Мамандық таңдау: үрдіске ілесіп, сұранысқа сай боп жүрміз бе?
Оқу жылы аяқталып келе жатыр. Өмірінде өзіне қол болатын, нәпақа табатын мамандық таңдау – кез келген мектеп бітірушіні, ата-ананы толғантатын мәселе. Елімізде мамандыққа баулу, кәсіби бағдарлау, керек кадрларды даярлау саясаты әлі де бір ізге түспей жатқаны жасырын емес. Осы төңіректегі түйткілдер мен атқарылып жатқан жұмыстар туралы «Астана ақшамы» газетінің редакциясында «дөңгелек үстел» өтті.
Әділбек ЖАПАҚ: Алғашқы сұрағымызды Білім және ғылым министрлігінің өкілі Жасұлан Алпысбаевқа қойғымыз келіп отыр. Жоғары оқу орындарының дайындаған мамандары еңбек нарығының сұранысына қаншалықты жауап беріп жатыр, қандай кадрлар дайындауымыз керек деген сауалдар өз маңыздылығын жоғалтқан емес. Министрлік мамандықтарды дайындау үдерісін қалай реттейді?
Жасұлан Алпысбаев: Бұл жұмысты біз бірнеше жыл бұрын бастап кеттік. 2011 жылы жоғары білім беру стандарты бекітілген кезде міндетті компоненттер (кез келген студент оқып-білуі тиіс пәндер тізімі) мен жоғары оқу орындарының таңдау компонентін енгіздік. Яғни, осы екінші жартысын жоғары оқу орындары жұмыс берушілердің ұсыныстарымен өз бетінше түзеді. Таңдау компонентін әзірлеу мүмкіндігін 55%-ға көтердік. Өздеріңізге мәлім, Кеңес өкіметі ыдырап, тәуелсіздік алсақ та, білім беру жүйесі күні кешеге дейін сол ескі сүрлеумен дамып келді. Ескі жүйенің бір кемшілігі – оқу бағдарламасы өте көп-тұғын. «Студент әр саладан хабары болуы керек» деген қисынмен жасалды. Мамандығына келсін-келмесін, міндеттеп қояды. Осынау жылдары бізде өндіріс пен білімнің арасы алшақтап кетті. Қазір министріміз Бақытжан Жұмағұловтың бастамасымен бәрі ретке келтіріліп жатыр.
Ал енді кадр дайындау үдерісін қалай реттейді дегенге келсек, соңғы жылдары мемлекеттік тапсырысты қалыптастырғанда түрлі салалық министрліктердің, ұлттық компаниялар мен олардың еншілес кәсіпорындарының, жергілікті әкімдіктердің қажеттіліктеріне арнайы мониторинг жүргізіліп келеді. Осыған орай Үкімет қаулысымен мемлекеттік білім грантына тапсырыс бекітіледі. Бізде жоғары және жоғары оқу орнынан кейінгі мамандықтардың жіктеуіші (классификаторы) бар. Сондықтан мектеп бітіруші жас-тар мен олардың ата-аналары мамандық таңдаған кезде бәрінен бұрын экономикадағы басым бағыттарға назар аударса екен дейміз. Яғни, бір сөзбен айтқанда, қазір техникалық және технологиялық мамандықтар тобына басымдық беріп отырмыз. Мысалы, былтыр техникалық мамандықтарға 11950 грант бөлсек, биыл 2013-2014 жылдары гранттардың санын 475-ке ұлғайтып отырмыз. Яғни, 12341-ге жетеді.
Ербол Жанат: Білім және ғылым министрлігінің Бақылау комитеті жаңа мамандықтар бойынша оқу орындарының лицензияларына қосымшалар беретінін білеміз. Біздің елде соңғы жылдары қандай жаңа мамандықтар ашылды?
Жасұлан Алпысбаев: Бізде бакалавр дәрежесі бойынша 172, магистратурада 188, докторантурада 189 мамандық бар. Cоңғы классификатор 2009 жылы бекітілген. 2011 жылы оған толықтыру енгізіліп, былтырдан бастап күшіне енді. Толығырақ айтсақ, бұрынғы мамандықтарға жаңа 18 мамандық қосылды. Осы жаңа мамандықтардың бірі – Президент жанындағы қауіпсіздік кеңесінің ұсынысы бойынша енгізілген «исламтану» мамандығы. Оған дейін бізде теология, дінтану мамандықтары болған. Қазіргі таңда Ислам дінінің атын жамылған түрлі ағымдардың пайда болуы, Ислам негіздерімен таныстыратын нақты мамандықтың жоқтығы осындай шешімді қажет етті. Бұл мамандық «Нұр» Қазақ-египет ислам университетінде ашылып, 200 грант бөлінді.
