Кеше Ақордада Президент Нұрсұлтан Назарбаев ел дамуына еңбегі сіңген бір топ азаматқа ҚР Мемлекеттік сыйлығы мен «Қазақстанның еңбек сіңірген қайраткері» құрметті атағын тапсырды.
Мемлекеттік сыйлық алуға келген азаматтарды еліміздің ұлы мерекесі – Тәуелсіздік күнімен құттықтаған Президент:
– Қазақта «Еңбегіне қарай құрметі» деген қанатты сөз бар. Бүгін, міне, елдің дамуына үлес қосып жүрген айтулы азаматтарға тиісті құрмет көрсеткелі отырмыз. Мұндай сыйлықтардың табысталуы – тәуелсіздігіміздің арқасы. Бұл дәстүр дербес ел болуымыздың қадірін терең сезіндіре түсері сөзсіз. Қазіргі алғалы отырған сыйлықтарыңыз – сіздердің ғана емес, тұтас еліміздің табысы, – деп атап өтті.
Ең алдымен, ғылым мен техника саласында үздік нәтижелерге қол жеткізген жекелеген азаматтар мен ұжымға Мемлекеттік сыйлық тапсырған Елбасы «Бұл ғалымдарымыздың тәуелсiздiктi тұғырлы етуге қосқан үлесi» деген баға берді.
Мемлекеттік сыйлық алғандардың қатарында халықаралық деңгейдегi математикалық проблемаларды шешу жолын ұсынған ғалым Тынысбек Кәлменов, қазiргi медицина саласында озық технологияларды енгiзу жолында тер төгіп жүрген профессор Серiк Ақшолақов басқаратын Республикалық нейрохирургия ғылыми орталығының ұжымы, жалпы ұзын-саны 15 адам бар.
Ал «Қазақстанның еңбек сіңірген қайраткері» атағын әнші Қарақат Әбілдина, «Мюзикола» дуэтінің солисі Карина Абдуллина, әртіс Нұрлан Әлімжанов, Қазақстан дизайнерлері одағының президенті Тимур Сүлейменов, «Астана балет» хореографиялық ұжымының бас балетмейстері Алила Әлішева, «Қазақстан Республикасы Президентінің Телерадиокешені» ҰАҚ бас директоры Ерлан Бекқожин, Т. Жүргенов атындағы Қазақ ұлттық өнер академиясының профессоры Смағұл Елубаев, тағы басқалар еншіледі.
Елбасының Мемлекеттік бейбітшілік және прогресс сыйлығы көрнекті ақын, қоғам қайраткері Олжас Сүлейменовке берілді. Мемлекет басшысы белгілі тұлғаның ел дамуына сіңірген еңбегін ерекше атап өтті.
Қымбат НҰРҒАЛИ
