«МӘРТЕБЕЛIЛЕР ТҰТЫНЫМЫНЫҢ» ӘУЛЕКI ӘСЕРI немесе тоғышарлық тұманында адасу нелiктен қауiптi?
…«Ең алдымен «мәртебелiлер тұтынымының» (оқу құралдарында орысша – «престижное потребление», ағылшынша – «conspicuous consumption») әсерi деген не екенiне тоқталайық. Оның авторы – Торстейн Веблен (1857–1929). Америкалық капитализмнiң сыншысы болған ол заманауи экономикалық ой-идеялардың дамуына баға жетпес еңбек сiңiрдi, институционализм атты бүтiн бiр iлiмдiк ағымның негiзiн қалады.
Сөзiмiз ұзап кетпеу үшiн Веблен өмiрбаянының түйiндi жерлерiн сыдыртып өтелiк. Ол шаруасы шатқаяқтаған иммигрант-фермердiң отбасында дүниеге келiп, бозбала шағында беделдi Йель университетiнде бейшара студенттiң, содан соң жұмыссыз қалған философия докторының халiн бастан кешiрсе де, кейiн экономика саңлақтарының қатарына қосылды. Вебленмен бiрге оқыған курстастары, одан дәрiс алған шәкiрттерi Америка мықтыларының – алпауыттар мен ақсүйектердiң, өнер жұлдыздарының бала-шағасы болатын. Осындай мәртебелi адамдардың мiнез-құлқын зерттей келе, Веблен оларды «жұмыстан бос тап» («праздный класс», leisure class) деп атады. «Жұмыстан бос таптың» өкiлдерi өзара бәсекелесiп, бiр-бiрiне қызғанышпен қарап, қол жеткен табыстарын мақтан тұтуға, билiктi иемденуге ғана тыраштанып бағады. Олар еңбек етудi «төменгi» («низший», «underclass») тапқа тән тiрлiкке балап, онымен еш уақытта айналыспайтындарын жасырмайды. Мұнысы менменсiген, өркеуде өпiрiм мiнез-құлықпен астасқан астамшыл iс-әрекеттерiнде де айқын аңғарылып тұрады.
Мәселен, биiк өкшелi аяқкиiм киiп, маникюр жасатып, шашын қопсыта тараған, сәндi, бiрақ тым қораш маталарға оранған кiсi дене еңбегiнен аулақ екенiн, ақсүйектер табына жататынын бiлдiруге тырысады. Мұндай «жұмыстан бос таптың» өкiлi өзiн өзгелерден ерекшелейтiн игiлiктердi (тауарлар мен қызмет түрлерiн) тұтынады.
Мүмкiн, бiреулер «бұл байларға тән одағай қылықтар ғой, не iстесе де өздерi бiлсiн, бiз қарапайым адамдармыз, бiзге оның қатысы қанша?» деп ойлауы мүмкiн. Алайда, Торстейннiң өзi тап осының аса қауiптi тенденция екенiн байқаған. Қарапайым адамдар «жұмыстан бос тап» тiршiлiгiнiң алдамшы көрiнiстерiне көз сала жүрiп, күндердiң бiр күнiнде оларға елiктей бастайды. Мiне, бар мәселе осы жерден бастау алады. Себебi, қаймана жұртшылық өздерiне мүлдем қажетсiз, алайда қалың көпшiлiктен бөле жаратын, иә болмаса, айналадағылардың қызғанышын тудыратын «мәртебелiлердiң» тауарларын тұтынуға бел буады. Мұнда тұрған не бар дер едiк, бiрақ адамдардың бұған табысының елеулi бөлiгiн, жинап сақтаған ақшаларын жұмсап, соның кесiрiнен көп ретте қарызға бататыны болмаса. Соның салдарынан отандық инвестиция арнасына құйылуға тиiс халық қаржысы әдетте шетел асып кетедi.
«Мәртебелiлер тұтынымының» әсерiне күнделiктi тұрмыс-тiршiлiктен бiрнеше мысал келтiрелiк.
