Мемлекет басшысының тапсырмасын іске асыру мақсатында мемлекеттік мүлікті жекешелендірудің 2014-2016 жылдарға арналған кешенді жоспары наурыз айының соңына дейін қабылданады. Жекешелендіру жоспары мемлекеттік меншіктің құрамын және құрылымын оңтайландыру бағытында мемлекеттік мүлікті басқару тиімділігін арттыру бойынша шараларды жүзеге асыратын болады.

Украинадағы жағдайға қатысты Қазақстан Республикасы Сыртқы істер министрлігі мәлімдеме жариялады. «Қазақстан Украинадағы оқиғаларға байланысты ерекше алаңдаушылығын білдіреді. Шиеленістің одан әрі өрбуі аймақтық, сондай-ақ жаһандық ауқымдағы күтпеген нәтижелерге алып келуі мүмкін. Қазақстан барлық тараптарды жағдайды реттеу барысында күш қолдану шешімдерден бас тартуға және қалыптасқан мәселені келіссөздер арқылы шешу мақсатында барынша саяси күш-жігер танытуға шақырады. Бұл шешім халықаралық құқықтың фундаменталды қағидаттарына негізделуі тиіс. Барлық мүдделі тараптарды жағдайды бағалауда байсалды, әділетті болуға және жауапкершілік танытып, украиндық дағдарысты ушықтыруға себеп болатын әрекеттерден бас тартуға шақырамыз» делінген мәлімдемеде.