JYLU BERU MAUSYMY BASTALADY
Keşe Astana äkımı İmanǧali Tasmaǧambetovtıŋ qatysuymen 2014-2015 mausymyndaǧy jylu beru nauqanyna arnalǧan jiyn öttı. Onda qala äkımınıŋ orynbasary Vasilii Krylov jäne Esıl, Almaty, Saryarqa audandarynyŋ äkımderı män-jaidy baiandady.
Vasilii Krylovtyŋ aituynşa, 29 qyrküiekte elordada jylu beru mausymy bastalady. Qystyŋ qaharyna qazırgı uaqytta qaladaǧy jylu ortalyqtary tas-tüiın daiyn körınedı. Astana qalasy mäslihatynyŋ biylǧy şeşımımen qalany jylytu mauysymyna daiyndau jäne ony ötkızu erejesı bekıtılgen bolatyn. Jylu beru däl osy erejege säikes jürgızıledı.
«Bılım beru, densaulyq saqtau jäne mädeniet nysandarynyŋ jylu beru mausymyna daiyndyǧy tolyǧymen aiaqtaldy. Jalpy alǧanda, qala tırşılıgın qamtamasyz etetın mekemeler jylu beru mausymynda üzdıksız ärı tūraqty jūmys ısteuge, elektr energiiasyn jetkızuge tolyq daiyn. Aua raiyn boljauşylarǧa sensek, erteŋnen bastap kün suytyp, aua temperaturasy tömendeidı, jauyn-şaşyn tüsedı. Jalpy, bız qyrküiektıŋ 29-y, iaǧni, aldaǧy düisenbıden jylu beru mausymyn bastauǧa daiynbyz» dedı Vasilii Krylov.
Osydan keiın audan äkımderı kezek-kezek söilep, özderıne qarasty tūrǧyn üiler men äleumettık nysandardyŋ jai-küiın, ondaǧy mäselelerdı jäne jüzege asqan jobalary turaly baiandady. Bıraq älı de atqarylmaǧan jūmystardyŋ bar ekenın aŋǧardyq. Keibır jauapty mekemeler sol jaǧalaudaǧy azdaǧan tūrǧyn üidı qysqy mausymǧa tolyqtai daiyndap ülgermei jatyr eken. Alaida, būl künı tehnikalyq jäne qarjylai kömektıŋ uaqtyly berılıp tūrǧanyna bailanysty moinynda mındetı barlardyŋ syltau aitatyn eş retı joq ekenın bärımız bılemız.
Jiyn soŋynda elorda äkımı İmanǧali Tasmaǧambetov halyq arasynan qoiylǧan sūraqtarǧa naqty jauap berıp, būqaranyŋ boran men aiazdan qorqatyn jönı joq ekenın jetkızdı. Onyŋ sözıne qaraǧanda, äleumettık saladaǧy 170 nysannyŋ 103-ıne jylu berıldı. Al düisenbıden bastap elordanyŋ barlyq balabaqşalaryna, mektepterıne, densaulyq saqtau nysandaryna jylu berıledı.
«Elordada äleumettık salanyŋ bırqatar nysanyna jylu berıldı. Naqtyraq aitsam, qazırdıŋ özınde Astana qalasyndaǧy 29 densaulyq saqtau nysanynyŋ 14-ıne jylu berıle bastady. Būl – 48 paiyzdy qūraidy degen söz. Al 64 balabaqşanyŋ 51-ı, 57 mekteptıŋ 28-ı jylu beru jüiesıne tolyǧymen qosyldy.
Bıraq, bız qazır bärın jaqsy dep ketkenmen, erteŋ-aq tehnikalyq aqaular paida bolyp, ülken mäsele tauyp beruı ǧajap emes. Sondyqtan kez kelgen mezgılde qol qusyryp qarap otyruǧa bolmaidy. Öitkenı, Astananyŋ qysy bärımızge mälım: bırneşe kün boiy 35 gradustan tömen aiaz saqtaluy mümkın» dedı İmanǧali Tasmaǧambetov.
Qazırgı uaqytta ortalyqtan jylytylatyn 2115 köppäterlı tūrǧyn üidıŋ 2086-synda aldaǧy jylu beru mausymyna daiyndyq jūmystary aiaqtalǧan. Qorytyndysynda, Almaty audany 100 paiyzdyq körsetkışpen qysqa daiyn bolsa, Esıl audany – 93, al Saryarqa audany 98,1 paiyz daiyn.
Nūrislam QŪSPANǦALİ