Балаларға арналған косметиканы тұтыну – бiз айтып отырған әлгi әулекi әсердiң көрнектi мысалы. Осыдан 15-20 жыл бұрын, балаңдау шағымызда кiшкене қыз балалар көз бояуынан, тональды креммен, тырнақ лагынан, әтiрден гөрi қуыршаққа, түрлi ойыншықтарға көбiрек қызыққанын көзiмiз көрдi. Бүгiнгi ата-аналар балаларының косметикаға қызығушылығын қайтармай, құптап жататынын жиi кездестiремiз. Баланы түсiнуге болады, ол өндiрушiнiң жалаулатқан жарнамасының ықпалына оңай түсiп қалады. Ал қызын дүкенге ертiп келген ананың оған әуелi кезектi косметика жинағын, дизайнерлiк сөмкенi немесе өкшелi туфлидi әперiп, содан кейiн барып тiзiмiндегi қалған заттарды сатып алуға кiрiсуiн түсiну қиын. Құлағында несиеге алынған гауһар тас сырғасы бар «ханшайымнан» қандай «ханша» өсiп шығар екен?!
Келесi мысалды, дәлiрек айтқанда, наразылыққа толы әңгiменi мен бiр оқу орнының күзетшiсiнен естiдiм. Ол өзiнiң соңғы жылдары көзiн кесiп, көкейiн тесiп жүрген жәйттердi жайып тастады. Оның айтуынша, студент қыздардың тым ерсi киiнетiнi, әсiре ажарланатыны соншалық, олардың түнгi клубқа, әлде университетке келiп тұрғаны белгiсiз. Ұзартылған тырнақ, ұлғайтылған кiрпiк, жалғамалы шаш, «баттастырған» макияж, қысқа белдемше, капрон колготкалар (қыстың үскiрiк аязында!), кеудесi кең ойылған жағасыз көйлек, жұп-жұқа көкiрекше, қысқа етектi жеңiл тон – мiне, бұл осы күнгi сәнқор студент қыздың бейнесi. Күзетшi әке-шешесiнiң өз баласын осы бойымен үйден қалай жiберетiнiне шынымен таңырқайды.
Шынтуайттап келсек, таңданатын түгi жоқ. Бұл қыздар – «мәртебелiлер тұтынымы» әсерiнiң құрбандары. Келешегiне пайдасы тиетiн кiтаптарды оқып, спортпен шұғылданып, тiлдердi оқып үйренудiң орнына олар бар қаражатын «беделдiлер» тұтынатын заттарға жұмсайды. Бұл әулекi әсердiң ауа жайылып, кең ауқымда ықпал ету мүмкiндiгiн ескерсек, елiмiздiң экономикалық қауiпсiздiгiне қаншалықты қауiп-қатер төнетiнiн пайымдауға да болатын шығар, сiрә.
Айта кететiнi, «мәртебелiлер тұтынымы» әсерiнiң құрбандарын да жазғыра беру жөн емес. Оларға бұқаралық жарнаманың барлық құралдары күнбе-күн жүйелi түрде әсер етiп отырады. Кез келген журналды, интернет-беттi ашып қалсаңыз, дене мүшелерi жасанды «бақытты» адамдар қай аралға барып қайтқанын, сол кезде қай брендтiң киiм-кешегiмен «жайқалып» жүргенiн жайып жатқанын көресiз.
Бiз олардың мiнез-құлқын, дизайнерлiк заттарын (әдетте, Қытай өндiрген), тұрмыс салтын және т.б. бәрiн көшiрiп ала қоямыз. Бiз осы жағдайды Америка құрлығын алғаш жаулап алушылардың аборигендерден бағалы металдар мен тастарды алып, орнына түрлi-түстi майда шыны заттар, айна, т.с.с. уақ-түйек әшекейлердi бергенiне ұқсатамыз. Мұндай айырбасқа сол кезде екi жақ та ырза болатын.
Сiз ше?..
Елдос НҰРЛАНОВ