Екіншісі, «Әкімшілік іс жүргізу» деген мамандық. Елбасы халыққа жолдауында атап өткендей кәсіпкерлікті дамыту, шағын және орта бизнесті дамыту «Қазақстан – 2050» стратегиясының екінші кезектегі басым бағыты. Бізге кәсіпкерлерді тікелей даярлайтын мамандық керек болды. Үшіншісі, «балқуы қиын химиялық заттардың химиялық технологиясы» деген мамандық. Үдемелі индустриялық даму бағдарламасы бойынша осы мамандықты М.Әуезов атындағы Оңтүстік Қазақстан мемлекеттік университеті ұсынған болатын. Осы секілді 18 мамандық бакалаврда да, магистр дәрежесі бойынша да ашылды. Ал енді жастар қандай мамандықты таңдауы керек деген сұраққа қайта оралатын болсақ, 2017 жылы «Болашақтың қуат көздері» тақырыбымен EXPO халықаралық көрмесін өткізейік деп отырмыз. Яғни, Энергетика және жылуэнергетика мамандықтары бойынша оқитын жастардың үлесі арту керек. Сонымен қатар, «Жасыл экономика» бағдарламасы бар. Алдағы уақытта жоғары оқу орнына түсетін әрбір мектеп бітіруші осы мамандықтарға көңіл бөлгені дұрыс.
Өздеріңіз білетіндей, су мәселесіне келгенде біз Қытай, Өзбекстан, Қырғызстан секілді елдерге тәуелдіміз. Тыйып тастайтын болса, қаншама егін алқаптарымыз сусыз қалып, қуаңшылық болады. Оны қамтамасыз етудің жолын табатын гидрогеологтар керек.
Әділбек ЖАПАҚ: Бірақ бізде мамандыққа бейімдеу, кәсіби бағдарлау деген мәселе мектептен бастап жолға қойылмаған. Соның салдарынан қателіктерге ұрынып жатады. Жастар әке-шешесінің ақылымен, ақысын арзан көріп немесе оқуы оңай деп бір мамандықты таңдайды да, бітіргесін дипломы бойынша жұмыс таппайды. Осының салдарынан жұмыссыздық деңгейі көбейіп отыр. Жалпы, мектепте мамандыққа бейімдеуді қалай ұйымдастыру керек?
Дарын Қаппаров: Дұрыс айтасыз, өз басым Астана қалалық Жұмыспен қамту орталығында директордың міндетін атқарған кезде «Жұмыспен қамту-2020» бағдарламасы бойынша қайта даярлық курстарына қыруар қаржымыз шығындалып жатқанына көзім жетті. Бұл, бір жағынан, біздің халықтың менталитетіне келіп тірелетін мәселе. Мысалы, өз басым Қарағанды облысы Шет ауданынанмын. Суретші болғым келді. Бірінші жылы Алматыға барып түсе алмай қалдым. Әкем әй-шайға қарамай Целиноградқа алып келіп, «Сумен қамту және гидравлика» мамандығына тапсыртқызды. Ауылға ол кезде сондай маман керек еді. Оқып бітірдік, бірақ жұмыс істемедік. Сондықтан, ең әуелі қызығушылық болу керек деп есептеймін. Ол өзінен-өзі келе қалмайды, мектепте соған баулу керек. Орта мектеп – кадр дайындаудың алғашқы бастионы болуы тиіс. Сіздерге бір жақсы мысал келтірейін. Біздің «Тұран-Профи» халықаралық кәсіптік академиясының ректоры Мәнен Омаров өзінің туған жері Қорғалжын ауданындағы мектеп жанынан агробизнес негіздерін оқытатын орталық құрды. Өздеріңіз білесіздер, ауылдағы ағайын қорадағы уақ жандығын сатып болса да, баласын оқуға түсіреді. Ал ол сосын қалада сандалып жұмыс таппайды. «Дипломмен – ауылға!» деген сынды бағдарламаларға қанша қаржы шығындасақ та, ауылына қайтып барып жатқан жастар онша көп емес. Меніңше, бұл ауылда түк жоқ, кәсіп жоқ деген түсініктен туған. Тек мал соңына түсіп, егін салу емес, басқа да кәсіп түрлері бар екенін түсіндірсек дейміз. Мысалы, балық шаруашылығы, құс асырау, көгал өсіру, айта берсе көп қой. Қалада дайын тұтынушы бар. Бірте-бірте балалардың қызығушылығын арттырып, Агробизнес колледжін ашсақ деген де ой бар. Тағы бір айта кетерлігі, бұрын ақпарат аз болды. Қандай мамандыққа сұраныс бар екенін білмейтін едік. Қазір, құдайға шүкір, рекрутинг компаниялардың сайттары бар, Еңбек және әлеуметтік зерттеу министрлігінің ақпараттары бар. Солардан қарап, мәлімет алып отыруға әбден болатын сияқты.
