Serik AQŞOLAQOV, Respublikalyq neirohirurgiia ǧylymi ortalyǧynyŋ direktory:
Qarapaiym halyqtyŋ müddesi jolyndaǧy ūsynysym tiisti oryndardan qoldau tauyp, quanyp otyrmyn.
Densaulyq saqtau ministrligi Elbasy Joldauynda aitylǧan tapsyrmalarǧa säikes, Onkologiialyq aurulardyŋ aldyn alu jönindegi baǧdarlamanyŋ jobasyn jasap jatyr.
Üş kün büryn, professor Ken Älibektiŋ jetekşiligimen baǧdarlamanyŋ jobasyn qaraityn jūmys tobynyŋ otyrysyna qatysqanmyn. Aldaǧy uaqytta Astanada Ūlttyq onkologiia ortalyǧy qūrylmaqşy. Meniŋ oiymşa, neiroonkologiia salasy qandai jaǧdaida da neirohirurgiia or-talyǧynyŋ qūramynda qaldyryluy tiis.
Qazirgi kezde älemniŋ jetekşi elderiniŋ medisinasynda «gaima naif» dep atalatyn apparat bar. Onkologiiadaǧy keibir kölemi kişkentai isikterdi operasiia jasamai-aq, osy apparat säulesiniŋ kömegimen 40 minut boiy küidirip, közin joiuǧa bolady. Bizdiŋ otandyq medisinamyz üşin taptyrmas täsil būl. Meniŋ ūsynysymmen jaŋa baǧdarlama aiasynda osy qūrylǧynyŋ bireui satyp alynatyn boldy. Bir apparattyŋ mümkindigi bizdiŋ 16 million halqymyzǧa tolyǧymen jetkilikti.
Aptadaǧy jūmys künderim ädettegidei «operasiia, operasiia, taǧy da operasiiamen» ötti. Künine kem degende ärtürli diagnozben 2-3 operasiia jasappyn. Biraq, būl men üşin qalypty jaǧdai. Tek bir esimde qalǧany, bir kün işinde mi isigine şaldyqqan üş balaǧa qatar operasiia jasadym.
Osy aptadan bastap ortalyǧymyzda qyzmetkerlerimizge arnalǧan ülken jattyǧu zaly aşyldy. Keide küni boiy operasiia bölmesinen şyǧuǧa uaqyt tappaityn därigerlerimiz üşin endi jūmystan keiin bir sät sportpen ainalysyp, serguine zor mümkindikter tudy.
Aptanyŋ jūma künin jaqsy köremin. Sebebi, bizdiŋ otbasymyzda däl osy küni keşkisin asyqpai, jailanyp otyryp, Almatydaǧy nemerelermen telefon arqyly söilesetin dästürimiz bar…
