Қазақстанда балалардың қауіпсіздігін қамтамасыз ету мақсатында мектептерді тәулік бойы арнайы күзет қызметінің қадағалауына беру мәселесі қаралып жатыр. Бұл туралы ҚР Білім және ғылым министрлігінің Балалар құқықтарын қорғау комитеті төрағасының орынбасары Дулат Жекебаев мәлім етті.
«Қазан, Пермьде болған жағдай бізге де кез келген қауіпке даяр болудың қажеттігін көрсетті. Балалар қауіпсіздігін қамтамасыз етуде мектеп күзетіне қойылатын талап жоғары. Күзет қызметі төтенше жағдайға әрдайым дайын болып, шұғыл шешім қабылдай білуі тиіс. Бұл дегеніміз – бейнебақылау камерасының орнатылып, оның талап пен стандартқа сәйкес жұмыс істеуі. Осы орайда біз халықаралық тәжірибе мен өзге елдерде болып жатқан төтенше жағдайларға талдау жүргізудеміз» деді Дулат Жекебаев.
Оның айтуынша, кейбір мектептердегі бейнебақылау камерасы тиісті талап пен стандартқа сәйкес келмейді. Білім және ғылым министрлігі құзырлы органдармен бірлесіп, мектеп қауіпсіздігін тәулік бойы қадағалайтын арнайы күзет қызметімен қамту мәселесі қаралып жатыр. Сонымен қатар барлық білім беру мекемелерінде «дабыл батырмасын» орнату да күн тәртібінде. Аталған шаралар бюджеттен қосымша 2 млрд теңге қаржыны талап етеді.
