Қалалық мәслихаттың Бюджет, экономика, өнеркәсіп және кәсіпкерлік мәселелері жөніндегі тұрақты комиссиясы мүшелері Астана қаласы бойынша Мемлекеттік кірістер департаментінің жұмысымен танысты.
Депутаттар ескі ғимаратты күрделі жөндеуден өткізгеннен кейінгі қайта жабдықталуын, қызметкерлердің өздеріне жүктелген міндеттердің мінсіз орындалуына ден қойылуын оң бағалады. Мекеме басшылығы салық төлеушілер мен мемлекеттік қызметкерлер арасындағы кедергілерді жоя отырып, жұмысты барынша жетілдіру арқылы қол жеткен жетістіктерімен халық қалаулыларын таныстырып өтті. Астана қаласы бойынша мемлекеттік кірістер Департаментінің басшысы Әбілқайыр Сқақов салық төлеушілермен жұмысты оңтайландырып, жұмыс барысына біршама өзгерістер енгізілгенін баяндады. Ендігі жерде жеке тұлғалар мен бизнес иелері алдымен модераторға жолығып, тиісті құжаттарды толтырып, сол сәтте оны мекеме кеңсесінде тіркей алады. Тиісті сұрақтарының жауабын алғаннан соң көбіне операциялық залға өтудің қажеттілігі туындамайды екен. Бұл – жұмысты жетілдірудің алғашқы қадамы. Қызметтің тағы бір тиімділігі – кезек күтушілерді электронды түрде реттеп отырады. Әркім өзіне қажетті қызметті таңдай отырып, өзінің сұрағына жауап беруге тиісті маманмен бірден жолыға алады.
Бұл арқылы департамент жұмысының ашықтығы мен оның ауқымдылығынан мағлұмат алуға болады. Мұнда өз-өзіне қызмет етемін деушілерге де жағдай жасалған. Арнайы терминал арқылы азаматтардың салықтық берешектерінің бар-жоғын анықтап алуға да мүмкіндік бар. «Электронды салық төлеуші» атауы қазір көптеген кәсіпкерлерге таңсық емес. Электронды санды қолтаңбасы арқылы барлық салық түрлерін өз кеңсесінде отырып-ақ интернет арқылы жіберуге болады. Бүгінде бизнес саласында бұл жұмыстардың 97 пайызы электронды түрде жүргізіледі» деді Департаментінің басшысы Әбілқайыр Сқақов.
«Мемлекеттік қызметтің ахуалын талдау орталығын» Департаменттің жаңалығы деп айтуға болады. Видеомониторинг арқылы нақты уақытта болып жатқан жағдайды бақылауға жаңа технология мен заманауи құралдарды ендіру арқылы қол жеткізген. Орталықта үш аудандағы салық бөлімдерінің, одан басқа кеден бекеттерінің жұмысын қадағалап, нақты жағдайды бағалауға мүмкіндік бар. Сонымен қатар, статистикалық мәліметтер де бір орталыққа жинақталып, өңделеді. Мәслихат депутаттары «Wipon», мобильді қосымшаның жұмысымен
танысты. Сатып алушылардың контрафактілі алкоголь өнімдерін анықтауға және мұндай өнімдерді сатумен айналысушылардың жолын кесудің қарапайым жолы қолданысқа да қолайлы екен. Жаңалығы көп тиімді жүйенің елордалық барлық бөлімдерінде де қолға алынғанына куә болдық. «Мақсатымыз – Астананың әрбір тұрғыны бірдей жағдайда барлық қызмет түріне қол жеткізуіне қамтамасыз ету. Келесі кезеңде шартты түрдегі аудандараралық шектеуді қалдырмайтын боламыз. Себебі мемлекеттік кірістердің бәрі бір жерге жинақталады. Ал, әрбір астаналықтың өте қолайлы, қызмет көрсету жүйесі жетілдірілген жайлы орындарда сапалы қызмет көрсетуге қол жеткізуді көздеп отырмыз» дейді Департамент басшысы. Ол сонымен бірге салық, кеден және өзге де қолданыстағы заңнамасының сақталуы мен орындалуына қатысты мәслихат депутаттарының сұрақтарына жауап берді.
Айгүл УАЙСОВА