Әділбек ЖАПАҚ: Осы жерде сәл шегініс жасап, нақты нарық сұранысы туралы дерек біле кетсек. Бізге Алматыдан «HeadHunter Қазақстан» рекрутинг компаниясының PR және маркетинг директоры Марина Сакиева Skype арқылы қосылып отыр. Марина, қазір нарықта қандай мамандықтарға сұраныс жоғары?
Марина Сакиева: Біздің компанияның қызметі аясындағы көрсеткіштерге жасалған талдау нәтижесіне сүйенсек, бұрнағы жылмен салыстырғанда, былтыр отандық кәсіпорындардың жұмысшы іздеу белсенділігі 57%-ға артты. Әсіресе, Астана мен Алматыда жұмыс іздеуші де, жұмыс беруші де мол. Сұраныс «сауда-саттық» (барлық бос орындардың 20%-ы), «ақпараттық технологиялар/Интернет/Телеком» (10%) саласына өте көп. Сондай-ақ, алғашқы бестікке кәсіпорындардағы есеп-аудит, қаржы, әкімшілік қызметкерлері, маркетинг, жарнама, PR мамандықтары кірді.
– Ал қандай салаларда кадр жетіспейді немесе бәсекелестік бәсең?
– Жоғары білікті мамандар қай салада да қат. Оның нақты индекстерін бере аламын. Мысалы, былтыр «Инсталляция және сервис», «Қамсыздандыру» салаларында бір бос орынға бір түйіндемеден артық түскен жоқ. Бұл нені білдіреді? Яғни, бізде аталмыш салалар бойынша білікті кадрлар жоқтың қасы немесе аз даярланады. Сосын амал жоқ, ол қажеттілікті сырт елдерден іздеуге тура келеді.
Ербол Жанат: Менің ойымша, бұл тағы да кейбір сирек мамандықтардың аз насихатталатынына келіп тіреледі. Болашақта жаппай енгізілгелі жатқан 12 жылдық білім беру жүйесінде кәсіби бағдарлауға айрықша маңыз артылады деп отырмыз. Өткенде, 18-сәуірдегі кездесуде Елбасы Назарбаев зияткерлік мектептерінің бұл тұрғыдағы тәжірибесі біртіндеп басқа мектептерге таралуы керектігін айтты емес пе?
