqyty naqty körsetıledı jäne būl merzım saluşy tarapynan da, Säulet jäne qala qūrylysy basqarmasy tarapynan da mındettı türde saqtaluǧa tiıs.
Keiıngı kezde rūqsat qaǧazdaryn alu tärtıbındegı äkımşılık kedergılerdı azaitu jäne alu uaqytyn qysqartu boiynşa tiıstı jūmystar atqaryluda. Mäselen, jer telımınde tekseru, ızdestıru jūmystaryna jäne jobalauǧa rūqsat beru merzımı 15 künge deiın qysqardy.
Taǧy bır jaŋalyq, qūrylys saluǧa ümıtker tekseru, ızdestıru jūmystaryna jäne jobalauǧa rūqsat alu şaralary kezeŋınde üşınşı tūlǧalardyŋ (üleskerlerdıŋ) qarjysyn tartuǧa qūqy joq. Būl jobalau kezeŋınde jer telımı saluşynyŋ menşıgıne berılmeidı, tek joǧaryda atalǧan jūmystardy jürgızu üşın ǧana ūsynylady degen söz. Osyndai şaralar jauapsyz qūrylys saluşylardy qūrylystyŋ bastapqy kezeŋınde-aq anyqtauǧa mümkındık beredı.
Kelesı kezeŋ – säulet ǧimaratyn salu üşın jer telımın beru. Qūrylys jürgızuge jer telımın beru mäselesı de 15 künde qaralady. Jer telımderı tegın berıledı, al uchaske üşın jalǧa beru aqysy tek ekınşı kezeŋde ǧana tölenedı. Qūjattardy räsımdeu ekı kezeŋde de memleket esebınen jürgızıledı.