МАХАТМА ЕСІМІН МАДАҚТАДЫ
Бұрнағы күні Ұлттық академиялық кітапхананың «Көгілдір» залында үнді ұлтының атасы және бейбітшілік, әділеттік жолындағы күрескер Махатма Гандидің туған күніне орай өтетін Халықаралық бірлік пен рақымшылық мерекесі ұйымдастырылды.
Салтанатты шара әлемдік деңгейдегі тұлғаның бюстіне гүл шоқтарын қоюдан басталды. Жиынды ашып, сөз сөйлеген кітапхана директорының орынбасары Ғалия Исаханова көпшілікті атаулы күнмен құттықтады. «Махатма Гандидің туған күніне орайластырылған бұл мейрам 2007 жылдан бері БҰҰ Бас ассамблеясының ұйғарымымен әлемнің жер-жерінде аталып өтеді. Бұдан адамдар арасында күш қолданбау қағидасының негізін қалаған тұлғаның шығармалары әлі де маңызын жоғалтпағанын көреміз. 2006 жылы біздің кітапханамызда тұңғыш рет Үнді зерттеу орталығы ашылған болатын. Ондағы М.Гандидің кітабы барша оқырманымыздың құнды дүниесі дер едім. Әсіресе, оның таңдамалы хаттары мен сөздерінің қазақша аудармасы сарқылмас қазынамызға айналған» деді Ғ.Бөкейқызы.
Басқосуда Үндістанның Қазақстан Республикасындағы төтенше және өкілетті елшісі Харш Кумар Джайн сөз сөйлеп, шараның жоғары деңгейде ұйымдастырылғанына ризашылығын білдірді.
Мереке барысында қатысушылар еліміздегі Үндістан елшілігі жанындағы Үнді мәдени орталығының концерттік бағдарламасын тамашалады.
Асхат РАЙҚҰЛ