Жанар Жаманқұлова: Иә, он екі жылдық білім берудің алғашқы тәжірибелері Назарбаев зияткерлік мектептерінде өткізіліп жатқаны рас. Мәскеу мемлекеттік университетінің жанындағы Колмогоров атындағы оқу-ғылыми орталығымен, Кембридж университетінің жекелеген факультеттерімен ынтымақтаса отырып, Қазақстанның стандартына сәйкестендірілген білім бағдарламаларын дайындадық. Екі жылдан бері артық-кем тұсы зерделеніп, қазір тәжірибе жүзінде қолданылып жатыр. Енді биылдан бастап жетінші сынып оқушыларын он екі жылдық мектепке қабылдауға көштік. Жалпы, біздің мектептің құрылымы былай: 1-5 сыныптар – бастауыш мектеп, 6-10 сыныптар – орта мектеп, 11-12 сыныптар – жоғарғы мектеп. Әрбір Назарбаев зияткерлік мектебінде кәсіби бағдарлау инс-пекторы мен сыртқы байланыс жөніндегі директор орынбасарлары бар. Олар оқу орындарымен түрлі байланыстар орнатып, кездесулер ұйымдастырады. Әр апта сайын өз саласының көрнекті тұлғалары, мықты мамандар келіп, балалармен дидарласады. «Ақылды» бейсенбі» дейміз бұл шараны. Сосын бізде оныншы сыныпқа дейін оқушылар Қазақстанның білім стандартын меңгеріп шығады. 11-12 сыныпта жалпы білім беру мектептерінде он жеті пән оқыса, біздің мектепте он-ақ пән оқытылады. Қазіргі Қазақстан, дене тәрбиесі, өзін-өзі тану пәндері – міндетті, одан кейінгі география, экономика, орыс тілі, қазақ тілі пәндерінің ішінен тек екеуін таңдап алуы керек. Сосын әрбір баланың қалауына тереңдетіп оқытатын төрт нұсқада оқу бағдарламасы ұсынылады. Оның ішінде міндетті түрде оқытылатыны– математика, ағылшын тілі, жаһандық перспективалар және зерттеулер пәндері. Әсіресе, Кембридж университетінің мамандарымен бірлесіп жасалған соңғы пән баланы өз бетінше ізденуге, интернеттегі, түрлі дереккөздердегі ақпараттарды пайдалануға, эссе жазуға баулиды. Әрі қарай оқушы болашақ мамандығына байланысты биология мен физиканы немесе физика мен ақпараттық технологияны, химия мен биологияны таңдай алады. Ал енді бұл жүйенің пайдасы неде дейсіз ғой? Біз оныншы сыныптан бастап, тіпті, одан да ертерек оқушылар нақты қандай мамандыққа баратынын біліп отырамыз. Статистикаға сүйенсек, осы үш жылда 552 бала мектеп бітірсе, соның 382-сі техникалық бағыттағы мамандықтарға, 73-і педагогикалық, медициналық мамандықтарға түскен. Яғни, өздеріңіз байқап отырғандай, қай-қайсысы да елімізде зәру мамандықтардың қатарын толықтырып отыр. Ендігі осы тәжірибемізді әрі қарай республикадағы басқа мектептерге енгізген дұрыс деп есептейміз.
Әділбек ЖАПАҚ: Жақсы, оны болашақтың еншісіндегі шаруа дейік. Ал енді мектеп бітірушілерді кәсіптік бағдарлаудың қарапайым да болса бірыңғай жүйесін жасауға не кедергі? Әр жерде әркелкі, өздерінің шама-шарықтарынша жүргізеді, кей университеттер мен колледждер «Ашық есік» күндерін өткізумен ғана шектеледі. Шалғайдағы ауылдарда ол да жоқ.
Жасұлан Алпысбаев: Негізі, министрлік тарапынан барлық оқу орындарына тапсырма берілген. Жоғары оқу орындарының қабылдау комиссиялары өздерінің таңдауына қарай елді мекендерде үгіт-насихат жұмысын жүргізуі тиіс.
Ербол Жанат: Мысалы, біз білетін ауылдарда ондай насихат, кәсіптік бағдарлау жұмыстары жүргізілмейді.
Жасұлан Алпысбаев: Нарықтық заман болғаннан кейін, ол енді әр оқу орнының жеке белсенділігіне қатысты жәйт. Керісінше, таңдау мүмкіншілігі кең заманда жастарға бір оқудан бір оқуға түсіп, сандық түбіне диплом жинай бергеннен гөрі, бакалавр, магистратура, PHD деңгейін толық бітіріп шығатындай нақты мамандық таңдауға кеңес берер едім. Ондай мамандар түптің түбінде жерде қалмайды. Ал енді жоғары оқу орнына білімі, жағдайы жетпейтіндер алды-артын ойлап, колледжге, кәсіптік-техникалық училищелерге түскені дұрыс қой. Өйткені, орта буын мамандары қашан да қажет.
