Мәдениетіміздің мәйегімен танысады
Астанада жергілікті жұрт пен сырттан келетін қонақтарға арналған «Бәйтерек», «Думан», «Хан шатыр», «Мега» секілді демалыс орындары баршылық. Алайда, көпшілік оларға ойын-сауық құру үшін бармаса, басқа мақсатты көздемейді. Адамды рухани тұрғыдан байытатын мұражайлар, театрларды қоспағанда, елордада «Атамекен» Қазақстан картасы» этно-мемориалдық кешенінен өзге жерді емге таппайсыз. Бұл олқылықтың орны толтырылмақ. Бас қаламызда бір емес, екі мәдени нысан бой көтермек. Оның бірі – этносаябақ болса, екіншісі – «expo – 2017» халықаралық көрмесі қарсаңында салынатын этноауыл.
ЭТНОСАЯБАҚ ҰЛТТАР МӘДЕНИЕТІН КӨРСЕТЕДІ
Мемлекетімізде 130-ға тарта ұлт өкілдері тату-тәтті тұратыны әмбеге аян. Этносаябақ салудың мақсаты – Қазақстан халқымен қоса шетелден келетін қонақтарды олардың мәдениетімен таныстыру. Бұл орын еліміздегі туризмді дамытуға да мүмкіндік береді деп күтілуде. 132 гектарды алатын аумақта этноауылдар, дендросаябақтар, қонақүйлер, ұлттық асханалар пайда болады. Сондай-ақ, бас жобалаушы «ШАТТ Құрылыс» ЖШС этносаябаққа келушілердің көліктеріне арнаулы орын да бөлмек.
Жоба жетекшісі, сәулетші Ғалым Исабаевтың айтуынша, этносаябақ әлемде теңдесі жоқ нысанға айналмақ. «Өзге елдердегі этносаябақтар негізінен археологияның немесе сәулет өнерінің бір ғана тақырыбын қамтып, бір ғана ұлттың мәдениетін көрсетеді. Ал, Астанадағы этносаябақ полиэтникалық мәдениетті Қазақстанды мекендейтін ұлттардың дәстүрімен біріктіреді» дейді ол.
Сұрап білгеніміздей, саябақтың басты құрылысы этноорталық болмақ. Оған Қазақстан халқы ассамблеясының мәжіліс залы, көрме залдары, барлық этнос мәдениеттерін көрсетететін интерактивті-виртуалды мұражай, мәдениет және өнер орталығы, дәрісханалар, сауда орындары, мұрағаты бар оқу залдары кіреді. Этносаябақта түрлі халықаралық шаралар, құрылтайлар, әлемдік деңгейдегі симпозиумдар өткізілмек. Сәулетшінің пікірінше, бұл орын шағын және орта бизнес өкілдерін де өзіне тартады.
Тағы бір атап өтерлігі, жобалаушылар этносаябақтың экологиялық жағына да көңіл бөліп отыр. Оның аумағында Энерготиімді инновациялық технологиялар орталығы жұмыс істеп, күн батареялары мен жел генераторлары сынды жаңартылатын энергия көздері пайдаланылмақ.
«НАҒЫЗ ҚАЗАҚ ОСЫ, МІНЕ, ТАНЫП ҚОЙ!»
Жақында Астанаға ресми сапармен келген Халықаралық көрмелер бюросының бас хатшысы Висенте Лоссерталес: «Қазақстан павильоны тек баламалы энергия көздерiн игеруді ғана емес, ол сонымен қатар, мемлекеттiң тарихын, мәдениетiн, өнерiн ашып көрсеткенi жөн. Қазақстан тек тақырыптық көрмеге айналып кетпес үшiн, бiз осындай мәселелердi енгiзу жөнiнде талқылаулар жүргiземiз» деген еді.
Расымен, «EXPO-2017» көрмесі кезінде Астанамызға 5 млн қонақ қонақ келеді деп болжануда. Олардың 2 миллионы туристер болмақ. Қонақтар ғылыми жетістіктерімізбен қоса, еліміздің мәдениеті мен тұрмысына да үңілетіні сөзсіз. Сол кезде оларға не көрсетеміз? Әрине, көрсетеріміз жеткілікті. Ең алдымен, бай мәдениетімізден хабар беретін қазақтың этноауылымен мақтана аламыз.
Этноауыл үш мың шаршы метрді алады. Бұл жөнінде жақында «Астана EXPO-2017» Ұлттық компаниясының басқарма төрағасы Талғат Ермегияев мәлімдеді. Оның айтуынша, қазір компания Мәдениет министрлігімен бірге нысанның құрылысын тиянақтап жатыр. Этноауыл ежелден келе жатқан тарихымыз бен мәдениетімізді, дәстүрімізді көрсетеді. Ол жерге шеберлер ауылы да салынады. Бір сөзбен айтқанда, этноауыл арқылы шетелдіктер қазақтар жайлы мағлұмат алатын болады.
Аманғали ҚАЛЖАНОВ