«Медикер» және «Астана ЭКСПО-2017» компаниялары екі-жақты меморандумға қол қойып, соның нәтижесінде жоғарыдағы ұйым ЭКСПО көрмесінің операторы әрі серіктесі атанды.
Жасалған келісім аясында «Медикер» ЖШС өз инвестициясының едәуір бөлігін мамандандырылған көрме алаңында ашылатын медициналық орталықтар мен 6 медициналық пункттің талапқа сай жабдықталуына бағыттайды.
– Біздің фирмамыз үшін бұл уақиға – үлкен абырой. Осы арқылы бізге артылған сенімнің қаншалықты биік деңгейде екенін байқадық. Әрине, жүктелген жауапкершілік өте жоғары. Соның үдесінен шығып, меморандумның талаптарын сапалы әрі уақытылы орындайтынымызға кепілдік береміз, – деді «Медикер» компаниясының Басқарма төрайымы Гүлжан Садырбаева.
ЭКСПО көрмесінде халықаралық стандарттар бойынша арнайы оқытылған мамандар – дәрігерлер, үйлестірушілер және басқа да медициналық қызметкерлер жұмыс істейтін болады. «Болашақ энергиясы» деген тақырыппен өткелі жатқан ауқымды іс-шараны қолдайтын «Медикер» фирмасы бүгінде барлық қызметін қуат үнемдеу саясатына сәйкес жүргізуде.