Ербол Жанат: Бірақ бізде колледжге, кәсіптік-техникалық училищеге оқуға қабілеті жоқ, миғұлалау балалар барады деген қасаң түсінік қалыптасқан. Тіпті, мектептерде тоғызыншы сыныптың оқушыларына директордан бастап мұғалімдерге дейін «Сен ҰБТ тапсыра алмайсың. Одан да колледжге кет» деп құлақ етін жеп құтылуға тырысады. Осының өзі кәсіби-техникалық білім беру жүйесіне көлеңке түсіретін сияқты…
Жасұлан Алпысбаев: Сіз айтып отырған проблеманың тағы бір жағы бар. Бұрын-соңды жастар тоғызыншы сыныптан колледжге түсіп тәмамдағасын, кез келген жоғары оқу орындарына бір-екі ауыз сұрақ-жауаптасу, сауалнама толтыру арқылы түсе салатын. Былтырдан бастап қабылдау ережесіне өзгертулер енгізілді. Енді колледжден келгендер де кешенді тестілеуден өтетін болды. Бізде нақты деректер бар, колледж, училищелерді бітірушілердің 58%-ы кешенді сынақтан өтпей қалды. Бұған дейін олар жоғары оқу орындарына кедергісіз түскендігі салдарынан кейбір салаларда мамандар шамадан тыс көбейіп кетті.
Айнұр Мұқанова: Колледж бен училищелерге оқу үлгерімі шамалылар барады деген теріс түсінік тек орта буын мамандарын даярлаудың сапасын арттырғанда ғана жойылады деп ойлаймын. Шетелдерде колледжге түсудің өзі – мәртебе. Өйткені, одан алып шыққан білім анау-мынау ортаңқол қызметті атқаруға жарай береді. Осы бағытта құрылған «Кәсіпқор» холдингіне ең үздік әлемдік тәжірибелер негізінде техникалық және кәсіптік білім беру жүйесін жасау тапсырылған. Соның алғашқысы – Атырауда мұнай-газ саласындағы мамандарды дайындайтын APEC Petrotechnic өңіраралық кәсіптік колледжі ашылды. Стратегиялық серіктес ретінде мұнай-газ саласындағы білім беруде канадалық көшбасшы Оңтүстік Альбертаның технологиялар институты (SAIT Politechnic) таңдап алынды. SAIT Politechnic институтымен бірлесіп, «ҚазМұнайГаз», NCOC, ТШО сияқты ірі компаниялардағы ең қажетті мамандықтарды анықтап, оларға қойылатын біліктілік талаптарына қарай оқу бағдарламасын әзірледік. Мұнай және газ өндіру технологиясы, Бақылау, өлшеу аспаптары мен автоматтандыру технологиясы, Кен орындарын пайдалану бағыттары бойынша оқытамыз. Колледжге түсу оңай емес, бірақ оқу тегін, мемлекеттік тапсырыспен дайындалады. Математика, физика, химия және ағылшын тілінен сынақ алынады. Өйткені, сабақ ағылшын тілінде жүргізіледі. Кейбір мұғалімдер Канададан шақыртылған. 2017 жылға дейін әр аймақтың экономикалық ерекшелігіне тән осындай өңіраралық кәсіптік орталықтарды бірнеше қалада ашпақшымыз. Өскеменде металлургия және машина жасау саласына, Екібастұзда отын-энергетика саласына, Шымкентте жеңіл және тамақ өнеркәсібі саласына маман даярлайтын өңіраралық колледждердің негізін қалау ойда бар.
Жаңа Марина Сакиева негізгі еңбек нарықтары Алматы мен Астанада екенін айтып кетті ғой. Былтыр біздің холдинг кәсіптік-техникалық білім беру бойынша Германияның халықаралық ынтымақтастық қауымдастығымен (GIZ) бірлесе отырып талдау жүргізді. Соның нәтижесінде Алматы мен Астана қалаларындағы колледждерде инженерия, энергетика, құрылыс және тұрғын-үй коммуналдық шаруашылық, ақпараттық-коммуникациялық технологиялар, дизайн, туризм және қонақ үй бизнесі сияқты алты профильді мектеп ашуды ұйғардық. Қазір колледждердің құрылысы жүріп жатыр. Алдағы бір-екі жылда ашылады. Сонымен қатар, облыс орталықтарында жұмыс берушілердің ұсынысын ескере отырып, тоғыз техникалық колледжді стратегиялық серіктестікке іріктеп алдық. Бұлардың барлығына оқытушылар дайындауды да қатар алып жүреміз. Өйткені, бұл тәжірибемізді кейін басқа да кәсіптік-техникалық білім беру мекемелеріне таратпақшымыз.
