Elordalyq jeke käsıpker Amangeldı Ahatov biyl küzde būiyrtsa, alpystyŋ asqaryna şyǧady. Onyŋ osy jasqa kelgenge deiıngı ömır jolyna üŋılsek, bıraz lauazymdy qyzmetterdı atqarǧanyn köremız. Özınıŋ taŋdaǧan mamandyǧyna säikes jiyrma jyldan astam uaqyt qarjy salasynda eŋbektenıp, bank direktory därejesıne deiın köterıldı. Amangeldı aǧamyzdyŋ esımı Qazaqstan Respublikasy Parlamentı Senatynyŋ tarihyna oiyp tūryp jazyldy. Senattyŋ bırınşı şaqyrylym deputaty bolǧanyn meŋzep otyrmyz. Alaida, qandai biıkte jürse de, qarapaiym qalpynan ainyǧan emes. Adamdardy qyzmetıne, äleumettık jaǧdaiyna qarap bölmeidı. Barlyǧyna jüregı aşyq, peiılı keŋ. Mūny redaksiia tapsyrmasymen habarlasqanymyzda baiqadyq.
Habarlasuymyzdyŋ män-jaiyn tüsındıre keteiık. Amangeldı Ahatovtyŋ berekelı şaŋyraǧy biylǧy «Mereilı otbasy» baiqauyna qatysuşylardyŋ qataryna kırdı. Özderın körsetudı maqsat etpegen edı. Amangeldı aǧanyŋ jien nemeresı Mūsanyŋ mekteptegı mūǧalımı otbasy müşelerınıŋ bırınıŋ-bırıne degen jyly qarym-qatynasyn, atasynyŋ jienınıŋ tärbiesıne degen jıtı nazaryn körıp, qolqa saldy.
«Segız ūlym bır töbe, Ertöstıgım bır töbe» demekşı, Amangeldı Qapenūly üşın şynymen de Mūsanyŋ jönı bölek. El aǧasy «jien el bolmas, jelke as bolmas» deitınderdıŋ qatarynan emes. Mūsa halqymyzdyŋ ejelden bastau alǧan dästürıne säikes atasy men äjesınıŋ qolynda tūryp jatyr. Özı sportpen, sonyŋ ışınde futbolmen şyndap ainalysady. Respublika kölemınde ötetın sporttyq jarystarǧa üzbei qatysady. Osy ıste qoldauşysy da, qorǧauşysy da atasy. Tıptı, Amangeldı aǧa basqa qalalarda ötetın keibır jarystarǧa Mūsamen bırge baryp jüredı. Jienınıŋ tärbiesıne qatysty on üş tarmaqtan tūratyn tūtas baǧdarlamany da jasap şyǧarǧany bar. Soŋǧy tarmaǧynda Astananyŋ tūrǧyndary bas qala märtebesıne sai biık mädeniet iesı boluy kerek deidı. Mūsanyŋ qūlaǧyna da ünemı osyny qūiyp otyrady.
Amangeldı aǧanyŋ özı de jasynda sportqa beiım boldy. Alaida, bırqatar jarystarda top jarsa da, ol jönınde şeşılıp aita qoimady. «Jas kezde adamnyŋ basynan ne ötpeidı? Sportqa qazır de beijai qaramaitynymdy ǧana aitaiyn» deidı ol būl turaly.
Az-kem Mūsanyŋ anasy Gülzada jönınde de habar bereiık. Ol mektepte oqyǧan jyldary bimen käsıbi türde ainalysty. Halyqaralyq baiqaudyŋ jüldegerı de atanǧan. Amangeldı aǧa men Şakira jeŋgeide Gülzadadan basqa Abai, Äliia, Janar esımdı balalary bar. Keiıpkerlerımız olardan da nemere-jienderdı süiıp otyr.
Amangeldı aǧanyŋ özıne oralsaq, ol ekonomika taqyrybyna bırneşe kıtap jäne sözdıkterdı jazyp şyǧarǧan. Jalpy, qalamgerlerge degen qūrmetı erekşe. Olardyŋ arasynda dostary da kezdesedı. Mäselen, «Men öz basym Amangeldı Qapenūlynyŋ otbasyn täuelsız elımızdegı maqtauǧa laiyq otbasylardyŋ bırı der edım» dedı jurnalist Sailau Baibosyn odan Amangeldı aǧa jönınde sūraǧanymyzda.
Al, Ahatovtar otbasynyŋ barlyq müşelerı turaly söz sabaqtasaq, olar demalys künderı barlyǧy bır kısıdei keŋ dastarqan basyna jinaludy, tabiǧat aiasyna şyǧudy dästürge ainaldyrǧan. Otbasynyŋ bır müşesı kinoǧa nemese sirkke, älde belgılı bır konsertke barudy josparlasa, mındettı türde özgelerıne habarlap, retı kelse ertıp äketedı. Bır sözben aitqanda, berekesı men bırlıgı ūiyp otyrǧan şaŋyraq.
Amanǧali QALJANOV