Жанар Жаманқұлова: Сіздер оқуға түсу талабын тіптен қиындатып жіберген жоқсыздар ма? Ағылшын тілін білетін, химия, биология, физикаға жетік бала ілеуде біреу, ал білетіндері, меніңше, байырдан келе жатқан шетелдің оқу орындарына барғанды артық көретін сияқты
Әділбек ЖАПАҚ: Меніңше, аса қажет кадрларды экономиканың сұранысына жеделдетіп дайындайтын дуальдық жүйенің маңызы зор. Бірақ әлі әдістемесі толық бітпей жатып, кейбір өңірлерде, мысалы Таразда, Ақтөбеде дуальды оқыту жүйесін бастап кетті. Осы дұрыс па?
Жасұлан Алпысбаев: Жалпы дуалдық жүйе дегеніміз – студенттің оқу орнында да, өндіріс ошағында да болып, екеуінің ықпалдасқан жүйесінде білім алуы. Оның ең тиімді жолы – жоғары оқу орны мен жұмыс берушінің бірлескен кафедрасын ашу. Бұл жөнінде бізде нақты мысалдар бар.
2011 жылы Министрдің бұйрығымен 15 жоғары оқу орны базалық жоғары оқу орны болып бекітілді. Атап айтсақ, Қ.И.Сәтбаев атындағы Қазақ ұлттық техникалық университеті, Қарағанды мемлекеттік техникалық университеті, Алматы технологиялық университеті, Алматы Энергетика және байланыс университеті сынды университеттер сол тізімге кірді. Осы университеттерде «Арселор Миттал Теміртау», KEGOC, «ҚазМұнайГаз» және «Қазақстан Темір жолы» ұлттық компаниялары бірлесіп, заманауи технологияларды қамтыған лабораторияларды орнатты. Студенттер теориялық тұрғыда алған білімдерін осында тәжірибе жүзінде іске асырып, үйренеді. Мысалы, Алматы энергетика және байланыс университетінде «Жасыл экономика» бағдарламасы аясында KEGOC компаниясымен бірігіп, үлкен лаборатория құрылды. Онда студенттер еденасты жылу жүйесінің қалай жүргізілетінін, күн сәулесінен қуат алудың тәсілдерін меңгереді. Яғни, біз айтып отырған дуальдық жүйенің жарқын мысалы осы. Жаңағы студенттер оқуын бітірісімен аталмыш компанияға жұмысқа алынады.
Дарын Қаппаров: Меніңше, бүгінгі жастарды мамандық таңдаумен қатар, кейін оқуды бітірген соң сол мамандықпен жұмыс таба аламын ба деген сұрақ көбірек толғандыратын секілді. Себебі, мемлекет те, ата-ана да баланы ақшасын шығындап оқытады. Осы тұрғыдан алғанда, дуальдық жүйе дегеніміз қазіргі білім беру жүйесіндегі бір тренд болатын сияқты. Өйткені, кепілдендірілген жұмысқа алатын орны бар және практикалық тұрғыда үйренетін мүмкіндігі бар.
Жасұлан Алпысбаев: Біздің де қолға алып отырған бірінші мәселе осы ғой. Біз 2010 жылдан бастап Болон процесіне ендік. Болон процесінің міндетті параметрлері бар. Сол міндетті параметрлердің ең күрделісі – озық мемлекеттер біліктіліктің Ұлттық шеңберлерін тануы керек. Бүгінгі таңда Еңбек және халықты әлеуметтік қорғау министрлігімен бірлесе еуропалық жүйеге негізделген Ұлттық біліктілік шеңбері бекітілді. Сол шеңберге сәйкес салалық министрліктер жоғары оқу орындарының мамандықтары бойынша кәсіптік стандарттарын бастады. Ол 2014 жылдан бастап күшіне енетін болады. Яғни, осы уақыттан бастап салалық министрліктермен және кәсіптік қауымдастықтармен біріге отырып, әрбір мамандық бойынша тәуелсіз біліктілікті тану орталықтары ашылатын болады.
Жұмыс берушіге де оңай. Базаға кіріп, жұмыс сұрап келген адамның деңгейін лезде біле алады. Әрі қарай, ретінше еңбек келісімшартын жасаса береді. Мұндағы ең басты мәселе – білім сапасы. Бұрындағыдай «оқуды бітірдім, диплом қолға тиді» деп арқаны кеңге салу жоқ. Ендігі кезекте оған білімін дәлелдеуге тура келеді. Яғни, біліктілік сертификатын алуы тиіс.
Ербол Жанат: Тағы бір алаңдатарлық жайт – саны көп, сапасы жоқ университеттерді жабу, біріктіру, оңтайландыру мәселесін айта кетсеңіз. Себебі, осы хабар талай мектеп бітірушіні абдыратып тастайтын түрі бар.
Жасұлан Алпысбаев: «Қазақстан – 2050» стратегиясының мұратына жету үшін бәсекеге қабілетті ұлт қалыптастыруымыз қажет. Егер жоғары оқу орындары берген талапқа сай болмаса, біліксіз мамандар қоғамға жол тартса, осындай мекемелер тек өздерінің жеке мүддесін ғана ойласа не болғаны?! Мұндай оқу орындарын Елбасының саясатына қарсы мекеме деп түсінсек те болады.
Негізі, жоғары оқу орындарын оңтайландыру деген оқу орындарының санын арифметикалық тұрғыда қысқарта салу емес. Осы – сөздің өзі аңғартып тұрғандай білім ошақтарын оңтайландыру, жетілдіру. Мұның екі-үш тәсілі бар. Біріншісі, жоғары оқу орындарын біріктіру. Яғни, сапасыз білім беріп келген екі-үш жоғары оқу орны материалдық-техникалық базаларын топтастырады, профессорлық-педагогикалық құрамын ұжымдастырады. Өзара құрылтайшы болады да, ары қарай жұмыстарын жүргізе береді. Екіншісі, оқу орны университет деңгейіне лайық болмаса, онда оны колледж деңгейіне түсіру керек. Үшіншісі, оқу орны талаптарға сай болмаса, өрескел заң бұзушылықтар анықталған жағдайда оны жабуға тура келеді. Оқу орны жабылған жағдайда студенттердің құқы тапталмайды. Олар сол университетте оқып жүрген мамандығы бойынша әрі сол жерде келісілген бағаны сақтай отырып, басқа университетке ауыстырылады.
Қазір Қазақстанда 572 мың студент білім алады. Соның 49 пайызы мемлекеттік жоғары оқу орнында, 51 пайызы жеке меншік университеттерде оқып жатыр. Оның себебі – баға саясатында. «Білім туралы» заңға сәйкес жоғары оқу орындарында бакалавр дәрежесіндегі маманды оқытудың бір жылдық құны 350 мыңнан кем болмауы тиіс. Бірақ жеке меншік университеттер 150 мың теңгеге де көне салады. Арзан баға іздеген ауылдағы азаматтар балаларын осындай жеке меншік университеттерге оқытады. Ал, олар сапалы маман дайындайды деп айтуға бола ма? Статистикаға сүйенсек, 572 мың студенттің 431 мыңы ақылы бөлімдерде оқиды. Оның 280 мыңы жеке меншік оқу орындарының студенттері. Осы 280 мыңның 160 мыңы экономика, маркетинг, қаржы мамандықтарында оқып жатыр, ал, қалған 160 мыңы халықаралық құқық және кеден ісі мамандығы бойынша білім алуда. Осыдан барып мамандарды қажеттіліктен тыс дайындау мәселесі көлденең шығады. Былтыр қаржы, экономика, маркетинг, мемлекеттік және жергілікті басқару мамандықтары бойынша 350-ақ орынға тапсырыс берілді. Ал, құқық мамандығына 100 орынға ғана тапсырыс берілген. «Өзі 350-ақ грант бөлінеді екен, оның үстіне экономика мамандығы бойынша қажеттіліктен тыс даярланған мамандардың саны анау! Балам, сонда сен ертеңгі күні жұмысқа орналаса аласың ба?» деген сұрақ болу керек қой. Осы мәселелерді жоғары оқу орындары кәсіптік бағдарлау жұмысын жүргізу барысында халықпен кездесіп, түсіндіріп айту керек.
Дарын Қаппаров: Оқу орындарын біріктіру тәжірибесі бізде бар. Мысалы, бір кездегі Құрылыс институты мен Педагогикалық институтты қосып, Еуразия ұлттық университетін құрдық. Ал, бұл жолы сонша университетті жауып тастағанымызда, ата-аналар наразылық танытары анық. Осының алдын алу үшін биылғы құжат қабылдау маусымына дейін қай университеттердің жабылып, қайсысы қалатыны жайында ақпарат беріп үлгеруіміз керек деп ойлаймын.
Жасұлан Алпысбаев: Біздің министрліктің жанынан қоғамдық кеңес құрылды. Оған мәжіліс депутаттары, БАҚ өкілдері, салалық қауымдастық өкілдері кірді. Яғни, мұны ертең халық министрліктің жеке шешімімен жасалған шаруа демес үшін осы қоғамдық кеңес құрылып отыр. Белгілі бір университетке қатысты шаруа болатын болса, тиісті құжаттардың барлығы солардың сараптамасынан өтеді. Тек содан кейін ғана шешім қабылданады. Бұл шешім тек университетті жабу деген ұстанымға сүйенбейді, керісінше, оңтайландыру деген мақсатты бірінші қояды.
Жаңа сіз түлектер құжат тапсыруы тиіс университеттердің тізімін шығарсақ деген ұсыныс айтып отырсыз. Бірақ, біздің министрлік «Ана университетке бар, ал, мынаған барма» деп айта алмайды. Ондай арандатумен айналысуға болмайды. Халық қазір саналы, көзі ашық. Біздің ақпаратты естісімен өздері «мына жекеменшік университеттер лицензиялауға қатысты талаптарды бұзып отыр екен, сонда осыларға балаларымызды оқытуға бергеніміз дұрыс па?» деген ой түюлері керек.
Әділбек ЖАПАҚ: Рахмет. «Дөңгелек үстелімізді» мектеп бітірейін деп отырған түлектерге айтар ақыл-кеңесімізбен қорытындыласақ.
Айнұр Мұқанова: Бізде кәсіптік-техникалық мамандық иелерінің жетіспей жатқандығы рас. Кеше Үкіметтің кеңейтілген отырысында, басқа емес, дәл осы орта буын техникалық мамандарының тапшылығы сөз болды. Осыны ескере отырып, оқушылар техникалық-кәсіптік мамандықтарды таңдауы қажет деп ойлаймын.
Жасұлан Алпысбаев: Айтайын деген қорытынды сөзім, елімізде жүргізіліп жатқан реформалар жайлы жастарымыз біле жүрсін. Министрліктердің, Үкіметтің сайттарына кірсін. Күнделікті болып жатқан оқиғалардан құлағдар болсын. Сонда ғана ол өз бағытын адаспай табады.
Жанар Жаманқұлова: Біз университеттің жетістігін түлектің жұмысқа тұруы бойынша бағалаймыз. Бірақ, түлек өз мамандығы бойынша жұмысқа орналасты ма? Жоқ, қай жерде бос орын бар, сол жерге бара салды ма? Бұл сұрақтарға бас қатырып жатқан ешкім жоқ. Сондықтан, біздің көрсеткіш объективті көрсеткіш емес. Осындай мәселелердің алдын алу үшін өскелең ұрпақ өзінің болашағын анықтауға мектептен бейімделуі керек.
Екінші мәселе, біздің мектептер өз алдына, колледждер өз алдына, жеке-жеке жұмыс жасайды. Байқап тұрсаңыз, ешбір жүйелі жұмыс жоқ. Сондықтан, осы оқу ошақтарының арасындағы байланысты нығайтатын жұмыстар жасалса дейміз. Мектеп, колледж, университет ұстаздарының арасында қарым-қатынас артса, мектеп мұғалімдері де оқушыларға дұрыс бағыт-бағдар көрсете алар еді. Кәсіби бағдарлау дегеніміз – осы.
2012 жылдың соңындағы көрсеткіштер бойынша мамандық тапшылығы барлық саланы қамтыды десе де болады. «Жасыл жолаққа» кіретін кәсіби салаларда бір бос орынға үш үміткерден артық болмады.
Мәлімет hh.kz сайтынан алынды.
Әділбек ЖАПАҚ,
Ербол ЖАНАТ